چئویرن: سولماز جمالی
ترجمه: سولماز جمالی
سولماز جمالی

قارتماق باغلامیش حیات
سولماز جمالی

-سسینی ائشیتمیرم … الو … الو …
های-کوی سسی … ییغینجاق سسی …
-سنی سئویرم.
-سسین گلمیر … نسرین …الووو …
دوداغینی آلنینا یاپیشدیریب درین نفس آلمیشدی. پیچیلدامیشدی: نسرین …
گؤزلرینی یاواش-یاواش آچمیشدی. سونرا یئنه یوموب بیر نئچه سئری کیرپیکلرینی قیرپمیشدی: نه یاخچی کی وارسان …
بابک یاتاغین قیراغیندا اوتورموشدو. بارماق ایزلرینی بیله‌یینده حیس ائتمیشدی.
یئنه پیچیلدامیشدی: گل بیرلیکده اونوداق … من ده اونوداجام. بیرلیکده یاخجی اولاق …
گؤزلری یوخوسوزلوقدان قیپ-قیرمیزی‌ایدی. یورغونلوق، پریشانلیق، گؤزلرینده‌کی کدر اۆره‌یینی آغریتمیشدی.
بارماقلارینی قالدیریب گیجگاهینداکی تۆکلرینی سیغاللامیشدی. آغ- قارا تۆکلرینی … گؤزلرینین قیراغینداکی قیریشلار چوخالمیشدی … اونون دردلری ده اواردا اوتورموشدو بلکه … او جیزگی‌لرده …
-من هر گؤزومو آچیب باخدیغیمدا بیر اوشاق گؤرورم. نئجه اونودوم؟!
یئنه قان-تر ایچینده ساییقلاییردی. پارلاق تر دامجی‌لاری آلنیندان سوزولوب قولاغینا، بوینونا دوشوردو. ایشیق زولاق‌لاری پرده‌سیز باجادان ایچه‌ری سیزیب تر دامجی‌لاری-نین اوزه‌رینده سایریشیردی.
یوخودا آمانسیزجا قیشقیریردی. یاردیم ایسته‌ییردی، بدنی داغیلیردی … بدنینین هر طرفینی لمس ائدن اییرنج اللری سئزیردی …
-من سنه هئچ نه دئمه‌دیم نسرین.
-امما من سنین آداخلین ایدیم.
-هه … امما نئیلئییردیم؟ اؤلدوروردوم سنی؟
استکانینی دوداقلارینا یاخینلادیب باخمیشدی.
اۆزۆنه زیللنمیشدی. بو آدام کئچمیشده ده بو قدر سویوق ایدی‌می؟ چوخ سئودییی اوچون هئچ زامان بونا دیقت ائتمه‌میشدی.
-داها کئچمیشی اونوت …گله‌جه‌یه باخ. او آدامین کیم اولدوغونو دا اونوت. دالینجا گزمه. یئنه بورداسان. بیز ائولندیک. ایسته‌میرم داها احتماللاری دوشونه‌سن. او کیشی بو کیشی …اونوت.
-من هرنه‌ییمی الدن وئردیم. گله‌جک یوخدو منیم اوچون. او آدامی تاپدیغیم گون بورالاردان گئده‌جم. بیلیرم سنین ده دوزهنینی پوزموشوق.
درین-درین نفس آلماغیندان حیرصلندیینی بیلمیشدی. آلنینی ائهمالجا اؤوکله‌میشدی. گؤزلری یاشارمیشدی …
-هئچ کیم منه اینانمادی … منه هر نه دئدیلر … قانلی دونومو هامینین یانیندا گؤزومه سوخدولار. هئچ نه‌دن خبریم اولمادیغی حالدا …
قیریق قیریق دانیشمیشدی. گؤزلرینی سویوق، بوشالمیش، وئجسیز گؤزلریندن آلمیشدی. یان-یانا اوتوردوقلاری حالدا آرالاریندا دونیا قدر مسافه وارایدی.
-ان اؤنملیسی من سنی الدن وئردیم بابک.
اوزونده بیر شئی‌ین یئریدیینی حیس ائتدییی زامان گؤزلرینی آچیب بارماقلاری‌لا چاپاغی توللادی آغ دؤشه‌مه‌نین اوستونه. اوتوروب دیزلرینی قوجاقلادی. گؤز یاش‌لارینا بوغولاراق هرگونکی کیمی نیفرت دولو باخیش‌لارینی یاشادیغی دؤرد دیوار آراسیندا گزدیردی. باخیشینداکی نیفرتی دؤرد دیوارین هاواسیندا دویماق اولوردو. اوتاغین هاواسینا درین‌ نیفرت حیسی هوپموشدو. سانکی دیوارلار چاتلاییب تؤکولهجکدی، دؤشه‌مه‌لر ارییه‌جکدی …
-بو اوشاق به هاچان یاتاجاق؟
-منیم اوشاغیمین آدی وار. چالیش بیز بوردایکن آدی‌نان چاغیراسان.
-چیغیرما اوشاق قورخار …
-اوشاق یوخ … آیشن … آیشن … اوشاق دئمه … آدینی نیفرت‌له توتما بابک …
ائلییه بیلدیکجه چیغیرمیشدی. تیتره‌میشدی. اسمیشدی. ایرهلی گلیب یانیندا دورموشدو:
-اسیرسن … داوالارین هاردا؟
-یاخینلاشما منه.
نفسی تینجیخمیشدی. داها چوخ تیتره‌میشدی.
آیشن حدسیز قورخموشدو. اؤزونون دردلرینه یانیردی یوخسا قیزینین دردلرینه؟؟!!
-داها قورخماغا بیر ندن یوخ. بورا امن‌دیر … بوردا من وارام نسرین …
محبت ائله‌ییردی؟! نیگران اولوردو؟ اؤزوده اونون خانیمی اولدوغو حالدا باشقا بیریندن بویلو اولان قادینا؟!
-من اوشاغ‌ایدیم. کیلاسدان چیخیب توالته گئدرکن آتان …
اللری‌له قولاقلارینی یوموب چیغیرمیشدی: یئتررررر … یئتررررررر …

بؤر-بؤجوک هر یئرده اویناییب زورلا قوووشدوغو یالقیزلیغینی پوزوردو؛ پال پالتار آراسیندا، آرتیق قالمیش یئمکلرین آراسیندا، دیوارلاردا …
کیرلی دوشونجهلر دیوارلاری یاریب دئشه‌جک می دئیه دوشونوردو هر یوخودان اویاندیغیندا. بوتون چیرکینلیک‌لری، دامارلاریندا آخان کینی، گؤزلرینده یئرلشمیش نیفرتی، اؤفکه‌سینی حتی قارالمیش اوره‌یینی آغ دؤشه‌مه‌نین اوستونه قایتارماق ایسته‌ییردی.
-ایللردی گزدییین آدام منم. اوتور ائوینده ائشیگینده. داها بس‌دی.
مات قالمیشدی … باجانین آرخاسینداکی اولدوزلو گؤیه باخمیشدی … اوشاغینا باخمیشدی. تیتره‌ین اللرینه زیللنمیشدی. چؤنوب اوپئنین اوستونده داوالاری‌لا دولو یئکه نایلونا … یوخ باخا بیلمه‌‌میشدی … هر گۆن اووج-اووج آتدیغی داوالاری خاطیرلامیشدی …
ال اوزونو یودوغوندا گؤزلرینی گوزگودهکی اؤلگون، سارالمیش اوزدن، باتمیش گؤزلردن، گؤزلرینین آلتینداکی گؤیومتول لکه‌لردن، تیتره‌ین پارتلاق دوداقلاردان گیزلتمه‌یه چالیشدی. قارتماق باغلامیش قادینلیغینی دا قوسا بیلردی می ؟ توپوره بیلردی می؟
مندن آلدیقلاری شئی‌لر اؤزومدن داها چوخ‌ایدی دئیه دوشونوردو …
-نئچه سئری دئییم؟ بو لیستی الینه آلیب او قاپی بو قاپی دوشمهیینی ایستهمیرم. من سنه دئییرم او ایش منیم ایشیم‌ایدی.
باشینی دیوارا چیرپماق ایسته‌میشدی …حیاتینی چیرکین اویونلاریلا چالمیشدی …هر گون داها دا چوخ قاناییردی …
-مننن بئله دانیشما … داها هئچ یئر امن دؤور … من تک بیر سئری، بیر گئجه سنین یانیندا اولمادیم، نولدو نسرین؟؟ دوققوز آی سورا قارنون نم نه بویدا اولدو …
گؤزلرینه باخدی … بابک یئنه ده باخیردی … بیر داملا یاش اۆزۆنه جیغیر سالدی. نفسی چیخمادی … بوغولوردو … ایکی قات بوکولدو … درین نفس لر آلماغا چالیشدی …
-نفس آل … آرام اول … نسرین … نفس آل …
نیگران اولموشدو؟ … بویلولوغونو اۆزۆنه چیرپاندان سونرا نیگران اولموشدو؟!! قوللاریندان یاپیشیب قوجاقلامیشدی … باشینی قوجاقلامیشدی .. مؤحکم اؤزونه سیخمیشدی …
ائله او گئجه‌ ده مات باخیشلارینین یئرینه بو امن قوجاغی ایسته‌میشدی. یانیندا دوروب اونا ایناندیغینی گؤرمک ایسته‌میشدی. گؤرهسن گؤزل آرزولاری هاردا گؤمولموشدو؟
-من اؤزوم گۆنده مین سئری سینیرام بابک … دای سن سیندیرما منی …
-من ده سیندیم … سینیرام …
دیز-دیزه اوتورموشدولار. بیلیردی. اونا دا چتین اولدو. تک بیر گئجه یانیندا اولمامیشدی؛ گلدیینده دونیانین ان پیس، ان آجی خبری قاینار سو اولوب باشیندان تؤکولموشدو. بیلمز اولوردو مو؟ هئچ نه گؤرموردو، هئچ نه حیس ائتمیردی. ایییی‌سیز، بویاسیز اوْ گئجه‌یه هر گۆن، هر آن دؤنوردو. هر آنین اینجه‌له‌ییردی.
سالوندا اوتوروب خئیلک گؤزآلتی سۆزموشدو اونو. او ایسه آغیر-اوغور باخشلارینی بئله اسیرگهمیشدی شیلتاق آداخلیسیندان. سونوندا یورولوب اومیدسیزجه یوخاری قاتا چیخدیغیندا دالینجا گئدیب الیندن یاپیشمیشدی. بیر بوجاغا آپاریب اؤپموشدو اونو.
نئجه ده چوخ سئویردی آغیر-اوغور آداخلیسینی.
بازارا آلیش-وئریش اوچون گئده‌جه‌یینی دئدییینده لئچه‌یینین قیراقلاریندان گؤرسنن ساچلارینا زیللنمیشدی.
-بئله گئدیسن؟ ساچ‌باغین‌لا ساچینی توپلا، لوطفن.
دیشینی آغارتمیشدی:
-ساچ باغیمی ایتیرمیشم.
-ائله بیر دنه ساچ‌باغین وارایدی؟
قاشلاری گؤیه دارتیلمیشدی. قیمیشاراق اوجا سس‌له «ههههه» دئمیشدی.
آیاغا دوروب قیزین آرخاسینا کئچمیشدی. لئچه‌یینین اوجوندان یاپیشیب گؤیه قووزاییب ساچلارینی هؤرموشدو.
هؤره-هؤره دیلینین آلتیندا آلچاق سسله اوخوموشدو …
” ..
آلدین صبری قراریمی
آذربایجان مارالی
من قوربانام گؤزلره
شیرین شیرین سؤزلره
بیر قوناق گل بیزلره
آذربایجان مارالی
…”
قولوندان یاپیشیب اؤزونه طرف چئویرمیشدی.
-ایندی گئده بیلرسن … گئجیکمه.

-تانیشلاریمیز، دوستلاریمیز حتمن کی کیرلی دوشونجهلرینده منی هر کیشینن تصوور ائلهییرلر … بو سنی اینجیتمیر؟
اللرینی مؤحکم چیرپمیشدی ماسانین اوزهرینه. شکر قابی دؤشهمهنین اوزهرینه دوشوب پارچالانمیشدی.
-بیر آن بئله اولمادی منی سئوهسن ؟
چنهسی اسمیشدی.
آیاقلارینی قاتلاییب یانیندا اوتورموشدو. اللرینی توتماق ایستهدییینده آیاغا قالخیب لئچهیینی اؤزونه بوکموشدو. باخیشلارینین آغیرلیغینی سئزمیشدی. اونا چؤنوب باخمادان حیهطه چیخمیشدی. باغلی قاپیدان، اوتاقلارینین آراسینا چکیلمیش دیوارلاردان پاپریزین قوخوسونو آلمیشدی. آجی اییسینی نفس چکمیشدی …
دؤرد دیوار آراسینداکی سس‌سیزلییی هر گون قاسناق باغلامیش هؤنکورتو سسی پوزوردو. سس‌سیزلیک چؤکدو دؤرد دیوارا. بؤر-بؤجوک‌لر دیوارلاری یوخ بیر بدنی یاریب دئشمک ایسته‌ییردیلر. دونموش بیربدنی … سانکی جانی بدنیندن چیخمیشدی …
-دوققوز یاشیم وارایدی. من او ییرتیجی گؤزلری هله ده اونوتمامیشام … هئچ کسه گوونمیرم … هامیدان قاچیرام … حیاتیمدا بیر دنه دوستوم دا یوخدو . باشا دوشورسن منی؟ من تکم.
-من سنین خانیمین‌ایدیم … من بویلو‌ایدیم … منه خاراب دئدیلر…
الینی قارنینا قویوب داوام ائله میشدی:
-آیشن بوردا‌ایدی … سن دینمه‌دین … دئمه‌دین … مگر سن اؤزون‌ایمیشسن …
گؤز یاشلاری آمان وئرمهمیشدی. دورمادان دیزلرینی ترپتمیشدی. اورهیی بولانمیشدی …یورغونایدی …باشی پارتلاییردی …
ائله بو کیشیایدی؟ …اورهیینی بولاندیران عطری حدسیز تانیشایدی … اییرنج اللری تانیشایدی … سانکی بوتون قاپیلار، دیوارلار، دؤشمهلر دورمادان دانیشیردیلار …سوسسایدیلار کئشگه …دانیشیقلاری باشیندا عکس-صدا وئریردی …
پنجره‌نین قاباغیندا دورموشدو. بدنینین ایستیلییی بیرآز آزالسین دئیه آلنینی شوشه‌یه سؤیکه‌میشدی … قیزی گئرچک آتاسیلا حیهطده اویناییردی …گولوردو …گؤزل گونلرینی اوندان چالمیشدیلار …باغیشلاماسایدی بو گونونو ده اؤزو چالاجاقدی؟ قیزیندان دا اؤزوندن ده …صاباح دا بو گونلرینه اوزولهجکدی؟
گئندن باخاندا هر شئیی وارایدی اما اصلینده هئچ نهیی یوخایدی … اونون باخیشلارینی سئزدیکده باجانین قاباغیندان قیراغا چکیلمیشدی …
بابک اللری‌له باشینی توتوب سیخیردی. چؤنوب باخمیردی اونا. گئجه‌نین قارانلیغیندا کؤلگهلری باجانین تر باسمیش شوشه‌سینه دوشموشدو. یان یانا دورموشدولار.
-سن اوتاغینین قارانلیغیندا هئچ نه گؤرمه‌دین نسرین … حیس ائله‌مه‌دین … بیلمه‌دین … اما من گؤردوم … حیس ائله‌دیم … منه توخونان آدامین ییرتیجی گؤزلرینی، اللرینی گؤردوم … دفعه‌لرله اولدو …تکرار تکرار اولدو …
بدنی بوم-بوز ایدی … تیتره‌میشدی … اللری‌له اؤزونو قوجاقلامیشدی. هاوا چوخ دا سویوق دئییل‌دی … او تیتره‌ییردی …
-منی اؤپدون؟… قوجاقلادین؟… هئچ باخدین منه؟…یا تکجه منی …
دیرناغینین قیراغینی دیشینه سالیب یئمیشدی.
بیلمیردی نهلره دوشونمهلیایدی … آتاسی هر زامان هر هانسی بیر ایلیشکیدن قورخوزاردی اونو. ایلیشکیلرینده همیشه احتیاطلیایدی. هئچ کسله یاخین دئییلدی. سس‌سیز-سمیرسیز عئینی حالدا حؤصله‌سیز بیر کیشیایدی. مئبیل‌ده اوتوروب تلویزیونا زیللنردی. یادداشیندا تکجه آتاسی و آناسینین همیشه یاشلی گؤزلری وارایدی. سونرالار او یاشلی گؤزلری داها هئچ واخت گؤرمه‌دی.
تکجه آتاسی وارایدی. ییغینجاقدان زهله‌می گئتدییی حالدا هردن قیزینین الیندن یاپیشیب پارکا آپاراردی. هردن محبت ائلردی …
آیشنی قوجاقلامیشدی. بو نجور حیس‌ایدی؟ قیزی هم دردایدی هم درمان.
باشینی قالدیریب گؤزلرینی تاوانا زیلله‌میشدی. کیرپیکلرینی دال با دال قیرپمیشدی:
-من سنی چوخ سئومیشدیم اما … سن منیم‌له نه ائلئییبسن؟ فرقینده‌سن؟ … هامی منه بییابیر دئدی … حیاسیز دئدی‌لر … قانلی دونومو اۆزۆمه چیرپدی‌لار … سن دوروب باخدین … من باشیما نه‌لر گلدییینی بیلمیردیم … سن؟؟!! … دئییرسن سن اؤزون‌ایمیشسن؟! … هامیسی اویون‌ایدی؟! …من قاپیمیزین گودوکچوسونه بئله شک ائلرکن سن بیر قیراغدا منه گۆلۆردون؟! … آتام سنه؟! … اونون آجیغینی مندن چیخدین؟ …‌ اؤز خانیمینا تجاوز ائله‌دین؟! …
بیرآز ایرهلیده بیر آدام بوتون نیسگیللرینی، دردلرینی، داریخمالارینی توستویه وئریردی. بیر آدام اوردا تک قالمیشدی…

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

قارتماق باغلامیش حیات

سولماز جمالی
www.ishiq.net

آذربایجان ادبیات و اینجه‌صنعت سایتی

قارتماق باغلامیش حیات

سولماز جمالی
www.ishiq.net

آذربایجان ادبیات و اینجه‌صنعت سایتی

قارتماق باغلامیش حیات

سولماز جمالی
www.ishiq.net

آذربایجان ادبیات و اینجه‌صنعت سایتی