چئویرن: سولماز جمالی
ترجمه: سولماز جمالی
سولماز جمالی

ازیلن‌لر ازیرلر!(ایکینجی بؤلوم)
سولماز جمالی

آلت قاتدان اویون هاوالاری، توی ماهنی‌لاری، فیت سسی گلیردی. باشینی آشاغی اییب یاشارمیش گؤزلرینی آلت قاتا دیکدی.
اوتاق شنلیک اوچون الوان ایشیقلار، بر-بزکلی شمع‌لرله بزه‌دیلمیشدی.
بیری الینده آغ ملفه ایله ایچری گیردی؛ قاپی‌نین یانیندا بویاسی تزه‌جه یئنیلنمیش آغ و سویوق دیوارا سؤیکه‌نن قادین الینده‌کی «قیزلیق» کاغیذینی ائهمالجا ملفه‌نین اوزه‌رینه قویوب پیچیلدادی.
ایچری گیرن قادین لووغالیق‌لا اوتاقدا اوتوران هرکسین قاباغیندا اییلیب ملفه‌نی آچیب گؤرستدی. ائله بیل کاغیذ‌لا ملفه‌نی هامی‌نین گؤزونه تپیردی. گلینین باکیره اولدوغونو قانیتلادیقدان سونرا گلین‌له بی‌یین قاباغیندا قوللارینی آچیب اوخویا-اوخویا فرحله اوینادی.
-دام‌دامادی دامیمیز
قوشادیر ائیوانیمیز
سن اوردان باخ من بوردان
کور اولسون دوشمانیمیز

بی‌یین آلنیندا غرور، گؤزلرینده تمکین و سئوینج قیغیلجیملاری سایریشیردی. آیاغا قالخیب گلینه ساری دؤندو، ساغ الی‌له خانیمی‌نین اوزوندن قیرمیزی دوواغی قالدیریب آلنیندان اؤپدو؛ الینده‌کی قیزیل بویون‌باغینی قیز اوشاغی‌نین بوینونا سالدی.
کدر دولو دونیانین حوزونلو بیر یئرینده ایدی. قادینلارین چیرکین پیچیلتی‌لاری گلینی سیندیریردی.
گلینین گؤزلری یاشاردی، سونرا اوزونه آخیب قیزلیغی‌نین ثبوتو اولان ملفه‌یه تؤکۆلدۆ.
او گولومسه‌دی. اما او گولوشده سئوینجدن چوخ گؤز یاشی و کدر وار ایدی.
اونون بوتون دونیاسی سیره‌مله تاقچادا اوتوروب باشلارینی آشاغی سالیب گؤزاوجو اونا باخان قولچاقلاری ایدی. اویونجاقلارینی گؤرر-گؤرمز، اوره‌یینده چتینلیکله ساخلادیغی ناله‌نی قوسدو. اؤزونو اله آلا بیلمه‌دی؛ بوغازیندان باشقا بیر ناله چیخدی … یئنه ناله …
اونون اوره‌یینده هم ده اینانیلماز و آنلاتیلماز بیر سئوینج وار ایدی. او قاریشیق حیس‌لر کئچیریردی.
اونون داها پیتزا آلماغا پولو وارایدی. او آرایش ائله‌ییردی، گلینلیک گئیمیشدی. اینستادا اری‌له قول-بویون اولدوقلاری شکیللردن بیر نئچه‌سینی پایلاشمیشدی. هامی اونلارین خوشبختلییینی قیسقانیردی. چوخلو گئرچک قولچاغی اولاجاقدی؛ آناسی لاپ بالاجالیغیندان بونلارین هامیسینی اونا دئییب سؤزون ده وئرمیشدی. ایندی آنلاییردی کی آناسی اونو قورو و بوش وعده‌لرله دولاندیرمامیشدی.
قارنیندا گئرچک قولچاغی دورمادان آتیلیب دوشوردو.
بو دورومو گؤردوکده تله‌سیک قاپیدان چیخیب اورادان ائنسیز کرپیچ پیلله‌لرله آشاغی ائندی. داردان دار، رطوبتلی، کیف قوخویان، نم، سویوق زئرزه‌میده بیر قادین قاباغینداکی اؤلو پیشییی تله‌سیک پؤشه‌له‌ییردی. پیشییین بوینونا سوخدوغو کوت بیچاغی داها دا درینلره باتیردی. اؤلو پیشییین گؤز یاشلاری یاناقلاریندا قوروموشدو.
پیشییین بالالاری کونجده بیر-بیرینه قیسیلیب آغلاشیردی‌لار. گیله‌لریندن قان دامیردی.
آناسی‌نین بؤیرونده یوخویا گئدن کؤرپه کسیک بیر سسله آغلاییردی. او یوخودا دا اینیلده‌ییردی: آجام، منه چؤرک.
-آج من‌ایدیم. بولاردی‌لار.
چؤنوب بؤیرونه باخدی. همن گلین‌ایدی. بوینوندا قیزیل بویون‌باغیسی‌لا؛ بوینو اوزولموشدو.
رحمیندن جانلی و یوموشاق بیر شئی ائشییه چیخیردی.

ائوین هاواسی دؤزولمه‌یه‌جک درجه‌ده آغیرایدی. هر شئی اوره‌ک بولاندیریجی، جان سیخیجی بیر دوروما گلیب چاتمیشدی.
اوچوق پیلله‌لردن ائندییی زامان آیاغی نه‌یه‌سه ده‌ییب یارالانمیشدی. آغریدان آجی بیر سیزیلتی دویوردو.
اللری‌له بوغازینی اؤوکله‌یه-اؤوکله‌یه کوریدورا چیخدی. اینسانلارا بیر ده، ایکی ده باخدی. سانکی کیم ایسه الیندن توتوب، اونو قاتلاردا گزدیریر، ائولره آپاریر، «گؤزونو قشح آچ باخ بو اینسانلارا، آجلاری گؤره بیلیرسن می؟!!» دئیه حیاتین آجی، چیرکین صحنه‌لرینی، انسانلارین اوره‌یینی آچیب اونا گؤرسه‌دیردی.

اوست باشلاری تؤکولموش، یوردسوز-یوواسیز اوشاقلار بیر-بیرینه و خارابالیغا گلمیش سۆمسوک ایت‌لره قیسیلاراق یاتمیشدی‌لار‌.
کئییمیش حس‌له اوشاقلارا باخیردی. اونلارین یاری‌چیلپاق و یازیق گؤرکمینی، یاشلارینا اویغون اولمایان قابارلی اللرینی، اوز-گؤزلرینده یئرلشمیش کدری و سفالت ایچه‌ریسینده یاتدیقلارینی گؤردوکده دولوخسونوب باشینی یانا چئویردی.‌ حیاتین چیرکین و جانلی اوزونو گؤردوکده اوره‌یی آجیشاراق چیرپیندی.
-اوچو بئش میندی.
جورابی‌نین ایچینه سالینمیش یاماق-ییرتیقلی، رنگی بیلینمه‌ین شالواری سیدیک اییی وئریردی. اوره‌یی قالخیر، اؤگویور، قوسماق ایسته‌ییردی.
بوتون بو ایی‌لره ائولردن گلن رطوبت قوخوسو دا قاریشیردی.
-دونن ده مننن بیر شئی آلمادین.
اوره‌یی بولاندی‌. ایکی قات اییلدی. اؤگویه‌رک اییلیب باشینی یئره ساری توتدو، معده‌سیندن آغزینا ساپ‌ساری سویا قاریشیق اول آخشامدان یئدیییی کالباس دا گلدی. یئره توپوردو …
اوشاقلار بو دورومو گؤردوکده قادینا ساری شیغیییب یئری یالاماغا باشلادی‌لار.
قادین باشینی خارابالیغین نملی دیوارینا سؤیکه‌یرک آغلادی. گوجسوز بیر اوشاق کیمی هؤنکوررک آغلادی.
کوریدورلارین، دیوارلارین دیبی نجاست‌له، ائولرین هنده‌وری چیرکلی سو و زیبیل‌له دولو ایدی.
پالتوسونون یاخاسینی بیر-بیرینه یاخینلادیب دویمه‌لرینی باغلادی. آیاقلاری‌نین جانی یوخ ایدی؛ گؤزلری قارالیردی. اوچوق پیلله‌لردن والایلایا-والایلایا آشاغی ائنیردی. بئلی بوکولموش، السیز-آیاقسیز و قوجا دیلنچی‌لرین آیاغی اوچوق پیلله‌لردن بئله کسیلمیردی.
بیر قاتدان باشقا قاتا ائندیکدن سونرا سایسیز-حسابسیز قاتلار قاباغینی کسیر، بیر اوچوق ائوی کئچدیکدن سونرا عئینی ائولره بنزه‌ین باشقا ائولر قارشیسینا چیخیردی.

اللرینی بئلینه قویاراق کوریدوردا گزینیردی. آغزینداکی قندی او طرف-بو طرفه دولاندیرا-دولاندیرا: جینلریمی اویناتمئیین، نئجه او دستماللاری زورنان وئردیم الیزه، نئجه چیغیردا-چیغیردا ایشه مجبور ائله‌دیم، ائله‌جه ده وارلی‌لارین جیبینی وورماغا، دئدیکلریمی یئرینه یئتیرمه‌یه مجبور ائلییه‌جم. ایت کوچوک‌لری …
قیجینمیش دیشلری‌نین آراسیندان هر کلمه بؤیوک بیر نفرت‌له چیخان آدام، بو سؤزلری دئیه-دئیه اوشاغا ساری یئریدی. دوشونجه‌سینده حساب کیتاب ائله‌دییی پوللار بئینینی گمیریب ایچینی یئییردی: به دئییرسن هارانی توتوبسان؟!
اوشاغین اؤنونده دوروب قارا بولود کیمی اوزونه کؤلگه سالدی: دره خلوت تولکو بی. هه؟!
بونو گؤرن اوشاغین دیزلری تیتره‌مه‌یه باشلاسا دا گؤزلرینی اونون لاپ ببه‌یی‌نین ایچینه زیلله‌دی.
اوشاغین سسی جیریلدادی: من اوغورلوق ائلییه بیلمرم.
او، سسینی یاواشیدیب لاپ یاخینا گلدی، اوزونو یانا توتوب توپوردو:
-باغا قینیندان چیخدی قینینی بیه‌نمه‌دی.
او دانیشاندا آغزی کؤپوکله‌نیر ایری، قارامتیل دوداقلاری‌نین آراسیندان توستو فیسقیریردی.
قالین الی هاوادا اووولدادی. اوووجوندا آدامین زهله‌سینی آپاران ایری-اویرو درین جیزگی‌لر گؤروندو. سانکی گیره‌وه دوشموشدو الینه.
اوشاق شیلله‌نین ضربیندن بیر نئچه آددیم دیوارا طرف سندله‌دی، قیزارمیش اوزونو الی ایله توتدو.
اوشاغین فیکری قارالیردی، حیرص اونو بوغوردو، ایچینده سوسماق بیلمه‌ین بیر حیس او کیشینی «وور اؤلدور» دئییردی. یادداشیندا حیاتین بعضی گئرچک اولوب-بیتن‌لری جانلانیردی. بایاقدان کاغیذ کیمی آغاپپاق اولان رنگی بوزارمیشدی.
او، کیشی‌یه دوغرو دؤنوب اوزونه توپوردو.
اؤزونه گلیب دؤنوب بیر ده اوغلان اوشاغینا باخماق ایسته‌دیکده، دار کوریدورون باشیندا نه ایسه کؤلگه‌یه بنزر بیر شئیی سورودوکلرینی گؤردو.
کیشی هئچنه اولمامیش کیمی استکانداکی چایی بوغلانا-بوغلانا، پوله‌یرک ایچدی. سیگار آلیشدیریب آلاقارانلیق کوریدورو سوزدو. دوداقلاری‌نین آراسیندان فیسقیران توستودن گؤزو آجیشدی. ساغ گؤزونو قیییب یئنه بوش کوریدورو سوزدو.
کول‌قابیندا قالانمیش سیگار کؤتوکلری قیزاریب بوزاریردی.
هر شئیه بویون این صاحبسیز اوشاقلار پیچیلتی ایله دانیشیر، سس چیخارماقدان قورخاراق اؤز وارلیق‌لارینی گیزلتمه‌یه چالیشیب، پنجه‌لری اوسته یئریییردی‌لر.
بونلاری گؤردوکده، دوشوندوکده ایچیندن بیر آجیقلیق، بیر اود دوغوروردو.

دیوارلاردا گؤزونه ده‌ین قیرمیزی جیزیق‌لار گئت-گئده چوخالیردی.
دیوارین اؤنونده دوروب یازی‌لارا نظر سالدی؛ بؤیوک حرفلرله یازیلمیش یازی‌لاری زور دا اولسا اوخوماغا چالیشدی:
«بیر تانری وارسا، باغیشلانماق اوچون آیاغیمین آلتینا دوشمه‌لی‌دیر ۱»
«اؤز دیلینده یازا بیلمزسن دئدی‌لر
بیز ده مدرسه‌نی دیوارلارا داشیدیق ۲»
«ای کدر!
دیزلرین کؤکسوموزه چؤکمکدن آغریمادی‌می؟ ۳»

سانکی هر ائوین بیر حیکایه‌سی وار ایدی و هر کس اؤز حیکایه‌سی‌نین داها اؤنملی اولدوغونو دوشونوردو.
یان دیوارداکی قیرمیزی رنگله یازیلمیش یازییا گؤزو ساتاشدی: منفی دؤردونجو قات

داملار داغیلمیشدی. یالنیز ایکی-اوچ اوچوق دیواری قالمیش ائولری گؤزونون اؤنونده گؤردو.
آز-چوخ سالامات قالمیش بیر دامین اؤنونده دایاندی. آنجاق سینیق-سالخاق بیر قاپی، بیر ده شوشه یئرینه نایلونلا قاپانمیش تاختا پنجره‌لری گؤردو. قاپیدان گیرن کیمی سولا بورولدو، بئش آددیمداکی دار پیلله‌لردن آشاغی ائندی. بورادا، یئرین آلتیندا هاواسیز، ایشیق‌سیز زئرزه‌میده او اوردلاری باتمیش اینسانلاری گؤردو. تاواندان آسیلمیش بالاجا چیراق اورتالیغا ساری ایشیق سالیر، اوشاقلارین کؤلگه‌سینی قورخونج شکیلده بؤیودوردو.
گؤزو ساعاتا ساتاشدی. بیر ایدی.
بیری‌نین «آنا، آنا» دئیه‌ن نفسی داشی دا اریدیردی.
قادین دیوارین دیبینده آیاق اوسته دوروب بوجاقدا آغلایان اوغلونا باخیردی.
اونون باتمیش‌ اوردوندان، یارپاق کیمی سارالمیش اوزوندن گؤزلرینی آلا بیلمیردی.
بالاجا اوشاقلار آنالارینا قوووشماغین سئوینجینی یاشایارکن تومانی‌نین اته‌ییندن یاپیشیب، اونا قیسیلمیشدی‌لار.
جاوان اوغلان آناسینی قوجاقلاییب آغلاییردی. گؤز یاشلارینی ساخلایا بیلمه‌یرک، جانسیز آناسی‌نین باشینا سؤیکنمیشدی.
-اؤلمه‌ییم، اوره‌ییمه داممیشدی. منی سویوقدان چوخ آجلیق اؤلدوردو. دئ چکیلسین. راحات جان وئریم.
قادینین جێلێز بدنی یارا ایچینده‌ ایدی. دریسینی شاختا کسمیشدی.
اونون باخشیلاریندا اؤزونه قارشی نفرت قاریشیق حیرصی دویوردو. بو دا اونو هم اوزور، هم ده اینانیلماز قورخودوردو.
قادین یاشارمیش گؤزلرینی یانا چئویردی. آمما یئنه دؤزمه‌ییب لال و کدر دولو سون باخیشلارینی بالاسینا دیکدی.
جاوان اوغلان اوزون مدت باشینی دیزلرینه سؤیکنمیش حالدا اوتوروب قالدی. اونون سولغون اوزونه باخدی، دوداقلاری آغارمیش، گؤز قاپاقلاری شیشگین، گؤزلری‌نین ایچی ایسه قیرمیزی ایدی.
-چؤرک داشدان چیخیر.
بیر آز سوسدو. بوغازیندا بیر جور گؤینلتی حیس ائله‌دی. گؤزلرینی یاندیران گؤز یاشلارینی یاماق-ییرتیقلی کؤینه‌یی‌نین قولو ایله سیلدی.
-کاسیب جاماعاتی، ساری یارپاقدان، یاغیشدان، آغا بورونن شهردن بئله نیفرت ائله‌مه‌یی اؤرگه‌نیر،-سئیرک قاشلارینی قاشیدی.-آنامی، آتامی، باجیمی قارداشیمی بو شه‌هر یئییب، شاختا اؤلدوروب، آجلیق اودوب.
او، بیر خسته کیمی ساییقلاییردی. گئت-گئده سسی داها دا ضعیف گلیردی:
-سن ظولمون، آجلیغین دادینی آنلامیرسان،-لاپدان سانکی دئیه‌جه‌یی بیر سؤز یادینا دوشدو، دیکه‌لدی.
-بئلین گئت-گئده اییلیر، بوکولور. بو داشلار ندی بوینوننان قولوننان ساللانیب؟!
قادین گؤزلری‌له اؤتری اونا باخدی و اعتناسیز بیر حالدا بیر آز دا اییلیب اونون گؤزلریندن یئره تؤکولن بؤیوک-کیچیک داشلاری اووجونا ییغدی.

یان ائودن دویولان کؤرپه اینیلتیسیی کسیلمیردی.
دیوارا یاخینلاشیب ائوین ایچینه باخدی.
اوتاغین او تای بو تاییندا سیچانلار، سیچوووللار اویناشیردی.
زیل قارانلیقدا کؤرپه‌نین باشینی بوز سیچووول دیشلری‌نین آراسینا آلیب چئینه‌ییردی.
دیزلری اسه-اسه قان قیرمیزی دیواردان کئچیب اوشاغا ساری اییلدی. او یئنه یوخویا گئتمیشدی.
اییلیب اۆزونو اونون اۆزونه سورتدو. ایکی اللی یاناقلارینی توتدو.
اوشاق گؤزلرینی آچدی؛ اۆزونو دیوارا چئویریب، آغلامسیندی: من چیرکینم، چوخ قارییام، منی هئچ کیم سئومیر.
جێلێز چییینلرینی چکه-چکه گؤزلریندن بیر یوخ، بیردن بیر نئچه داملا آخیردی. اونون گؤز یاشلاری قادینین اوست-باشینا یاغیردی.
دوداقلارینا آجی گولومسه‌مه قوندو؛ اوشاغین بیر دری بیر سوموکدن اولان یاناغینی دارتدی.
-سن چوخ گؤزلسن.
قادینین سسی قیریلدی. اونا توخوندوغوندا قه‌هر بوغازینی کسیر، اوره‌یی ایسه آز قالا دایانیردی.
-منی بوغ اؤلدور،- حیاتدان کوسن بیر جوت گؤزو چوخورا دوشموشدو.-چوخ آجام …
قادینین باشینا سانکی بیر گوپون چالیندی؛ گیجه‌لدی، تیتره‌دی. هئچ بیر سؤز دئمه‌دن قاپیدان چیخیب قاچماق ایسته‌دی.
اوشاغین باش طرفینده اوتوران سێسقا سیچووول سؤزه قاریشدی:
-من ده یئمه‌سم آج آداملار اؤلمه‌یینی گودورلر.
اوشاق اؤلۆوای سیچووولون قورخوسوندان چابالایا-چابالایا، تیتره‌یه-تیتره‌یه باشی ایله اؤزونو کیف قوخویان یورغانین آلتینا سوخوردو.
او سؤزونه داوام ائده بیلمه‌دی، اوتانجاق بیر حالدا سوسوب باشینی آشاغی سالدی. او آن اونون حیاتی‌نین ان اوتاندیغی بیر آنی ایدی. حیاتی بویو گؤزونون اؤنونده گؤردویو هیچ بیر شئی‌دن بو قدر اوتانمامیشدی.
قادین اوتاقدا او باش-بو باش گزمه‌یه باشلادی. سینیرلری او قدر گریلمیشدی کی، هارا دیسه هر شئی بدنینی تیکان کیمی دالاییردی. بیردن-بیره کؤورلدی. سسینی دویان اولماسین دئیه اللرینی آغزینا سیخیب ایچینده قیشقیراراق آغلاماغا باشلادی. آمما باجارمادی. او اوره‌یینده‌کی آغرینی بوتون اینسانلارا ائشیتدیرمک ایسته‌ییرمیش کیمی بیر ناله قوپاردی.
بدنی سوست اولموشدو. اللری، آیاقلاری بوشالمیشدی، نه یئریندن ترپنمه‌یه، نه قولونو قالدیرماغا گوجو یوخ ایدی.
یوخاری قاتلاردا‌ یاشایان قونشولارین قاققاناق چالمالاری پیلله‌کنی تیترتدی.
صاف اورکلی انسانلارین قوپاردیغی آه-ناله، اوست قاتلارداکی اینسانلارین گولمک‌لری آراسیندا، لال دیوارلارین پیچیلتی‌لاری آراسیندا محو اولوب گئدیردی.
بو آندا کؤرپه‌نین قیغیلتیسینی ائشیدیب داها دا کؤورلدی.
یوخسوللوق، قیرمانج کیمی ائنیب اینسانلارین جانینی زولاق-زولاق گؤینه‌دیردی.
اینسانلارین، ائولری‌نین قالین دیوارلاری آراسیندا، درین زئرزمی‌لرینده عاغلا سیغماز عذاب و ایشگنجه‌لر چکدیکلرینی گؤروردو.
آیاغا قالخیب هنده‌ورینه باخدی. سایسیز-حسابسیز قاتلار، بیر-بیری‌نین بؤیرونه سوخولموش اوجا-آلچاق ائولر، اونون ال-قولونا ساریلیب گؤز آچماغا، هارادا اولدوغونو معین ائتمه‌یه امکان وئرمه‌دی. اوست-اوسته تیکیلمیش اوچوق ائولردن گلن اینیلتی قولاقلاری دلیردی.
ایلک دفعه اورک‌سیخیجی و قاچیب قورتارماق مومکون اولمایان بیر باتاقلیغا دوشدویونو گؤردو.

آستاجا یورویوردو، یورولوردو، زویویوردو، یولو ایتیریردی.
اوچوق پیلله‌لرله آلت قاتا گئدرکن زنجیرلرین جینگیلتیسینی دویدو. اینسانلارین ال آیاقلارینداکی زنجیرلر چوخالمیشدی. گئجه یاریسیندا کوریدورلاری، پیلله‌للری دولدورموش یوردسوز اوشاقلارا، سفیل، سرگردان بیر حالدا هر گلنه ال آچماقدان یورولمایان دیلنچی‌لره، چادرالارینی اۆزلرینه بۆکۆب زیبیل‌قابی‌لاری ائشه‌ن قادین‌لارا باخیردی. گؤردوکلری‌نین هامیسی باخیشینی جلب ائدیب اونو دهشته سالیردی.
یاری تیکیلمیش بینالارین ایچینه دولموش آج، چیلپاق، یوواسیز شهر اوشاقلاری‌نین آغلاشماسیندان باشقا بیر سس شهرین سکوتونو پوزموردو. یوخسوللوغون ایتی دیرناقلاری اینسانلارین بوغازینی کسیردی.
او ایسه دوز گئدیر، رنگی قاچمیش، گؤزلری چوخورلاشمیش انسانلارین اوزونه بئله باخماقدان چکینیردی. هارادانسا اسیب گلن ایتی بیر سازاق انسانین ایلییینه ایشله‌ییردی.
ایرانئتدن، نایلوندان اولان تاوانلار بوز باغلامیشدی. هامی‌نین اوزونده توکنمز بیر درد، آغیر بیر احتیاج حسی گؤرونوردو. گؤزلرده‌کی ابدی اندیشه و چیرپینتیدان باشقا، هئچ بیر شئی گؤرمک اولموردو.
بیر داها قولونو قالدیریب ساعاتینا باخدی. ساعات بیر ایدی. کئشگه ائوینه دؤنه بیلیردی.
سانکی سونسوز بینادا سونسوز بیر یولچولوغا چیخمیشدی.

منفی دوققوزونجو قات.
سیسقا یاغیش ایرانئت‌له قاپانمیش تاواندان سیزیب دیزلرینی قوجاقلاییب بوجاقدا اوتوران اوشاقلارین باشینا تؤکولوردو. اونلار اوچوق ائولری‌نین دیوارلارینی تزه‌جه پالچیقلاییب، ائوین ایچینی ساهمانا سالمیشدیلار.
یاغان یاغیش دایانماق بیلمیردی. تاختا پنجره‌لری کولک چیرپیردی.
اوشاقلارین آراسیندا باش-گؤزو توکسوز اوغلانا گؤزو ساتاشدی. الی-قولو باغلی، بوتون وجودو آغ پارچایا بوکولو، سیم-سیخ ساریلی ایدی.
اوست-باشی پالچیق ایچینده یاخینلاشیب اونون یانیندا اوتوراراق بارداغا دیکیلمیش گؤزلرینه باخدی.
اورادا غریبه آب-هاوا وارایدی. هئچ کیم هئچنه باره‌ده دانیشماق ایسته‌میردی. سانکی هامی‌نین سؤزو بیتمیش هئچنه‌یه نه ماراقلاری قالمیشدی نه ده ایستکلری وار ایدی.
اونون گؤزلرینده سونسوز عذاب و روحی سیخینتی‌لارلا دولو اون بئش ایللیک حیاتینی گؤردو. او، گؤزلری‌له دیواردان آسیلمیش چاتلاق گوزگونو گؤرستدی. گوزگودن دهشت ایچینده قیشقیریق سسی گلدی. جاوان اوغلان الینده‌کی داراغی یئره توللاییب قیشقیرا-قیشقیرا اؤزونو اورا-بورا چیرپیردی؛ گؤزلرینی یوموب تیتره‌ین اللری‌له ساچلارینا توخوندوقجا توپا-توپا باشیندان قوپان توکلرینی یئره توللاییردی. دهشتدن بوتون وجودو تیتره‌ییر، گؤزلری برلمیش، رنگی بوزارمیشدی. او، اؤدونو اودموشدو.
-منی دیری-دیری باسدیریبلار. اوستومه تورپاق سپیبلر.
قادین گؤزلرینی سوسموش گوزگودن آلیب اوغلانا باخدی.
او، ساغ الینی آغ پارچادان چیخاریب لیوانداکی زیغلی سویو باشینا چکدی.
-آجلیغیمی اؤلدورور، هئچنه‌دن یاخجیدی.
اؤلوم سینیرلارینا گؤتورن اؤسکورکله داوام ائله‌دی: تمیز سو گؤرنده قوسماغیم گلیر.
دیوارلا تاوانین بیرلشدییی نقطه‌ده، دوستاق بارماقلیق‌لارینا بنزه‌ین اوزون‌سوو بیر باجا وار ایدی. اوردان یالنیز آیاقلارین گل-گئت‌لرینی گؤرمک اولوردو. بیر کیشی اوردان کئچرکن در حال زیپینی آچیب میله‌لرین اوستونو سیدیک‌له‌دی.
قادینین بدنی بویونجا باشیندان آیاغینا کیمی جانیندان غریبه بیر اوشوتمه کئچدی.
اوغلان اوشاغی اؤگومه‌یه باشلادی، یئره ساری اییلیب زیغلی سویا قاریشمیش قانی یئره توپوردو.
کفنی‌نین اوجو ایله آغزینی سیلدی.
ائله اوتوردوغو یئرده آیاقلارینی آلتینا ییغیب، بوزوشدو. دیوارداکی ساعاتا باخا-باخا یوخلادی.
اینسانلار آغیزلارینی آچیب بیر-بیرلرینی یئییب بیتیرمیردیلر. اونون یئرینه پارچالارا آییریب، یارالاییب، ووردوقلاری یارالار‌لا یاریمچیق بوراخیردیلار.

تزه‌جه یاغیش یاغدیغیندان هر یئر پالچیق ایدی. آداملار اتکلرینی ییغیشدیراراق، سو گؤلچه‌لری‌نین قیراغی ایله ائهمالجا او طرف بو طرفه کئچیردی‌لر. آیاق‌یالین، باشی آچیق اوشاقلار هئچ نه‌یی سایمادان پالچیقلی سویو اطرافا سیچرادا-سیچرادا گؤلچه‌لرین ایچینده یئریییردی‌لر. بیر اوشاق دوستلارینی هنده‌ورینه ییغیب الینده‌کی ییرتیق قالوشو ایله سئلفی چکیردی.
ائولرین آغیر و میندار هاواسینا هئچ جوره آلیشا بیلمیردی. نفسی داریخیر، اوره‌یی شدتله دؤیونور، باشی گیجه‌لیردی. هاواسیزلیقدان بوغولاجاق، اوره‌یی پارتلایاجاق کیمی اولوردو. دار کوریدوردا اوزونو ایکی قاریشدان آرتیق اولمایان بالاجا باجایا توتوب باخدی.
بیر قادین کوچه‌دن کئچرکن الینده‌ کی چؤرکدن بیر تیکه قوپاریب، اعتناسیز و حتی آجیقلی بیر حرکتله ایتین قاباغینا آتدی.
ایت آغلایا-آغلایا چؤره‌یی آغزینا آلیب قیراقدا دوروب گؤزلرینی چؤره‌یه زیلله‌ین اوشاغا طرف اوزاتدی.
اوره‌یینده قوپان بیر باغیرتی نفسینی کسدی. بیردن اونو بوغان بیر آغیرلیقدان آزاد اولورموش کیمی اللرینی آغزینا توتوب باغیردی …
کولک اووولداییب-اووولداییب شه‌هرین خیابانلاریندا، کوچه‌لرینده، بینالارین تینینده شاختا هاوایا یئره آخان قانلاری قاتاراق، اینسانلارین اوزونه، گؤزونه، باشینا چیرپدی.
بیردن داش کیمی آغیر بیر جایناق بوغازینا کئچدی.

آردی وار …

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ازیلن‌لر ازیرلر! (۲)

سولماز جمالی
www.ishiq.net

آذربایجان ادبیات و اینجه‌صنعت سایتی

ازیلن‌لر ازیرلر! (۲)

سولماز جمالی
www.ishiq.net

آذربایجان ادبیات و اینجه‌صنعت سایتی

ازیلن‌لر ازیرلر! (۲)

سولماز جمالی
www.ishiq.net

آذربایجان ادبیات و اینجه‌صنعت سایتی