چئویرن: سولماز جمالی
ترجمه: سولماز جمالی
سولماز جمالی

اونون رنگی آوازیمیشدی …
دیز-دیزی سورونسه ده هاراسا قاچماق ایسته‌ییردی؛ آغارمیش اوزونده آغزی اییلیر گؤزلری آخیر نفسی تینجیخیردی.
بیرآز سونرا چیغیرتی‌لار عذاب ایچینده چیرپینیب اینیلده‌‌ین اینسانین سسینه چئوریلدی. نفس کسن ناله‌لری یئری ده یاندیریردی گؤیو ده.
پیچیلتی گزیردی، نیفرتدن سس‌لری اسیردی.
-حتمن اوزوقارا چیخیب …
-سنین آغزووی جیررام …
هر طرفدن یوزلرله گؤن قاییش قورخونج فیسیلتی‌لا گؤیه قالخیب شاققیلتی‌لا اونون اوز-گؤزونه، بدنینه ائنیردی. بیری قاییشین توققاسی‌لا اونون قان ایچینده اوزه‌‌‌ن اوزونه چیرپدی.
قان اوز-گؤزومه چیلندی. دیکسینیب بیر آددیم گئری آتیلدیم. ائله بیل بیری یئری آیاغیمین آلتیندان چکدی بیر باشقاسی دا عئینی آندا گوجو دیزلریمدن آلدی. اللریم‌له قولاقلاریمی کیپ قاپادیم؛ اینیلتی سنگیمیردی …
مینی‌بوسون آیناسیندان آسلانان چیرکه باتمیش قولچاق گوله‌رک آتیلیب دوشور. ماشین شهرین بیتمک بیلمه‌‌ین چالا چوخورونا دوشدوکجه تاققاتوروق سسی داها دا چوخالیر؛ قولچاق‌‌لا برابر بیز ده یئریمیزده شیدتله سیلکه‌‌له‌‌نیریک.
مینی‌بوسدا مندن باشقا تکجه ایکی قادین وار ایدی. اوچوموز ده باشدان آیاغا قارایا بورونموشدوک؛ ماسکلاریمیزی دا تاخیب لاپ ائله عمللی-باشلی قاراچی‌‌لارا اوخشامیشدیق.
یاشادیغیم یئردن آیری شهره مینی‌بوسلار بیر ده مینیک ماشین‌لارلا گئتمک اولور. قادین اولدوغوم اوچون کیچیک ماشین‌لا گئدیب گلمه‌یی عاغلیمین اوجوندان بئله کئچیره بیلمزدیم.
پرده‌نی کنارا ییغیب شهریمه باخیرام. آلچاق دیوارلی کهنه توکانلار گؤزومون اؤنوندن سورعتله سوووشور؛ مسجیدلر، چؤرکچی‌لر، باققاللار … بو شهرده اوره‌یین ایسته‌دیکجه باققال وارایدی، اوره‌یین ایسته‌دیکجه گؤزه‌للیک سالونلاری؛ هر آددیما بر-بزه‌‌ک وساییلی ساتان توکانلارا راس گلیردین آنجاق؛ بیر موزیک مرکزی، رساملیق کیلاسی، تئاتر سالونو؛ بوتونلوکله هنره عایید اولان هئچ بیر ایزی گؤره بیلمزدین بو شهرده …
کئییمیش قیچیمی دار-دودوک اوتوراجاقلارین آراسیندا بیرآز ترپه‌دیب الیمی پنجره‌نین تینگه‌سینه سؤیکه‌ییرم؛ آیاقلاریم قوروموشدو.
مینی‌بوسون شوفئری رنگی روفو گئتمیش فیلاکسیندان اؤزونه چای تؤکرکن بؤیرونده اوتوران کیشی‌یه دانیشیر:
-گونلرین بیر گونونده بیر کیشی گئدیر ات آلماغا؛ قصابا دئییر منه یاریم کیلو ات چک. بو طرفدن باشقا بیر کیشی گلیب دئییر: منه اون کیلو مال اتی، اون کیلو قویون اتی، بئش کیلو دا دؤیمه اتی چک. اول‌کی کیشی مات قالیر. گودور طرف اتین آلیب گئده سورا قصابدان جریانی سوروشا. باشووی چوخ آغریتمئییم، خولاصه کیشی اتی آلیب گئدننن سورا قصابا دئییر: قارداش بو کیمیدی؟ نئینیردی بو قدر اتی؟ قصاب چؤنوب دئییر کی آدی ربعلی‌دی، بو اوچ دنه آروات آلیب اوچو ده دول، اوچونون ده اری وارلیمیش؛ ایندی بو بئله الله‌ین گونون گؤرور. کیشی چؤنور دئییر: منه ده اون کیلو مال اتی چک اون کیلو دا قویون اتی. آلیب گئدیر ائوه؛ آروادی ائبئله اتی گؤرجه‌یین مات قالیر. سوروشور کی بئبئله اتی نئینیرسن کیشی؟ احسان وئره‌‌جکسن؟
کیشی قاییدیب دئییر: ربعلی یئیینجک اؤزوم یییه‌‌رم.
مینی‌بوسداکی کیشی‌لرین هامیسی برکدن گولوشدورلر. هره‌سی بیر آتماجا آتیب اؤز خیاللاریندا مزه‌له‌نیب داها دا شاققیلداییب گولدولر.
-جاااااااااان …
-گؤر او کیمدی هاااا … اوچ آروااات …
-بختور باشووا ربعلی … الله بیزه ده یئتیرسین اولاردان …
شیرتیلانماق اوچون اللرینه لاپ چم دوشموشدو.
گؤزلریمی چؤله زیلله‌‌ییب اؤزومو ائشیتمه‌‌مزلییه وورسام دا ایستر-ایسته‌مز دوداغیمین دریسینی دیشیم‌له قوپاریردیم. دیشیمی-دیشیمه قیسیب شالیمین قارا ساچاقلارینی بارماغیما دولاییب آچیردیم.
اونلارا باخماسام دا باخیشلارینی اوزه‌ریمده حیس ائدیردیم؛ دوداغیم بئله قاچمامالی‌ایدی. یان-یانا اوتوران ایکی قادینا گؤزوم ساتاشیر؛ عصبی-عصبی لئچک‌لری‌نین باغینی داها دا برکیدیب یئرلرینده قورجالانیردی‌لار.
کیمسه آرخادان آستادان قادینلار حاقدا چیرکین بیر سؤز ایشلتدی، باشقا کیشی‌لرین آستا هیریلتیسی مینی‌بوسو چولغالادی. شوفئرین اوزونو مینی‌بوسون قاباق آیناسیندان گؤروردوم. او گولوب-گولوب قفیلدن گؤزو قیزی‌نین شکیلینه دوشدو؛ بوغازینی آریتلاییب جدی گؤرکم آلدی و قارا بوغونو آلت دوداغی‌‌لا اوینادا-اوینادا درین فیکره دالدی.
شوفئرین اوزبه اوزونده فرمانین آرخا طرفینده شیشه‌یه یاپیشدیریلمیش قیز اوشاغی‌نین شکیلی بایاقدان اوزومه گولومسه‌ییردی؛ اونون پامبیق کیمی یوموشاق ساچلاری سول گؤزونون اوزه‌رینه تؤکولموشدو. ساغ الینی چنه‌سی‌له یاناغی‌نین آراسینا قویوب بیرآز باشینی ایمیشدی.
اونون گؤزلری تئز-تئزی دیغیرلانیب ایشیق کیمی پار-پار پاریلدایاراق قیزی‌‌نین شکیلینه جالانیر؛ باخدیقجا ایچی کئچه‌‌رک قیمیشیر.
قیزیمنان آیری قالماغیم اولدوقجا اوره‌ییمی سیخیردی.
آغلاماییم دئیه پیرتلاشیق دوشموش قولاقلیغی چیخاریب ساهمانلایاندان سونرا موبایلا قوشورام.
گؤزلریمه لاپار-لاپار گونش دییب سوووشور.‌ گاه آغاج‌لارین، تیکینتی‌لرین دالیندا گیزله‌نیر گاه گؤزلریمه شاخیر.

شیلانکی کردی‌نین قیراغینا قویور؛ بایاقدان حیه‌طده اکدییی بی‌بری، تره‌نی سولاییردی. قاشقاباغی یئردن گئدیردی. تئز-تئز نفس آلیب وئردییندن، اؤز-اؤزونه دیلی‌نین آلتیندا میرتلانماغیندان حیرصلی اولدوغونو بیلیرم.
-ایستئییرسن تک زنن خایلاغی هارا گئده‌سن؟ باشووا هاوا گلیبئه سنون … ائله اوغول ایستئییرم گئده‌‌سن.
یانیمدا پیلله‌ده اوتورور؛ چیین چیینیمه. نفس‌لری‌نین سسینی ائشیدیرم. هله ده دونقولدانیر …
گئتمه‌ییمی قولاغی چالمیشدی. اوزونون قیزارتیسینی باخمامیش دا گؤره بیلیردیم. هله هاراسیدی؟! بیرآزدان تضییقی ده قالخاجاقدی؛ آخ-وای ائلییه-ائلییه آلنینا یئکه پله‌هلی لئچه‌یینی ده باغلاییب منیم قاباغیمی آلماق اوچون هئچ بیر ایشدن، سؤزدن چکینمه‌‌یه‌‌جکدی. سوندا ایسته-دییی سونوجا وارمایینجا داها اؤنملیسی الی بیر شئی توتمایینجا گؤزونو یوموب آغزینی آچماق اولاسیلیغی دا یوکسک اولاجاقدی.
هردن بیر یونگول یئل اسیر. گونشین ایشیغی آستا-آستا ترپه‌نن یارپاقلارین آراسیندان اوز-گؤزومه دوشور. یئل یارپاقلارلا رقص ائدیردی؛ دیوارا قونان سئرچه‌لرین قانادلاری‌لا توکلرینی قاباردیردی.
-گئده‌جم.
دوغولدوغو گوندن آناسیندان آییریب اللریمیزله بؤیوتدویوموز ایت‌‌یمیز حیه‌‌طین اورتاسیندا اؤز کؤلگه‌‌سی‌‌له اویناییب آتیلیب دوشوردو. حیه‌طیمیزده شنلیک وارایدی ائله بیل.
منه ساری چؤنمه‌یینی حیس ائدیرم. گونشین ایستیسیندن قورونماق اوچون ساغ الینی آلنینا دایاییب گؤزلرینی یاری‌‌آچیق یاری‌‌یومولو منه دیکیر.
– باری قیزینی دا آپار. ارین دای بونو قبول ائله‌مز.
حیه‌‌طده بیر ییغین قومون اوستونده تک باشینا اوینایان قیزیما باخیرام. باخیشیمی حیس ائدیرمیش کیمی بیر آن چؤنوب اوزومه گولومسه‌ییر. الیمی دوداغیما آپاریب اونا اؤپوش گؤندریرم.
-سیز دیللنمه‌سؤز او هئچ نه دئمز. قیزیمی دا عؤمرومون آخیرینا کیمی بئلیمده داشییا بیلمه‌رم. گؤیلوم ایستئییر دوستومون تویونا تک گئدم. اونو آپارسام ال آیاغیما دولاشار.
-هئچ توشو یوخدو کی تکووه دوروب گئده‌‌سن. باخ منیم چؤله گئدن سؤزوم اولماز. قدیم‌نن دئییب‌لر پالازا بورون ائل‌نن سورون. سنی تک گؤرن دییه‌جک گؤره‌سن هارا گئدیر، آدین دیللره دوشسه گونون قارا اولار.-ایشاره بارماغینی قاتلاییب اوجونو آغزینا سالیب برکدن دیشله‌ییر، باشینی بوللاییر،- الله سن گؤرستمه.
ایش ایشدن کئچدیینی آنلادیغی اوچون آروادین آز قالا باغری چاتلاییردی. گئتمکده قرارلی اولدوغومو سئزیب ال-ایاغینی داغیدیردی.
فیندیق آغاجلاری‌نین آلتیندا قابیغیندان چیرتلاییب یئره تؤکولموش فیندیقلارا باخیرام. قیزیم ایندی ده الینده خیردا داش‌لا فیندیق آغاجی‌نین کؤلگه‌سینده اوتوروب فیندیقلاردان اته‌یینه ییغیر؛ سونرا بیر-بیر یئره آتیب سیندیرماغا چالیشیر.
-مننن اولسا دئییرم بو ایشدن سییریل، گئتمه … فیکرین هاردا؟! به سننن دییرم؟!
چیینیمی الی‌نین آلتیندان چیخاریب گؤزلرینه باخیرام: سننن سورا هئچ کیم دئمز. مه‌یر قادینلارین قنیمی ائله قادینلار اؤزو دییر؟! ایلله اؤز ننه‌لریمیز.
ایشاره بارماغی‌‌لا پیلله‌نین اوزه‌‌رینده نه‌لرسه چکیر: ایرئیحانین جیزیغین چکیرم با، چوخ پئشمان اولاجاقسان … من اؤلو اولوم سن دیری.
قیزیم ازیلمیش فیندیقلاری قابیغیندان آییرماغا چالیشیردی …
آیاغا قالخیب شاپ-شاپیمی شاپیلدادا-شاپیلدادا پیلله‌لری چیخیرام.
-گؤر نه تهر دالین چؤرورئه. ایشیمیزین تولیان یئرینده نم هارا ایتیر جهنمه.

گؤزومو قاققیلداییب گولن ساری ساچلی قولچاقدان آلیرام. ماهنینی ده‌ییشیب شاد بیر ماهنی دینله‌مک ایسته‌ییرم. آما موزیک لیستمده شاد ماهنی تاپا بیلمیرم.
یولون اورتاسینداکی آغ و دوز جیزگی‌لر بیتمک بیلمه‌ین تیتره‌ییش‌له گؤزومون اؤنوندن چکیلمیر.
الیمی اوزادیب پنجره‌نین قولپوندان یاپیشیرام؛ اؤزومه ساری چکیب آچیرام. پرده گؤیه قالخیب سه‌رین یئل اوزومه چیرپیلیر. پاییز، قوخوسونو دا بویاسینی دا اؤزوندن قاباق خیابانلارا، آغاجلارا چیله‌میشدی.
بوز بولودلار گؤی اوزنده حئیران‌ائدیجی شکیل‌لر دوزلدیردی‌لر.
مانتومون یاخاسینی بیر-بیرینه یاخینلادیب بوزوشورم. سویوق جانیما ایشله‌ینده شیشه‌نی چکیب اؤرتورم.
دمیرچی کندینه یئتیشنده چوخ یاخین آما او قدر ده اوزاق کندلره باخیرام. گؤزلریم یول چکیردی … اورالاردا نه‌لرسه آختاریردیم …
الیمی قالدیریب چوخ چیرکلی اولدوغوندان اصیل رنگی بیلینمه‌ین قالین پرده‌نی سالیرام.

او دورمادان قیشقیریر، زاریییر، اینیلده‌ییر: وورمئیین … وورمئیییین …
نفسی ایته-ایته آغلاییردی. باغلی گؤزلریندن یاش یئرینه قان آخیردی.
اونلار ایسه آجیقلی میریلتی‌لا قاییشلاری داها برک هرله‌دیب اونون اوز-گؤزونه ائندیریردی‌لر. هر نه قدر چابالاییردی‌سا دا یئنه قاییشلاری توتان اللرین اوز-گؤزلرینی گؤره بیلمیردی آنجاق؛ یان دیوارا یانسیمیش دئوه بنزرکؤلگه‌‌لرین فرقینده‌‌ایدی.
اونو دؤوره‌له‌ین بوتون اینسانلارین داورانیشلاری اولدوقجا سرت‌ایدی. دهشتلی سوکوت هر یانی چولغامیشدی.
کیمسه آغلامیردی …
کیمسه قیشقیرمیردی …
کیمسه آجیمیردی …
کیمسه‌‌نین اوره‌‌یی یانمیردی …
قاشقاسینداکی نبضی شیدتله زوققولداییردی.
دهشت دولو فیلم‌لری آندیران نفس کسن آنلاری گؤردویونه اینانمیردی.
هر آن یئره سریله‌جه‌یینی حیس ائدیردی؛ آیاقدا دورا بیلسین دئیه الینی آتیب کیمی‌سه، نه‌یی‌سه توتماغا چالیشدی. چؤنوب ال آتیب قولونو توتدوغو آداما باخدی؛ اونون گؤزلرینده گوناه قاققیلداییب گولوردو …
دیلینی ترپه‌‌دیب نه‌‌سه دئمک ایسته‌‌دی آنجاق آغزی‌نین سویو چکیلیب دیلی قورویوب داماغینا یاپیشمیشدی.

تر-تمیز پاریلدایان پیلله‌لری بیر-بیر چیخیرام، اوزون دابان باشماغیملا آیاق باسیرام پیلله‌لره.
چؤل قاپیدان گیرن کیمی ماهنی‌نین گرومپ-گرومپ اوجا سسی منی قارشیلامیشدی؛ ریتمی سومویومه دوشوب اللریم اؤز-اؤزونه گؤیه قالخمیشدی؛ ائله پیلله‌لرده بیر دؤور فیرلانیب سؤزباز گؤزلردن ایراق بیرآز اوینامیشدیم. نه ده اولسا ایچه‌‌ری‌ده اؤزوم اولا بیلمه‌یه‌جکدیم، ایچیمدن گلن کیمی راحات اولمایاجاقدیم.‌
بیرآزدان ماهنی‌نین ائتکیسینده بیتمک بیلمه‌ین تیتره‌ییش و هیجانلا دینگیلده‌یه-دینگیلده‌یه سون پیلله‌یه آیاق باسیب دریندن کؤکس اؤتوردوم. بو منیم ایلکیم‌ایدی؛ ایلک اؤزگورلویوم. دادینی چیخارمالی ایدیم.
سالوندا گؤز گزدیریب بیزیمکی‌‌لری آختارماغا چالیشدیم. فاطیمه سالونون ساغ کونجوندن الینی قالدیراراق بیرآز دا آیاغا قالخدی. اونلارا ساری یورویه‌رک گؤردویوم تک-توک تانیشلارلا دا آیاق اوستو سالاملاشدیم. هر کس اؤزونه بیر مامیلی‌ماتان اولوب گؤزلری قاماشدیریردی.
دوستلاریم دییرمی ماسانین آرخاسیندا اوتوروب دئییب گولوردولر؛ اونلار‌لا گؤروشوب فاطیمه‌نین سول یانیندا بوش اوتوراجاقدا اوتوروب حاللارینی سوروشدوم.
بو آرادا سارایی باشدان باشا سوزه‌ره‌ک چانتامی یانیمداکی بوش اوتوراجاغین اوزه‌رینه قویدوم سونرا آیاغا قالخیب مانتومو دا چیخاریب کوره‌‌کلییندن آسدیم.
ایلک گیریشده بی‌له گلینین اولدوقجا گؤزل سوسلنمیش ماسالاری باخیشمی اؤزونه ساری چکیب آپارمیشدی؛ بیر ده چؤنوب اؤزل ماسایا و بوش اوتوراجاقلارا باخدیم. اوراسی گوللر سارایی ایدی. باشلاری‌نین اوستونده تاواندان آسلانان ایشیلتیلی لوستر او اؤزل مکانی اولدوقجا چکیجی ائتمیشدی.
دوستلاریمین آراسیندا قیزغین دانیشیق گئدیردی. اونلار هئچ بیر دورومون دانیشیقلارینا انگل اولماسینا ایذین وئرمه‌ییب ماهنی سسی اوجالاندا قیشقیراراق دانیشیردی‌لار، سوسدوغوندا دا پیچیلتی‌لا، قاش گؤز اویناتماقلا. آغیز دئیه‌نی قولاق ائشیتمیردی. بیرآز اوزلرینده گؤز گزدیریرم. قیزلاریمیز گئت-گئده بیر-بیرینه چوخ بنزه‌مه‌یه باشلامیشدی‌لار. دیک بورونلار، اوزو یوخاری قاشلار، رنگلی لنزلر، پیرتلامیش دوداقلار … دئیه‌سن یاخین گله‌جکده اونلاری تکجه سس‌لریندن آییرد ائله‌مک مومکون اولاجاقدی.
-هه دئییردیم، قایین آروادیسی بی جینگیلینمایا دوشوب هااا گل گؤره‌سن. او دا من گئتدیگیم آراییشگاهدئیدی. ایچه‌‌ری گیرجه‌یین آرایشگره دئدی منی بئله بزه تالاردا بارماغنان گؤرستسینلر.
فاطیمه الی‌نین ایچ طرفینی ادا ایله دانیشان نسرین‌‌ین اوزونون اؤنونده ترپه‌دیب سوسماغینی ایسته‌دی: هله او هایدی هایدی‌دا چؤنوب منه نه دئسه یاخجیدی؟.- او گؤزلرینی بیزیم اوچوموزون آراسیندا گزدیردی،- دئییردی او قدررر گزدیم بازاری دئدیم گرک مجلیسده تک من پاریلدییام. هم باهالی پال پالتاریمنان هم باهالی بر-بزه‌ییمنن، قیزیللاریمنان. اوره‌‌ییمده دئدیم آغزین تؤکولسون سانکی بیز سنین قارین آغرو بیلمیریک.
بو سؤزلری فاطیمه قاتی هیجانلا دئییردی، آرادا گؤزلرینی سوزوب اونون آغزینی دا اییردی. اونلاری دینله‌یه-دینله‌یه بیر-بیرینه دانیشماغا آمان وئرمه‌دیکلرینی، دیدیشمکلرینی گؤروب آینازلا باخیشیب گولوشوردوک.
نسرین باشینی آستا-آستا ترپه‌دیب اونون سؤزونون قوتینده کوپپوش اللرینی بیر بیریندن آرالی ساخلادی: هله بی پیتدیغا دؤنوب هااا، دوز بو ائنده، یانی اینان بو تالارین قاپیسیندان کئچمز.
قفیلدن ماهنی اوجادان ائله سسلندی کی سس‌اوجالدیجی‌لارا یاخین اولانلار دیک آتیلدی‌‌لار.
نسرین الینی قولاغینا قویوب بیر گؤزونو یومارکن قیشقیردی: بی تاج دا قویوب باشینا گل گؤره‌‌سن … یانی گلین زات مئیدانی دییر ده باجی.
باخیشیم بیر آن باشینداکی یئکه‌پر تاجا سوروشور؛ گولومسه‌ییرم. خیردا گوزگوسونو ماسانین اوستوندن گؤتوروب ایری دوران تاجینی دوزلدیر.
-آز هله هاراسیدی. دوز دئییبلر یئمیشین یاخجیسین چاققال آپاریر. گؤر او قیبیل کیشی کیمه قیسمت اولوبئه؟! چاققالا اوخشار آروادا، کیشی‌ده بی پول وار بی پول وار، یئریم ده یانیر گؤیوم ده. آروات بی رومانتویی سالیب آیاغی‌نین آلتینان سورونور. خالخ دا اره گئتدی بیز ده.
آیناز بو سؤزو دئیرکن اللرینی آچیب بویون‌‌باغین اوزونلوغونو گؤرستدی سونرا میوه قابیندان آلما گؤتوروب حیرصلی-حیرصلی سویماغا باشلادی. قاپ-قارا ساچلاری اوزونه تؤکولوب یاشینی اولدوغوندان داها آز گؤرسه‌دیردی. بوینونا نئچه دؤور دولادیغی بویون‌باغیسی‌نین ایشیلتیسی گؤزلریمی قاماشدیردی.
فاطیمه، یادینا اؤنملی بیر سؤز دوشن آداملار کیمی دولو آغیزلا باشینی ترپه‌دیب بیر الینی یومرولئییب آغزی‌نین اؤنونو توتدو بیر الینی ده گؤیه قالدیریب بیرآز گؤزله‌مه‌میزی ایسته‌دی. سونرا بیردن قیشقیریب منه ساری چؤندو: واااای ساناز … سنه دئیه‌جم گلینیمیزین جئهیزیندن، سن دونن یوخیدون کی جئهیزگؤردوده،-او الینی قالدیریب بارماقلاری‌لا هایلایت اولونموش ساچلارینا اینجه‌لیکله توخوندو؛ یاشیل لنزین آرخاسیندا گیزله‌‌تدیی قارا گیله‌‌لرینی بیر نئچه سئری ترپه‌‌دیب داوام ائتدی: من ائوه کئچدیم به دئدیم عتیقه زات توکانینا گئتمیشم. ایلاهی نه وساییل‌لر نه وساییل‌‌لر. هامیمیزین آغزی بئله،- آغزینی یاریم-آچیق آچیب گؤرستدی،- آچیق قالمیشدی. یانی او کی وار اللری جیبلرینده اولوب ده، قیزیرغانمئییبلار اصلا.
او بیرآز اییلیب آینازین سویوب دؤرده بؤلدویو آلماسیندان بیر تیکه گؤتوردو.
نسرین او یان بو یانی سوزه-سوزه ساختا اوزون کیرپیک‌‌لرینی بارماقلاری‌لا تومارلادی: دای اؤز آرامیزدی گرک ده جئهیزی قشح اولوردو ده. ایندی دوزدو دوستوموزدو ولی دای قالیق حساب اولوردو، تورشوموشدو. بو یاننان دا آخی آی باشووا دؤنوم نه بیر فرلی-باشلی قیر-قیافه‌‌سی وار نه دوز-عمللی ات-اندامی. والله گئنه ساغ اولسون بو کیشینی، من دئییردیم دای هئچ کیم قاپیلارین دؤیمز.
دانیشیق طرزینه دوداغیم قاچسا دا ساغ الیمی قالدیریب شوخلوغا قاشلاریمی چاتدیم: اوووف قیزلااار انگیز قیزیشیب ها؛ بو گون او کی وار گه‌وه‌زه‌له‌دیز، سانجیلیبسوز صندلییه. دورون … دورون بیز ده تیتره‌‌دک.
نسرین آیاغا قالخا-قالخا گؤزلرینی سوزدوررک دئییندی: دیلیمیزی قویاق قارنیمیزا دا هه؟
چؤنوب گولومسه‌یه‌رک یاری ساری-یاری گؤی رنگه بویامیش ساچلارینا زیللندیم، دیشلریمی آغارداراق: بئله آز-مازئه. ایشیمیزه گوجوموزه باخ ده، اولماسا آجیغووی منه تؤکرسن!
نسرین آغزینی آچیب «زهرله‌دون دنه بیزی» دئیه‌رکن فاطیمه اوجادان آسقیردی، تئز اللرینی قالدیردی: ایلش ایلش صبیر گلدی.
قاشلاریمی قالدیریب لاپ-لاپ اوزلرینه باخدیم. اوچو ده قاییدیب یئرینده اوتوردو.
فاطیمه الینی بئلینه قویوب زاریدی: قیزا هئچ من اوینییا بیلمرمئه، هله ده قارنیم تؤکولور، بو میراس قالمیش ساکشن نه چتین‌ایمیش، برکدن آسقیراندا دوز اؤلورم.
نسرین بئزمیش آداملار کیمی اللری‌له قولاقلارینی قاپاییب گؤز قاپاقلارینی اؤرترکن آیناز دا گؤزونو سوزدوروب دیلی‌‌نین آلتیندا،-سیختیمیزی سیویردین دای. سن ده بئکار قالمیشدون.-دئیه میزیلداندی.
فاطیمه‌‌نین اوزو دؤندو؛ موبایلینی الینه آلیب مئساژ یازارکن بیر یاندان دا آلتدا قالماماق اوچون سرت بیر شکیلده جوابلارینی وئردی: دیل آغیز ائله‌‌میسوز باری باش‌‌آغری دا وئرمییون.
قیزلار بیر-بیرینه دیمه‌سین‌لر دئیه گولومسه‌یه‌رک گؤز ووروب اوجادان دیللندیم: یاخجی دای زیر گئتمییون گؤرک بی … هه دئیین گؤرک هاردا قالمیشدوز؟

اونا باخا-باخا گلینه دغرو گئتدی. یئنه آیاق ساخلاییب باخدی. حولقومو ترپنه-ترپنه بیر ده دؤنوب باخدی. بیرآز سونرا گرگین-گرگین الی‌له تزه‌جه جوجرمیش ساققالینی تومارلاییب فیکیره دالدی. گؤزآلتی اونون لئچک‌له برک-برک اؤرتولموش ساچلارینا، هاماردا قالان آغ بودلارینا، بزه‌‌کلی اوز-گؤزونه باخدی.
بی‌یین یاراشیقلی اوزو کدرله دولور، ائنلی قاشلاری چاتیلیر توتقون صیفتی بیرآز داها توتولوردو؛ اونا ائله باخیردی سانکی او دونیاداکی تک قادین‌دیر. او دفعه‌لرله یئرینده قورجالانیب قرارسیز الینی خیرتده‌یینه آتیب کراواتی‌نین دویونونو بوشالتدی.
سؤزسوز، صحبتسیز، دیلسیز باخیشلاری سس‌‌سیزجه باغیریردی؛ اونلار اوره‌‌ک چیرپینتیلاری‌لا دانیشیردیلار. قاداغا اولان سؤزلری، حیس‌‌لری ائله آزاد دئیه بیلیردی‌لر بیر-بیرینه کی بو اوغرون باخیشلار.
او قاباغیندا ناز و عشوه ایله رقص ائدن گلینینه یوخ منیم بؤیرومده دوروب قیزارمیش اوزو ایله کؤنولسوزجه ال چالان قادینا باخیردی. بی‌له گلینی دؤوره‌له‌ییب اونلارین رقص‌لرینی ایزله‌ییردیک؛ اللریمین ایچی قیزاراناجان ال چالیردیم.
آنجاق کار اولماق ایسته‌‌ییردیم، کور اولماق ایسته‌‌ییردیم …
گؤزلریمی یوموب دیلیمی دیشله‌دیم؛ کیرپیکلریمی آرالادیغیمدا هر شئیی اونوتدوغومو اوموردوم آنجاق بؤیرومده دوران قادینین هوسدن یانان اوره‌یینی الینه آلیب ایچینده بار-بار باغیرماغینی گؤردوم.
او سس‌سیزجه چیرپینیردی؛ اونا گؤره ده گؤزلری دولوب-دولوب بوشالیردی. یاش دولو ساختا کیرپیکلرینی آشاغی ائندیرمیشدی. گؤزاوجو اونا ائله باخیردی سانکی اونون گؤزلرینده گؤردویو پارلاق ایشیغین و دونیاداکی تک اومیدی‌نین اته‌ییندن برک-برک یاپیشماق ایسته‌‌ییردی.
او، عئینی زاماندا گؤز-گؤزه اولوب پورچوم گزه‌‌ن قادین‌‌لارین معنالی باخیشلاریندان ایینه‌له‌نیردی؛ هر ایکی الی‌ ایله اوز-گؤزونو توتوب گیزلنمک ایسته‌ییردی. ایچینی چکیب اوفولدادی سونرا تلم-تله‌سیک آرخاسینی چئویریب اوتوردوغوموز اوتوراجاقلارا ساری یئریدی.
کئشکه او آنلاری قارالانان چیرکین کاغیذ کیمی خیشمالاییب بیر کنارا تولازلایا بیلیردیم.

قولاغیم قیزلاردا گؤزوم ایسه اورتادا بیر-بیرینه گیریب فیت چالاراق قیشقیرا-قیشقیرا سس‌اوجالدان‌دان دویولان ماهنی‌لا برابر اوخویوب رقص ائدن قادینلاردا ایدی. اونلارین چوخونون دونلاری‌‌نین آلتیندان گئیدیکلری قارین‌‌باغینی بیر ده بعضیسی‌‌نین اومبانی دیک گؤسته‌‌رن شورتلاردان گئیدیک‌‌لری گؤزه چارپیردی.
باخیشیمی اونلاردان آلیب بیرآز دا کالاغایی‌لاری‌نین اوجونو بورونلارینا ساری قالدیریب یاشماقلانمیش قاری‌لاری، یاشلی‌لاری سوزدوم؛ قادینلارین اوست-باشلارینا تعجبله باخیب دیللری آلتدا اونلاری آجیقلی-آجیقلی سؤیوردولر.
قاققییلتی قوپدو، قیزلار گولوشدولر؛ بیر آن بئله دیل بوغازا قویموردولار.
نسرین اوتوراجاغین کوره‌‌کلییینه سؤیکه‌نیب قارنی اسه-اسه قاققیلداییردی. اولدوقجا یئکه قارنی ماسانی ییرغالاییر ماسانین اوستونده‌کی بشقاب قاشیقلار بیر-بیرینه دییب جینگیلده‌ییردی. او، اورتادا اوینایانلارین آراسیندا دونونون زیپی قاچمیش بیر قادینی گؤسته‌‌ریب شاققا چکیب گولوردو.

گؤزله‌نیلمه‌دن آمانسیزجا عاغلینا شیغییان جوربه‌جور سس‌‌لردن اؤزونو ایتیردی.
-من گؤیچه‌‌گم … منیم قیزیلیم چوخدو … سنین ائله ارین ده چوخدو، سانییاق؟ ممد، بهرام، شهروز … اونون خیردا قیزی دا خارابدی …
چؤنوب دوستلارینا باخدی؛ عئینی زاماندا واهیمه‌دن نفسینی ساخلایا-ساخلایا الینی اوره‌یی‌نین باشینا قویوب قولاقلارینی شکله‌دی:
-اونون اوغلو عیاشدی … من پوللییام … سنین آدین کیشی‌لرین آراسیندا گزیر، تک آدین یوخ ائله اؤزون ده … من اوغلان دوغموشام سن قیز … بئبئله قیزیلی گؤر کیم سالیبئه، دریسی بیر تومنه دیمیر.
دارتیشمالار داواملی تکرار اولسا دا سس‌لر فرقلی‌ایدی؛ بعضیسی نیفرتله، بعضیسی قاققیلتی‌لا؛ اونلارین ات تؤکن هیریلتیلی گولوشلری قولاقلاریندا عکس-صدا وئریردی.
توکو اورپه‌شیر، اتی قاباریردی. بیرآز هورکوب اؤزونو ییغیشدیردی.
-سن خارابسان … گؤره‌سن نجور اؤزومو بونون ارینه گؤرسه‌دیم؟شارژ پولومو کی قوپاردارام … سن آلا ایتدن ده مشهورسان …
آنسیزین چؤنوب یئنه هنده‌ورینده اوتورانلارا باخدی. ایچینده‌‌کی سس‌‌لر گئت-گئده یوکسه‌‌لیردی. گیرینج قالمیشدی؛ قورخودان یاواش-یاواش آیاغا قالخیب چیغیراراق باشینی گؤتوروب قاچماق ایسته‌‌ییردی.
بیر آن « بلکه دوستلاریم مننن ظارافات ائلئییرلر» دئیه ده دوشوندو.
دانیشیقلار بیر بیرینه قاریشیردی؛ قولاق کسیلدی: دای منه ده شیشمه کی، ارین دؤرد گون قاباق منیم قوجاغیمدئیدی … بورنو دیک قحبه … اوتوروب اوردا-بوردا دالیمجا چوخ خارابدی خارابدی دئییرسن، هله کی سنین اوغلون بو خارابدان ال چکمیر …
ایچینده حددیندن آرتیق بوغوشمالار گلیب کئچیردی؛ بوغوق قیشقیرتی‌‌لار سوسموردو. سانکی سینه‌لرینه دؤیوب یاخا جیرانلار دا وارایدی، قارغیش تؤکنلر ده. سارایین دیوارلاری، ستونلاری، اوتوراجاقلاری، ماسالاری آراسیندا سس-کویون چوخالدیغینی حیس ائدیردی؛ سس‌‌لر باشینا دوشوردو …

گوزگوده‌کی قادینین حئیران ائدیجی گؤزللیینه، پاتلئتینه باخدی. ساغ الینی قالدیریب بارماقلاری‌لا بو گئجه‌یه اؤزل بزتدیرمیش قیویرجیق ساچلارینا توخوندو، بیرآز ساهمانلاییب بو سفر یاناقلارینا باخدی. ایشاره بارماغی‌لا یاناقلارینا سورتدویو توند چؤهرایی اه‌نلییی (رژ گونه) قولاغینا ساری یایدی. دوداغینا سورتدویو قیرمیزی بویانی تزه‌له‌ییب بو سفر گؤزل اندامیندا اوتوران باهالی یاشیل دونونا باخدی؛ ساغ بودونو دیزیندن ده بیر قاریش یوخاری آچیق اولان دونوندان سوزدو. بو گئجه دوغرودان دا پاریلداییردی.کیمسه‌نین اوندان باش اولمایان دیش گؤرونوشونو بیلیجیلیی ایله آنلایان قادین بونو آچیقجا گؤرسه‌دیب بوتون آتماجالاری قولاق‌آردینا ووروب گؤزلری غروردان ائله پاریلداییردی کی هامی ال-آیاغا دوشوب خیردا گوزگولرینی گؤتوروب اوز-گؤزلرینی بیر داها ساهمانا سالماغا باشلادی‌لار. اونلار سینسی و پاخیل باخیشلاری‌لا بیر-بیرینی کسیب دوغراییردی‌لار.

دال‌با دال اویون هاوالاری سسله‌نیردی؛ اورتادا ایینه آتماغا یئر یوخیدی. قادینلار باشدان آیاغا ایشیم-ایشیم ایشیلداییردیلار؛ اورادا ائله بیل قیزیل توکانی آچیلمیشدی.
قادینلاردان بیری لاپدان آغزینی آچیب قاققیلدایاراق گولدو؛ اونون قارا کؤتوکلرله دولو دیش اتلرینی، عئیبه‌جر گؤرکه‌مینی گؤروب دیکسیندی. ساختا گولوشلری دوداغینا قوناندا چوروک دیشلری پار-پار پاریلدایان قیزیللاری‌لا غریبه پارادوکس یارادیردی؛ آغیز حیصه‌صینی سانکی ایت قاپمیشدی.
اونلار قاباق‌‌قاباغا اوینایا-اوینایا دانیشیب گولوردولر. دیشاریدان ویترینده‌‌کی مانکن‌‌لره بنزه‌‌سه‌‌لر ده هرساختا گولوشون آرخاسیندا ابدی بیر حسدله یاناشی آشاغیلاییجی، فورسلو باخیشلاری نیفرت ساچیردی.
آرتیق دورومو آنلامیشدی. قادینلارین سؤزلو باخیشلاریندان، لال دوداقلاری‌‌نین آراسیندان سیزان سؤزلردن و بئیینلرینده‌کی گیزلین فیکیرلریندن دهشته گلیردی. خوشو گلسه ده گلمه‌سه ده ، اینجیسه ده اینجیمه‌سه ده اونلارین اوره‌یی اونون قارشیسیندا ورق-ورق آچیلیردی.

سارایدا اود یوندوران اوغلان اوشاقلارینی گتیریب زورلا گلینین قوجاغیندا اوتورتدولار. اود-یالوو قیز اوشاقلاری دا سئوینجک آتیلیب دوشه‌‌رک گلینه ساری قاچدی‌لار؛ گلینین قوجاغیندا اوتورماق ایسته‌دیکده قاین‌آناسی اونلارین قاباغینی کسیب جوجه سوروسونو کیشله‌ین کیمی کیشله‌دی. سونرا دا قیزاریب بوزاراراق بوغازینی جیرا-جیرا: بو« قیز» دوغماق اوستونده منی چوخ ایینه‌لئییبلر، نه باشوزو آغریدیم آخی … الله قویسا دوشر‌لی اولار.-دئدی.
سونرا الینی قووزاییب اکدیردییی اوزون دیرناقلاری‌‌لا سارایداکی بوتون قادین‌لاری گؤرسه‌درک «سوبایلاریمیزا قیسمت» دئییب گلینه ساری یئریدی. اوردان-بوردان «الله موبارک ائله‌سین» سس‌لری قووزاندی.
هردن بئله شئی‌لر گؤروب، ائله سؤزلر ائشیدیردی کی هفته‌لرله مات معطل قالیردی.

گلینین الینده‌کی سبدی زورلا بارماقلاری‌نین آراسیندان چکیب ایچینده‌کی بیر ییغین قیزیل گول لچک‌لرینی گؤیه سووردولار …
ایلک باخیشدا گؤیدن تؤکولن کاغیذلاری گؤردو. اییلیب قارا پارچاینان اؤرتولموش قبیرین اوستونه دوشموش بوز کاغیذی گؤتوردو. گلینین اؤلوم اعلامیه‌سی‌ایدی؛ اونون شکیلی‌نین یئرینه قیزیل گول عکسی وورولموشدو؛ گؤزلری شکیلین و یازی‌لارین آراسیندا گئت-گلده ایدی: آتاسی‌نین عزیز قیزی، قایناتاسی‌نین عزیز گلینی، اری‌نین عزیز آروادی، قارداشی‌نین عزیز باجیسی، عمیسی‌نین، داییسی‌نین …
اونو دوغان بیر قادین وارایدی‌می گؤره‌سن؟! یاخود باجیسی!؟ خالاسی! بیبیسی! یئزنه‌لری‌نین آدی یازیلمیشدی و سن اونلارین ساییسیندان نئچه باجیسی اولدوغونو بیلیردین. ائولنمه‌میش باجیسی نئجه؟! اولسایدی دا بیلینمیردی، یازیلمامیشدی، داها دوغروسو ساییلمیردی.
هردن کولک قالخیردی، یئره سپه‌له‌نن گول لچکلرینی توپا ایله بیر داها گؤیه سوووروردو. کولک بیر داها قالخاندا قبیرلرین اوستونده‌کی قارا پارچالاری دا قاباغینا قاتیب، توز-تورپاق قوپاراراق گؤتوروب آپاردی.
یان-یانا یاتان ایکی قادی‌نین، آنا-بالانین شکیللرینی باش‌داشی‌لاریندا گؤردو.
قبیرلرین اوزه‌رینده‌کی یازی‌لاردان اونلارین آنا-بالا اولدوقلاری بیلینمیردی، آنجاق اونلاری تانییردی.
بیر قادین توزا باتمیش ایکی قارا پارچانی گتیریب یئنه شکیللری‌نین اوزه‌رینی قاپادی.
هامیمیز بئله غریب، دوز عمللی تانینمادان می اؤله‌جکدیک؟!

موبایلیمین صفحه‌سینی یاندیریب ساعاتا باخیرام. زامان نفسینی درمه‌دن قوشور یویورور؛ بو گئجه سانکی بیری اونو قووالاییردی دا. اؤزو ده منیم اؤزگورلوک گئجه‌مده.
بیر اوشاق قیغیلداییردی. گؤزلری یومولو اللری‌له مشقه‌له‌سینی توتوب آغزیندان چیخاریردی،‌‌ بیرآز قیغیلداییب آیاغینا سورتوب یئنه آغزینا سالیردی. آیاقلارینی گؤیده اوینادیب تپیک آتیردی. آناسی سود شیشه‌سینی بیرآز چالخالاییب الینه وئردی.
– مشقله‌سی قیزیلداندی ها …گؤردون؟
فاطیمه‌یه اؤتری گؤز آتیب یئنه اوشاغا باخدیم. اونون دانیشیغی‌نین داوامینی ائشیتمه‌دیم. او نه‌سه دئییردی؛ دوداقلاری سورکلی ترپه‌‌نیردی. آرادا باشیمی ترپه‌دیب قولاق آسدیغیمی گؤسته‌ریردیم، هردن بیر گولومسه‌ییب گؤزلرینه دالیردیم، آنجاق … آنجاق منیم اورادا اولماماغیمی بیلمیردی.
چؤنوب فاطیمه‌یه باخدیم. او آج‌گؤزلوکله اوشاغین مشقله‌سینه باخاراق نه‌لرسه دوشونوب آغزی‌نین سویو آخیردی.
یئنه منه ساری اییلیب دیشینی آغارتدی: سن ده باخ بلکه گؤزوموزون قوردو اؤلدو.
او بیرآز یئرینده چویوب اوره‌‌ک سیخینتیسیندان بئزمیش آداملار کیمی دوداقلارینی آرالاییب اوزون-اوزادی پوفولدادی: قوی ائوه یئتیشیم حسن‌ین خیرتده‌ییننن یاپیشاجام، آدی باتمیش. میلتین باش-ال-آیاغیننان قیر قیزیل ساللانیر. اونا چوخ باها باشا گله‌جک. بیزلر الله‌ین گونون گؤرمه‌دیک … هر نه بورج خرج اولدو … بئله توی‌لاردان سورا من دوز بیر هفته مریض اولورام، افسرده اولورام. اریمنن او کی وار یارالییام، تونبه‌تین دوشموشون اوغلو … بیزیمکی‌‌لرین یا یوخودو یا اولسا ‌دا کونازدی‌لار. منیم‌کی‌لر ائله طایفالیغا آجدی‌لار، اوتوکدولر … ایچیمیز اؤزوموزو یاندیریر چؤلوموز اؤزگه‌لری.
او عمللی باشلی گؤتورولوب قانی قارالمیشدی.
بایاقدان کیمین‌سه گؤزلری‌نین اوزه‌ریمده اولدوغونو حیس ائدیردیم. گؤزلری تمامی‌‌ایله اوستومده دولاشیردی. آغیر باخیشلاری‌‌نین آلتیندا نفسیم چیخمیر قاینار سویا اوخشار بیر شئی آخیردی بوتون جانیما.
باشیمی قالدیریب سارایی باشدان-باشا سوزدوم. گؤی گؤز قادینین گؤزلری هاردانسا سارایین او باشیندان گؤزلریمی چکیب چیخاریردی.
او ساچی‌‌نین اوجونو بارماغی‌‌لا اوینادا-اوینادا گؤی گؤزلرینی طعنه‌ایله من‌له فاطیمه‌نین آراسیندا گزدیریردی؛ نه‌سه دئمک ایسته‌ییردی.
ایچیم اوچونوردو. الیمی قالدیریب دوداغیما توخوندوم. همیشه دوداغیمدان، بورنومون اوجوندان اوچوق چیخمامیشدان قاباق بدنیمی تیتره‌‌ییش ساراردی.
بیرآزدان گؤزلریمی جانیمی اورکودن گؤزلردن قوپارماق ایسته‌دیم آنجاق؛ پیچیلتیسینی ائشیتدیم: ارووین اویناشینان دیز-دیزه اوتورماغین دادی نجوردو؟

چنه‌سی‌نین آلتیندا قالماقدان کئییه‌‌ن الینی اووشدورا-اووشدورا اوشاغی‌نین بورون سویونو دونونون اته‌یی‌له سیلن قادینا باخدی. اوشاغی‌نین قولوندان توتوب شیدتله سئلبه‌له‌دی. بارماغینداکی یئکه قاش اوزویو اوشاغین آلنینا چیرپیلدی. اوغلان اوشاغی چیینلرینی چکیب یوماغا دؤنرکن اوتانا-اوتانا هنده‌ورینه باخدی؛ اوزونتودن چنه‌‌سی تیتره‌یه-تیتره‌یه آناسی‌نین قوجاغینا سیغیندی.
آینازا ساری دؤنوب موبایلینی ایسته‌دی؛ گئجه بویو شکیللری، فیلیم‌لری اونون موبایلی‌لا چکمیشدیلر. گالرینی آچیب ایلک ویدئونون اوزه‌رینه توخوندو؛ قورویوب قالدی. ایزله‌یه-ایزله‌یه الینی اوزونده گزدیریب بوینونا ساری آشاغی آپاردی. بوینو یوخ ایدی؛ نئچه قات پییلی، کوپپوش بوغازیندا الی گزدی. ویدئونون ائتکیسینده الینی باشینا ساری آپاریب توخوندو؛ یئکه تاجی یئنیجه بالیاژ اولونموش ساچلاری‌نین اوزرینده پار-پار پاریلداییردی. بوینونا تاخدیغی جوربه جور بویون-باغی‌لاری گؤردو، باشینی اییب کؤکسونده پاریلدایان قیزیللاری گؤردو.
او بوغولوب قالمیشدی؛ نفسی قارالیردی. گؤزلرینی بیر آن بئله ایزله‌دییی ویدئودان چکمیردی؛ یئرینده اوینایا-اوینایا فاطیمه ایله بیرلیکده ادا چیخاردان سانازا خئیلک باخدی. سانکی اؤزونو یوخ باشقا آدامی ایزله‌‌ییردی.
آغزینی آچیب نه‌سه دئمک ایسته‌دیکده چوروک دیشلرینی، گؤی لنزین اوجباتیندان قیزاریب سولانمیش گؤزلرینی موبایلین گوزگویه چئوریلمیش شوشه‌سینده گؤردو. گؤزونو موبایلدان آلیب توپپوش اللرینه، بودلارینا باخدی. گؤزل ماسکه‌لر دوشوردو آرتیق، چیرکین ایچ‌لر، اوزلر اوزه چیخیردی. ایزله‌دییی گئرچک سانازدان اییره‌‌نیردی.
موبایلین اکرانی یانیب واتساپین مئساژ قوتوسو یاشیل رنگی‌له گؤز وورارکن «دینق دینق» سسی ده قووزاندی. گؤزلری تکجه بیر آنلیق صفحه‌یه ساتاشدی …

کیشی‌لردن بیرآز آرالی اولسالار دا نفس‌لری‌نین سسینه کیمی دویوردو. اوره‌‌ک‌لری‌نین نئجه چیرپیندیغینی ائشیدیردی‌. او آندا گؤزله‌‌شن گؤزلردن باشقا هئچ بیر شئی دیقتینی جلب ائتمیردی. باش-قولاغی اوینایان گؤزلر اؤز-اؤزونه توشلاشیب باخیشلار قوجاقلاشیردی. او باخیشلار قیسا و گیزلین ده اولسا بیر بیری‌له نه‌لر کی دانیشمیردی! نه‌لر کی یاشامیردی!
گون بویو قادینین کیشی‌دن نه قدر گیزلنمه‌سی آرالانماسی اولسا دا توی شنلیکلری‌نین سون بیر ساعاتیندا هر نه ترسه ایدی.
کیشی‌‌لرین سارایا گلمک خبرینی ائشیدن کیمی هامی جوموب لئچه‌کلرینی اؤرتدو. آز قالسین گئیدیکلری یاریم مئتیرلیک دونو چیخاریب چیلپاق قالیب آنجاق ساچلارینی اؤرته‌جکدیلر.
گلین آیاغا قالخیب آرخاسینی چئویره‌رک گول دسته‌سینی سوبای قیزلارا ساری آتماق ایسته‌دی. دؤردوموز ده اونا ساری یئریییب بیر عؤمور خوشبختلیک و قوشا قاریمالارینی آرزولادیق. گؤزلریم تیترک گیله‌لرینه سانجیلدی؛ اونون گؤزلرینده اؤج آلماق ایسته‌یینده آلیشیب یانماغینی گؤروب دیکسینیب گئری چکیلدیم. او دوداغینی بئله ترپتمه‌دی آنجاق یان دؤوره‌میزین قالابالیغیندا اونون اینیلتی‌لرینی و چیلغین پیچیلتی‌لارینی ائشیدیردیم. ایچی آلووسوز یانیردی؛ هامیمیز آیری آیری اوره‌‌یینه یوک اولموشدوق.
گؤز یاشینی ایچه‌‌ریسینه تؤکه تؤکه باخیشلاری پیچیلداییردی: آدام کور دییر کی؛ دوست، دوشمان، پاخیل … یولداش … هامیسی بللیدی.
اؤلمک همیشه ساده‌جه آغ کفنه بوکولمکله اولمور کی؛ او ائله آغ دونونون ایچینده ان موتلو گئجه‌سینده کیندن، نیفرتدن، اؤج‌دن سیزیلدایاراق اؤلموشدو.
گؤز اوجو بؤیرومده دوران قادینا اؤتری باخدیم؛ قادینین گئنیش آلنیندا تر دنجیکلری پوچورغالانیر، یاناقلاری یانیب-یانیب قیزاریردی دوشونجه‌لریندن. گؤزلری هله ده دوستونون اری‌نین گؤزلرینده سومسونوردو؛ اونلارین اوره‌‌ک‌لری، روحلاری دا سومسوک‌ایدی.

آیناز قیزارمیش گؤزلری‌‌له اؤزونو ماسانین اوستونه آتیب تلم-تله‌سیک موبایلی الیندن آلسا دا اونون گؤزو نؤمره‌ده قورویوب قالمیشدی. سئیو اولونمامیش نؤمره‌نین صاحیبی نه یازمیشدی؟ «شکیل‌‌لرین چوخ انرژی وئردی منیم گؤزل قادینیم» یانیندا بیر اؤپوش ایموجیسی‌له.
اونون بیله‌‌یینده‌‌کی دؤیمه‌‌یه گؤزو ساتاشدی.
اری‌‌نین بوینونون دالیندا تزه‌‌جه گؤردویو دؤیمه‌‌نی خاطیرلادی.
اطرافینا باخدی؛ کیمسه و هئچ نه گؤزه گؤرونموردو. ائله بیل سارایی بوتونلوکله بوشالتمیشدی‌لار. قوناقلار، گلین، بی. سس‌سیزلیک سارایی بوروموشدو، اونون ایچیندن باشقا.
سارایداکی بوش اوتوراجاقلار فیسیلداشیردی. اورانی گورولتولو بیر سس‌‌سیزلیک قاپلامیشدی.
چؤلدن های-قارای سسی گلیردی. ال-آیاغی تیتره‌یه-تیتره‌یه پنجره‌یه یاخینلاشیب تول پردنی کنارا ییغیدی. بو آندا ایلک گیریشده گؤزه‌‌للییی ایله گؤزونو قاماشدیران لوسترین کیچیک لامپالاری‌‌نین ایشیغی بیر نئچه آنلیق تیتره‌‌یه-تیتره‌‌یه سؤنوب یاندی. سونرا چیرت-چیرت ائله‌‌یه-رک تمامن سؤندو؛ قارانلیق دؤرد بیر یانی بورودو.
آرخاسینی چئویریب اللری اسه-اسه پنجره‌نین ایچ طرفینه وورولموش زئبرا پرده‌نین ایپیندن یاپیشیب یوخاری قالدیردی. پنجره‌نین تایینی آچماق ایسته‌دیکده نه‌سه باغیرتی‌لا پنجره‌یه چیرپیلیب شیشه‌سینی اوووق-اوووق ائله‌دی. ایستی بیر شئیین اوزونه آخدیغینی حیس ائتدی. باشینی ایدییینده رئفلئکس دؤشه‌مه‌نین اوزه‌رینده اؤزونو گؤردو؛ اوزوندن قیرمیزی قان آخیب دؤشه‌مه‌یه جالانیردی.
هر طرفدن یوزلرله قارا قاییش فیسیلتی‌لا گؤیه قالخیب شاققیلتی‌لا گلینین اوز-گؤزونه، بدنینه ائنیردی. بیری قاییشین توققاسی‌لا اونون قان ایچینده اولان اوزونه چیرپدی …
دیقتله باخیر، دیکسینیر، دالدالی یئرییه-یئرییه اورادان اوزاقلاشیر. آلتدان-آلتدان بدنینه یئریین سویوق تری حیس ائله‌ییردی؛ اوشودوردو. قاییشین توققاسی‌لا چیرپان قادین اؤزو ایدی.
گلینین اتینی پارچالایان رنگ‌‌به‌‌رنگ ساختا دیرناقلارا گؤزو ساتاشیر.
بیری الینده‌‌کی قاییشی کنارا آتیب دیرناقلاری‌لا اونون بدنینی جیرمالاییر. باشقالاری دا قاییشلاری کنارا تولازلاییب بیر بیری‌‌نین اوستونه شیغیییرلار.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

درین بیر یارا ایزی 

سولماز جمالی
www.ishiq.net

آذربایجان ادبیات و اینجه‌صنعت سایتی

درین بیر یارا ایزی 

سولماز جمالی
www.ishiq.net

آذربایجان ادبیات و اینجه‌صنعت سایتی

درین بیر یارا ایزی 

سولماز جمالی
www.ishiq.net

آذربایجان ادبیات و اینجه‌صنعت سایتی