سیزیف افسانه‌سی
رقیه کبیری
تیققیلتی سسی ائشیدیرسن. بوٍلورسن قوْنشونون قاپیسی ایشگیللندی. گؤزلریوی آچیرسان. بولورسن ساعات آلتی یاریمدیر. قونشونون کیشی‌سینین آیاق سسینه قولاق یاتیردیرسان. بیر، ایکی، اوٍچ، دؤرد… بولورسن آیاغینی بئشینجی پیلله‌یه قویاندا، سس داها قولاغیوا چاتمایاجاق. آرخان اوٍسته گَرنه‌شیرسن. قوْللارین ساچلاریوا توْخونور. اؤز وجودوندان خوشا گلیم بیر خیشیلتی سسی قالخیر. تنبل- تنبل ساغا دؤنورسن. ساچین بالینجا سوٍرتوشور. گئنه ده بیر خوشا گلیم موسیقی ایله خوشا گلیم حیس… بو حیس عشقین ده‌یرینی سنه خاطیرلادیر. اوره‌یین سیخیلیر. هر گوٍنکو کیمی اوره‌ییوین سیخیلدیغینا قارشی گلیرسن. شیلتاق اوشاقلار کیمی جوٍت قیچلی یوْرقانی یاتاقدان یئره ایته‌له‌ییرسن. یومشاق بیر تیپپیلتی سسی. بولورسن تک- تنها یاتماغیوا اعتراض سسی‌دیر بو تیپپیلتی سسی.
«هامیدان اوّل اؤزووو سئومه‌لیسن!»
ذهنیوین سسینی آیدین- آشکار ائشیدیرسن. ذهنینده اعتراض ایله توْختاخلیق قارشی- قارشییا دایانیر. یئریندن قالخیرسان. آیاغا دوراندا دیزلریندن شیققیلتی سسی گلیر. آرتروز سسی… خوشا گلیم دئییل، آمما ایندیکی وارلیغیوین بیر پارچاسیدیر؛ ناساز چالینان بیر نوْت‌دور بو شیققیلتی سسی. ناساز چالینان نوْت‌لار همیشه یوْروجو و داریخمالی اوْلور. گئنه هر گون تکرار ائله‌دییین سؤزو اؤزووه تکرار ائلیرسن: «موزیسین اولسایدیم بدنیم ایله أشیالارین توْخونوشوندان بیر سمفونی یاراداردیم.»
دمپایی‌لاریوی گئییرسن. آیاقلارین ایله دمپایی‌لارین بیر- بیرینه سوٍرتوشور. آمما بو سوٍرتوشمه‌‌نین سسینی ائشیتمیرسن، یالنیز حیس ائدیرسن. یاتاغیوی موٍرتّب ائله‌یینده یوْرقان یومشاق یئل سسی ایله یاتاغین اوٍستونه دوٍشور. بالینجیوی تاپدالاییرسان. أللرین ایله بالینجیوین توْخونوشوندان، ده‌ریسی ایسلانمیش ناغارا سسی قالخیر.
هر گونکو کیمی تووالته گئدیرسن. سیٍار فرنگی تووالت اوٍسته اوتوروب، لذت ایله بدنیندن آخان شیریلتی سسینه قولاق یاتیردیرسان. آمونیاک‌لی اولماغینا دئییل، ذهنینده بیر چشمه‌نین گؤزه‌سیندن سو آخیر. تووالتده بو شیریلتی سسینی کشف ائدن گون او قدر هیجانلانمیشدین کی، بو سوسوزلوق زاماندا نئچه دقیقه سویو آچیق قویموشدون تا بوْش- بوْشونا تووالتین کاساسینا آخسین.
اوْووج- اوْووج سویو اوٍزووه چیرپیرسان. اینسان جانینی دیرچلدن موسیقی سسی… اوٍزووو حوله ایله سیلمک یئرینه بوراخیرسان ده‌ریوین اوٍستونده‌کی نم آستا- آستا قوروسون. قولاغین قادیر دئییل سو قطره‌لرینین ده‌ریوه نفوذ ائتمه‌سینین سسینی ائشیتسین. بونونلا بئله، ذهنینده سوسوز بیر زه‌می سویو اؤز ایچینه چکیر.
آینا قاباغیندا دایانیرسان. او ایسه لال دیلی ایله سنین گؤزلرینله دانیشیر. گؤزلریوین آلتینداکی قیریشیقلارا کِرِم یاخیرسان. سونرا تیپ تیپ تیپ… باغلی بیر صاندیغی دؤیمک کیمی یومشاق بیر سس قالخیر. کِرِم، قیریشیقلاری ایتیردیکجه، گؤزون باخا- باخا بو تیپ- تیپ، سنین ده، آینانین دا باشینا بؤرک قویور.
تاختا داراغی قیوریم ساچلاریندا گزدیریرسن. ساچ ایله داراق موسیقی‌سی… ساچ ایله أل توْخونوشوندان قالخان موسیقی‌نی اؤزله‌ییر، ألیوی ساچیوا چکیرسن. گئنه یومشاق بیر خیشیلتی سسی قالخیر. اؤز ألین اؤزله‌دییین لذتی ساچیوا وئرمیر. دوْداقلارین آینادا ترپه‌نیر. سسین اوتاغین سوٍکوتونو سیندیریب، قولاغیوا دوْلور:
«ای شانه بو گیسوی پریشانه دوْلاشما
جان ریشته‌سی وار اوردا، چکیل یانه دوْلاشما»
داراق ایسه گئنه ساچیوا دوْلاشیر… پیرتلاشیقلار آچیلیر. سن تبسّوم ائله‌ییرسن.
تیق… تیق… اوجاق شؤعله‌سی یانماقدا فنده‌یین تیققیلتی سسی کسیلیر. فنده‌یی اوجاغین کنارینداکی میز اوٍسته آتیرسان. تیق!… آمما بو تیق سسینین جینسی فنده‌یین تیق سسیندن فرقلیدیر. یخچالین موتور سسی دیققتیوی چکیر.
یخچالدان پنیر ایله اوٍزوم چیخاردیرسان. چایدان اوجاق اوٍسته اؤنجه آستاجا سیزلاییر، آز سونرا قور- قور قاینا‌ماغا باشلاییر. چای دمله‌ییرسن. همیشه سئودیین شیریلتی سسی قالخیر. پنیر ایله اوٍزومو یویورسان. گئنه شیریلتی سسی، گئنه سو سسی…
هر گونکو کیمی میز باشیندا أیله‌شیب، سحر یئمه‌یینی یئینده دیش ایله چؤره‌یین توْخونوش سسینه دیققت وئریرسن. چایوی ایچنده هؤرتولده‌دیرسن. ایستیکان- بوْشقابی یویورسان. گئنه سو سسی ائوین ساکیت‌لییینی پوْزور.
میز باشیندا أیله‌شیب، کیتابدا علامت قویدوغون صفحه‌نی آچیرسان. واراقلاماق سسی… اوشاقلیغیندا بارماغیوی یاشلاییب، دفتر- کیتابی واراقلادیغین یادیوا دوٍشور. ایندیسه واراقلاماقدا اوستالاشیبسان.
ساعاتا باخیرسان. بیر زامانلار ساعاتین سسی اوتاغیوین وارلیغیندان ساییلاردی. ایندیسه موبایلیوین ساعاتینین عادت‌کرده‌سی اولوبسان. هر ثانیه عددلر بیر- بیرینین آلتینا سوٍیروشوب، زامان کیچیک بیر مقیاسدا سس‌سیز- صداسیز ده‌ییشیلمکده‌دیر. ایستر- ایسته‌مز ساعات دا سنین کیمی یوخاری قالخماغا محکومدور.
کامپیوترین آرخاسیندا أیله‌شیب، بارماقلاریوی ذهنیوین قوُللوغونا بوراخیرسان. بارماقلارین اوْتوماتیک بیر ماشین‌دیر دئیه‌سن، کئی‌بوْردون دوٍیمه‌لری اوٍستونده ضرب توتوب. بو آندا وجودووون چالیشان بؤلوم‌لری یالنیز گؤزلرین ایله بارماقلاریندیر.
پیچاق ایله کاهی، یئرکؤکو ایله رنده، قابلاما ایله قاپاق، بوْشقاب ایله قاشیق توْخونوشو، یئمک ایله دیش سسی دوٍنیانین أن دادلی موسیقی‌‌سیدیر، یالنیز سس‌سیزلیکده، تنهالیقدا اینسان اونلاری دوُیار. گئنه ده هر گونکو کیمی یئمک واختی اؤز یانیندا دوٍشونورسن: «من موزیسین اولسایدیم یئمک و اینسان آدیندا بیر سمفونی یاراداردیم.»
آخشام‌چاغی‌دیر. گئنه ده سو سسی ائوین سس‌سیزلییینی سیندیریر. بیر اوٍشتوبین ناری یویوب، بوْشقابا قویورسان. نارلا ألیوین توْخونوشو سویون سسی آلتدا گیزله‌نیر. ناری دادمامیش، آدی آغزیوی سولاندیریب. دیل ایله داماق سسی… پیچاق گتیریب، ناری کسمک ایسته‌ینده غیرعادی بیر حادیثه ایله اوٍزبه‌اوٍز اولورسان. بیر پاپیش‌تیکن نارین پوٍسگوسوندن یوخاری قالخیر.
ائوین سس‌سیزلییینده حئیرتله پاپیش‌تیکنه باخیرسان. ناری یئمکدن واز کئچیرسن. ألیوی چنه‌وه دیرسکله‌ییب، پاپیش‌تیکنی ایزله‌ییرسن. قولاغین اونون یئریشینین سسینی دوُیمور. دیل- دوداغین ترپنمه‌سه ده ذهنیوین سسینی آیدین- آشکار ائشیدیرسن: «ائله بیل داغدان یوخاری قالخیر!»
ذهنیوین سسینه اوشاق کیمی پیققیلداییب، گوٍلورسن. أییلیب دیققتله پاپیش‌تیکنین أل- آیاغینا باخیرسان. خال- خال قانادلارینین آلتیندا نه داش وار، نه ده قوم. آمما اوشاقلیق چاغلاریوین سسینی چوخ اوزاقلاردان ائشیدیرسن… بیر پاپیش‌تیکن بارماغیوین اوجوندان یوخاری قالخیر. یئددی یاشلی بیر قیز هیجانلا گوٍلور.
ساعات اوْن‌ایکی‌یه دوْغرو یوخاری قالخماقدادیر. سن ایسه یاتاغیندا یوْرقانیوین آلتینا سوٍزولورسن. یوخوندا بیر قیز اوشتوبین نارینین پوسگوسوندن یوخاری قالخیر.
تیققیلتی سسی ائشیدیرسن. بولورسن قونشونون قاپیسی ایشگیللندی. گؤزلریوی آچیرسان. بولورسن ساعات آلتی یاریمدیر. قونشونون کیشی‌سینین آیاق سسینه قولاق یاتیردیرسان. بیر، ایکی، اوٍچ، دؤرد…
۹۶/۹/۵
