اوْغرو
رقیه کبیری
هانسی تاییندا گیزلتدی..؟ ساغ، یوخسا سوْل جوراب تاییندا؟ یئییب قورتارمامیش قاپیلارینا یئتیشمیشدی. کیمسه ألینده گؤرمه‌میش گیزلتمه‌لی‌یدی. هؤوشنه‌دن بیلمه‌دی ساغدا گیزلتدی، یوخسا سولدا. آغزینداکینی چئینه‌مه‌میش ائله اوُددوکی، بوغازینین یولونو سؤکه- سؤکه آشاغی گئتدی.
باجیسی دونن اونون پؤرتوشمه‌ییندن شَکله‌نیب، آغزینی ایله‌میشدی. نه یاخچی کی باجیسی آغزینی ایله‌مه‌میش دوْیون قارین سو ایچمیشدی. آخی شیرین یئمه‌لیدن سورا سو، بال دادی وئرر.
قادین پؤرتوب. ذهنی یوخویلا اویاقلیق آراسیندا سرگردان قالیب. یوخو آییلماقدان داها آرتیق شیرین گلیر اونا. عئینالی‌دان أسن سرین یئل تئللرینه، بدنینه توخونور.
پؤرتوشمک همیشه اونو گودازا وئریب. اوشاقلیق چاغیندا یاساق بیر ایش گؤرنده، جاوانلیقدا سئودییی اوغلانین آدینی بیریندن ائشیدنده، یالان دانیشاندا و یا هیجانلی فیلم گؤرنده پؤرتردی. ایندیسه یائسه‌لیک پراسسی کئچیرمک سببیندن، یوخودا بئله پؤرتور.
«ساغدا گیزلتدی، یوخسا سولدا؟ بیر دنه‌یدی؛ یوخسا ایکی؟ دییه‌سن ایکی‌یدی. حیط قاپیسیندان ایچری گیرمه‌میش چؤرک بوخچاسی باشیندا أییلیب، هر بیرینی بیر جورابینین ایچینه سوخدو. آیاقلاری دا بدنی کیمی تر- تمیز ایدی. آناسی گون‌اوْرتا چاغی هامیسینی چالاسرده یویوندورموشدو.
اوچ یاش اؤزوندن بؤیوک باجیسی دئییر: «چالاسر دئمه، اوراسی حامام دامیدی. گؤرموسن اوْدون قالاییب، اوجاقلاردا قازان- قازان سو قاینادیب، بیزلری یویوندورورلار؟! ائو حامامی ائشیکده‌کی حاماملارین خیر‌داسیدی. ائشیکده‌کی حاماملاردا دئو یئکه‌لیخده قازانلاردا سو قاینادیب، اونو لوله‌لره اؤتورورلر. اونا گؤره ائشیک حاماملاریندا سو شیرلردن گلیر. چالاسر دیینده ائو حامامینی گؤزدن سالیسان. باخ گؤر محله‌ده نئچه نفرین ائوینده حامام وار؟!» باجیسینین دئمه‌یینه دئییل، حامامین نه اولدوغونو اؤزو یاخچی بیلیر. اونا گؤره ائولرینده‌کی قارانلیق حامام دامیندا، قارامتیل دایاز حوْووضون آدی ائله چالاسردی. حامام، یانی شیرین بیریندن سویوق سو گلسین، او بیریسیندن ده ایستی سو. یانی یویوناندان سورا سرین کانادا ایچمک، شیرین و سولو آلمانی شاقیلدادا- شاقیلدادا یئمک… آمما چالاسرده یویونماق یانی داغ سویون آلتیندا پؤشلنمک… تاختا داراغینان کؤتک یئمک… کیلکه دوشموش ساچلارینین دانلاغینی ائشیتمک.
«نه اولار بو میراثا قالمیش کیلکه‌لریوی گونده بیر دفه دارییاسان..؟»
چیمچاوات ایدی. آناسی گون‌اوْرتا چاغی اونلاری یویوندورماسایدی، نه سول جورابینین ایچینه سوخاردی نه ده ساغ جورابینین. هر گونکی کیمی گرک چؤرک‌خاناینان ائوین آراسینداکی یولو قاریشقا کیمی آستا- آستا یئریییب، شیرنی‌بالیقلارینی تل- تله‌سیک هؤپوردوب، قاپیلارینا یئتیشنده آغزینی سیلیب، ایچری کئچردی.
تمیز اولماسایدی شیرنی‌بالیقلاری دا روُیه باجینین مانپاسلاری تک چیرکه‌سوْو اولاردی. درد بوردایدی کی شیرنی‌بالیقلارینین رنگی مانپاس کیمی آغ دئییل، قهوه‌ای ایدی. چیرکه‌سوْو اولسایدی مانپاسدان داها آرتیق چیمچشمه‌لی اولاردی.
قادین گؤزلرینی آچدی. پؤرتوشمه‌سی شدّتله‌نیب، بدنی ایسه ایستی‌دن هَنیرتی چکیر. ملفه‌نی آیاغی‌لا قیراغا ایته‌له‌دی یوخولو- یوخولو اطرافا گؤز گزدیردی. هاردا اولدوغونو سئچه بیلمه‌دی. عئینالی‌دان أسن یئل کیپریکلرینه آغیرلیق ائله‌ییب، گئنه گؤزلری یومولدو.
«قاپیدان ایچری گیریب، حیطه گؤز دولاندیردی. پنجره‌لرین حصیرلرینی هله یوخاری قوْوزامامیشدیلار. شیرنی‌بالیغین کاکولو دادینی تامسینا- تامسینا چؤرک بوخچاسینی باشیندان گؤتوروب،حوْووض قیراغینداکی تختین اوستونه قویدو. چؤرکلرین ایستیسی بئینینی قیزدیرمیشدی. ایکیندی‌نین سرین هاواسی ساچلارینا توخوندوقجا سرینله‌ییب، ذهنی دورورلدو. نظرینه گلدی بوخچانین قیراغیندا قیرمیزی ایپک‌له تیکیلمیش بیر جوت بالیق، جان آتیرلار بوخچادان قوپوب، حوْووضون سرین سویونا آتیلسینلار.
ایش‌لری بؤلموشدولر. هر گون چؤرک آلماق، بیر ده ایکیندی چاغی حوْووض قیراغینداکی تختی دؤشه‌مک اونا دوشموشدو. پالازلار تختین قیراغیندا بیر- بیری اوسته قالانمیش، اونو گؤزله‌ین کیمی‌یدیلر.
باشماقلارینی چیخاردیب، تخت اوسته کئچدی. پالازلاری آچیب، تختی دؤشه‌دی. روُیه باجینین دؤشکچه‌سینی، بیر جوت قیرخیم یاسدیغینی تختین یوخاری باشینا قویدو. قجمه‌داشلاری پنجره‌نین هئره‌سیندن گؤتوروب، تختین بیر بوجاغیندا تک‌باشینا اویناماغا باشلادی.
روُیه باجی هین‌ناهین ائلییه- ائلییه اوتاقدان چیخیب، گلیب دؤشکچه‌سی اوسته اوتوروب- اوتورمامیش چؤرک بوخچاسینی آچیب، چؤرکلری بوکوب، اوست- اوسته قالاییب، بوخچانی بوکدو. هر گونکی کیمی بوخچانین بوجاغینداکی قیرمیزی بالیقلار آلت قاتدا قالیب، قیزین گؤزوندن ایتدی. قیز ایسه هر گونه تای گؤز- گؤز ائله‌ییب، رویه باجینین گؤزوندن گیزلی، بوخچانی آچیب، بوجاقلارینی آلت- اوست ائله‌ییب، بالیق تیکیلمیش بوجاغی اوست قاتا قویدو. قیزا ائله گلیردی کی رویه باجی ایپک بالیقلارینان دوشمانچیلیغی وار.
بیردن- بیره قاپی دؤیولدو. قیز ایسه شیرنی‌بالیقلاری أزیلمه‌سین دئیه، قیچ‌لارینی اوزالتمیش قجمه‌داش اویناییردی، قاپینین دؤیولمه‌سینی سایمادی. آناسی ایسه اوتاقدان باغیردی: «دور قاپینی آچ!»
رویه باجینین دمپای‌لارینی گئییب، سوروتله‌یه- سوروتله‌یه گئدیب قاپینی آچدی. چؤرکچی‌نی قاپی دالیندا گؤرونجه رنگی بوْزاردی. بوتون گوجویله قاپینی کیپله‌ییب، قاچیب رویه باجینین یاسدیقلارینین دالیسیندا گیزلندی. رویه باجی چرقدینین اوجونداکی دویونو آچیب «کیم سنی قورخوتدو بالام، گل سنه بیر مانپاس وئریم»، دئدی.
یائسه‌لییین پؤرتوشمه‌سی یوخو ایچینده بئله، قادینی راحات بوراخمیر. نؤوبه قیزدیرماسی کیمی گاه آزالیب، گاه شدّتله‌نیر. بدنینین باشا باشی قوْرلانمیش کیمیدی.
آناسی اونو گیزله‌نرکن گؤروب، چادیراسینی باشینا سالیب، قاپییا چیخدی. قیز ایسه یاسدیقلارین بوجاغیندان قاپینی گودوردو. آناسی قاپینی کیپله‌مکده باغیردی: «قودوغون بیری قودوخ، سنه وئردیییمیز چؤرک پوللارینین باشینا نه داش سالیبسان؟ چؤرهچی دییر بیر آیلیق چؤره پولو بورجوز وار.»
قادین پؤرتوشمه‌دن جانی ترله‌ییب، آلنینا مینجیق- مینجیق تر اورتوموشدو.
قیز آناسینین غصبلی سسینی ائشیتجک، تختدن یئره آتیلدی؛ بلکه قاچیب آناسینین ألی چاتمایان بیر یئرده گیزلنسین. یئره آتیلاندا آیاغی بورخولوب، حوْووضون ایچینه دوشدو.
قادین گؤزونو آچدی. ملفه‌نی گؤتوروب، آلنینین، بدنینین ترینی سیلدی. عئینالی‌دان أسن سرین یئل پنجره‌دن اوتاغا دولوردو. قادین گئرنه‌شیب، گولومسه‌دی.
قیرمیزی بالیقلارین آراسیندا بیر جوت قهوه‌ای بالیق حوْووضون سویو اوزرینده اوزه‌ین قالمیشدی.
۲۴/۴/۹۵
یک پاسخ
سئودیم.گؤزل و نوستالژیک.قلمینه ساغلیق