اوخوماق زامانی: < 1 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: روح‌انگیز پورناصح
ترجمه: روح‌انگیز پورناصح
روح‌انگیز پورناصح
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

تاق، تاق، تاق… یووارلاق دووارلارین ایچینده هر یانا چیرپیلیرام. چیرپیلدیقجا یونولوب، دییشیلیرم. دووارلارین یوخ بوجاقلارینادک آختاریرام. چیخیش یولو تاپا بیلمیرم. دیزلریمی قوجاقلاییب، اوتورورام. بیر آزدان داریخیب تزه دن یول تاپماغا چالیشیرام. دووارلاری وار گوجوم‌له ایته‌لیرم؛ سونوجسوز بیر ایش. یئنی‌دن دووارلارا چیرپیلیب، یونولوب، دییشیلیرم. گئجیکمه‌دن ائشییه چیخماسام، اؤزوم ده اؤزومو تانییا بیلمه‌یه‌جه‌یم.
یقین تاپاجاغام بیر یول؛ مندن اول گئدن‌لر، آرخایین ائیله‌ییب‌لر یولون اولدوغون. آمما قلمی کاغیذ اوسته قالان کیمسه، نه واختا کیمی گؤزتله‌سین منی گرک؟
بو دؤنه هنده‌وریمی اینجه‌دن اینجه‌یه یوخلاییرام. اورتالیقدا کیچیک بیر یئرین قاتی رنگی دیققتیمی چکیر. یئرین برکلییی اورتایا ساری گئتدیکجه آزالیر، یئر یومشالیر. بیر آتدیم اورایا قالمیش آیاقلاریم کئچیر بیر دلیکه. ماجال تاپمادان یاش، داراشلیق و بوروخ ـ بوروخ یوللاردان آشاغی زویولدویورم. بیردن بیر زادا ایلیشیب آزجا دایاناندان سونرا داریسقال و دوم ـ دوز بیر بورودا یولومو دوام ائدیرم، بورونون لاپ داریسقال یئرینه گیریب ـ گیرمه‌میش اوجوندان ایشیق‌لیغا چیخیب، قورو و آق دوزنگاهلیقدا یئره دوشورم. گؤزلریم قاماشماسین دئیه یومورام. اؤزومو اله آلاندان سونرا گؤزلریمی آچیب اطرافیما باخیرام. مندن اؤنجه گلنلر سیرایلا، یاراشیقلی، ساکیتجه‌سینه اوتوروبلار.
احتیاط‌لا باخیرام سنه، سن ایسته‌دییین اولماسام، همیشه‌لیک اولاراق اوستومه قلم چکه‌‌جکسن، بیلیرم، آمما کی، منی گؤردوکده گولر گؤزلر و دوداق‌لارینلا، راحات نفس آلیرسان. سئوینجین دن دوز یئریمده اوتوردوغومو دویوب، سیرادا یئریمی برکیدیرم. قلمین اوجو یانیمداکی قورو و آق دوزنگاهلیقدا یئره اوتورور.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

روح‌انگیز پورناصح

روح‌انگیز پورناصح

باشقا اثرلری