اوره‌ك دؤيونتولري
عليرضا ذيحق
چيچك‌لري ماشينين اوستوندن قوپارداراق، اؤز سرنيويشتيني دوشونوردي كي اونو ن توي دويوني ايله ايلگيلي‌ايدي. بير زامانلار اوره‌يي باشقا بير هاوالاردا گزيردي و ائولي‌ليك‌له عشق‌دن قاچيردي. موسيقي اؤيره‌نمك اوچون باشقا بير اؤلكه‌دن باش آچميشدي و اؤزونو آزاد حيس ائديردي. ايل‌لر چكدي كي ائده بيلدي موسيقيني عالي مكتب‌لرده بيتيرسين و اؤز آرزوسونا چاتسين. امما يالنيز ايدي. خزان وورموش بير ياپراق كيمي. سورعتله كئچن عؤمرو دوشونوردي. ياراديجيليق و هونر ساحه‌سينده چاليشماق، اونون حياتينا رنگ سپسه‌ده قلبي ياپ يالنيز‌ايدي. سينما فيلم‌لرينده اولان عشق‌لره موزيك يازسادا، اؤزو عشقي هئچ تجروبه ائتمه‌ميشدي.
كيمسه يوخ ايدي كي عشقي اونون يادينا سالا و صاباحلاري گؤزونده ايشيقلانا. صنعتچي بيري اولورسادا، عشقي تكجه موزيك ايدي و بير قادينين ايسته‌دييي دويغولاردان اوزاق دوشموشدي. آناليق دويغوسو و سئوگي دولو باخيشلار كي كؤنولدن قوپموش اولا، اونون حياتي ايله غريبه ايدي. ياشلانديقجا عشق داها بيله‌سينه چتين گليردي و عاشيق اولماق اونا بير رويا كيمي ايدي. نظرينه گليردي كي عشق اوندان قاچاراق بختي ده خوشبختليكدن قاچيري. حيس ائديردي قوجاليري وبيرگون بو ايشلره چوخ گئج اولاجاقدي. تاكي بيرگون بيري اونون ياشامينا گيردي. سينمادا مونتاژ ياپيردي و ايشلري اوزره گاهدان بير بيرلري ايله گؤروشوردولر. بو گؤروشلردن بير عشق دوغولوردي و اينانيلماسي چتين اولسادا، او آياغيني قاباغا قويوب بيله‌سينه ائلچي دوردي. آمما قادين دئدي:
– سن موسيقي‌يه عاشيق اولوبسان منه يوخ !
و اودا جوابدا دئدي:
– عشق بير نور دي كي چيلير ، و اوندا كي چيله‌دي ايشيقليقي هر مرزي كئچير. سن ايله موسيقيني بير بيريزدن آييرماق اولماز. دنيز و آدا كيمي هممه‌شه يان- ياناسيز.
دئدي :
– بو عشق دن حذر قيل. بيرينين داليجا گز كي فاصيله‌لر چوخ اوزاق دئيييل‌لر.
و او دئدي:
– زمانين فاصيله‌سين دولدورماق اولار، آمما قلب‌لرين فاصيله‌سين يوخ. اگر كؤنلون عاشيق‌دير، فاصيله‌ني هئچ دوشونمه! من بؤيويم سن كيچيك دييه بير شئي يوخ .”
اوره‌يي‌نين پيچيلتيلارينا قولاق آساراق ايستيردي كي ايلك دفعه اولورسا دا عشقه اينانا. حياتي‌دا سينما كيمي سانمالي ايدي و گؤزله‌نيلمز ايشلره گره‌ك حياتيندا يئر وئره‌ردي. بو اوزدن ايسه قلبي‌نين سسلرينه قولاغ آسيب عقد سوفراسيندا اوتورماغا قرار وئردي. ايللراونلاري بير- بيريندن آييرمادي وآييرادا بيلمز. بير عشق اودونان قلب‌لري دولودي كي ياشامي مشترك دوشونجه و دويغولارلا آلاولانديريرلار.
گول- چيچك‌لري توي ماشيني‌نين اوستوندن قوپارداراق، حياتي بير سينما پرده‌سي كيمي گؤزونون قاباغيندان كئچيب دئدي:
– عسقه اينانماق آسان‌دير. اصل اودوركي آدام، هردن گره‌ك فيلملره ده اينانا .
