آتشبازلیق
تام گیلسپی
چئویرن: روح‌انگیز پورناصح
ترجمه: روح‌انگیز پورناصح
روح‌انگیز پورناصح
00:00
00:00

چیممک اوتاغیندان باشلادی. فیرچانی، بیر کره ایشلدیلمه اولگوجو، دیش شوتکاسینی و دیش ساپینی یئکه قره زیبیل نئیلونونا تؤکدو. سونرا یاتاق اوتاغینا گئدیب، چیرک پالتارلارین سبدینی قاوزادی و ایچینده‌‌کی‌‌لرین هامیسینی نئیلونا آغناتدی. سیییرتمه‌‌نی آچیب، آلت گئییم‌لری بوتونلوک‌له تؤکدو ائشییه. بو حال‌دا اونون ترپنیش‌لری داهادا هؤووللو اولموشدو. کومودا ساری گئدیب، اوچ دنه‌ ده زیبیل نئیلونونو، کت شالوار، کؤینک، بویون باغی، جین شالواری، ایدمان شالواری، بلوز و آیاق قابی‌لا دولدوردو. قوتولاری یاتاغین آلتیندان چکیب چیخارتدی. اورادا ییغدیغی بوتون قیویرـ زیویرلاری گؤتوردو. آلت قات‌دا تمام سی‌ دی‌ لری، کیتاب‌ لاری، شکیللی رمان‌لاری، حیکایه‌ لری، سیاحت و کامپیوتر سوراق کتابلارین و سئچیلمیش شعر کتابلارینی آلت اوست ائله‌‌دی. سونرا تؤوشونو آلمامیش عکس آلبوملاری، مکتوب‌لار، قابا توتولموش شکیل‌‌لر و کیچیک چینی تؤحفه‌‌لره ساری گئتدی. بونلارین هامیسینی ییغیب صاباح زیبیلچییه وئرمک ایسته‌‌ییردی. آخیردا اوز قویدو آنبارا ساری. اورادا جیهاز جعبه‌‌سی، آیری اشیالار و چوخلو درده دیمه‌‌ین شئیلر گؤردو. بوتون رف‌‌لری، سیییرتمه‌‌لری ائشییه تؤکملی وسایله گؤره آختاردی و سونونجو ایشکاف‌ده، اونلاری، باغ‌چیلیق الجک‌‌لری آلتیندان تاپدی.
اونون قیرخینجی دوغوم گونونده، کیشیسی شنلیک ائتمک اوچون آتشبازلیق لوازیمی آلمیشدی. بو ایل اونون دوغوم گونونون ایلنجه‌‌لی شام قوناغلیغینی آتشبازلیق گونو[۱] کیمی توتماق ایسته‌ییردی. آمما اونلاری هئچ واخت ایشله‌‌ده بیلمه‌‌میشدی. چون کی اری قورولتای‌دا ایشتیراک ائتمک اوچون سوئیندینه گئتمیشدی و اونو بو قوناغلیغدا یالقیز بوراخمیشدی. ایندی بئش آی‌دان سونرا یئنه‌‌ده گؤزونه دَیدی. اونلارا بیر آنلیق باخیب، کدره دولدو. سونرا اونلاری الکتریک وسیله‌‌لرایله برابر زیبیل نئیلونونا قویوب، ائوه قاییتدی. اؤزونه بیر آیاق برندی تؤکوب، یورغون ـ آرغین، کاناپئیه سؤیکندی.
هاوا قارانلیقلاشیردی. ایکینچی ایچکیسینی ده تله‌‌سیک ایچیب، یئنی‌‌د‌ن آتشبازلیق لوازیمی فیکرینه دالدی. ائشییه گئدیب قوتونو زیبیل نئیلونوندان تاپیب چیخارتدی. ماتباخا قاییدیب، اونون ایچینده‌کی‌لری دیققت‌له سئیر ائتدی. همه‌شکی شئیلرایدی: فیش ‌ـ فیشا چارخی، ایکی د‌نه فیش ـ فیشا، تاراققا، ایکی یا اوچ دنه‌ ده موشک. اونلاری چیخاراندا بیر نوتا یئره دوشدو. اوندا بئله یازیلمیشدی:
منیم سئوگی موشکیم
سمامی ایشیقلاندیریسان
سئوگی‌ ایله. ر
وسایلی جعبه‌سینه قویوب، باخچایا گئتدی. فیش ـ فیشا چارخینی آرخاداکی چرچیوه ‌نین اوستونه قویدو. نوتانی بورمه‌‌لییب، نازیک و اوزون فورما سالاندان سونرا اونون ایچینه کیبریت چوپو قویدو. شام پولویو کیمی یاواشجادان یاندی. پولوکو یانماق‌دا فیش ‌ـ فیشا چارخی فیرلانماغا باشلادی. قیغیلجیم‌لار قارنلیقدا گؤیه قالخیردیلار. بو آن بیر قیز اوشاغی چپرد‌ن گؤرسندی.
«نه ایش گؤرورسونوز،» دئیه، سوردو. «شنلیک‌‌می ائدیرسینیز؟»
سونرا تاراققانی آلیشدیردی، چیمن‌لیک‌ ده اوجا سسله سیچرادی. بالاجا قیز قورخوب، گئری دؤندو. بیر آز سونرا نئچه جیلفیر آدام‌لا قاییتدی. قونشولارین نئچه‌سی‌ده چپرین آراخاسینا توپلاشمیشدیلار.
«ایلین بو واختیندا تاراققا فیش ـ فیشالاری هاردان آلیبسان؟»
«بو ایش‌لرینین سببی نه‌دیر؟»
قادین اونلاری وئجه آلمایاراق، قوتونو بوشالتماغا داوام ائدیردی.
آنجاق سونونجو موشکه یئتیشدی. لاپ بؤیوکونو ساخلامیشدی. اونون شنلییی‌نین عظمت‌له سونا چاتماسیدی. موشکین دیبین یئره قویوب، پولویونو قالان بورگه‌لنمیش نوتاایله یاندیردی. گئری چکیلیب، اینتیظار قالدی. پولویو آلیشدیقدا فیسیلتی‌ییب، سونرا سؤندی. قونشولار کؤکس اؤتوردولر. یئنی‌ دن چالیشدی. سونوجو یوخ ‌ایدی. ماتباخا گئدیب، بیر قوطو کیبریب تاپیب، قاییتدی. بیر دنه کیبریت چوپونو پولویون یانینا قویدو. یئنه ‌ده بیر ایش گؤره بیلمه‌دی. قوتودان بیر تیکه جیریب پولوک یئرینه ایشلتدی. کارتون آلوولاناراق پولوک یانماغا باشلادی. موشک اوجا سس‌ ایله گؤیه توللاندی. قونشولار نفس‌لری کسیلمیش آلقیشلادیلار؛ خیرداجا قیز ائولرینه قاچدی. سونرا قورخونج بیر سس‌ ایله برابر خاریقه‌لی ایشیق ساچان بیر صحنه گؤی اوزونو دولدوردو. هر طرفه یاییلمیش الوان و گیرده اود پارچالاری، یئره دوشدوکده پارتلاییردیلار. باغچادا دالغاـ دالغا هیجانلاشدیریجی ایشیق‌لار اویناییردی. سونرا بیر اینیلتی‌ ایله هر شئی توکه ‌نیب، قارانلیق یئنی‌ دن کؤلگه‌سینی سَردی.
قونشولار هدف‌سیز همیشه‌ کی گئجه دَب‌لرینه قاییتدیلار. اودا آتشبازلیغین بوش قوتوسون ییغیب و کیشی‌سی‌نین دیگر وسایلی‌ ایله برابر ائشییه قویدو. هاوا سویوموشدو، چیمن‌لر قیروو باغلامیشدی. آرخالیغینین دؤیمه ‌لرین باغلاییب، ایچری گیردی.

تام گیلسپی
اشتراک گذاری در print
چاپ
اوخوماق زامانی: 2 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

آتشبازلیق

روح‌انگیز پورناصح
www.ishiq.net

آذربایجان ادبیات و اینجه‌صنعت سایتی