ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

گونئي
روح‌انگیز پورناصح

اوزاق‌لاردا گؤي اوزو قارالدي بيردن. گليب پنجره‌نين قاباغيندا دايانديم. نه‌ده‌ن بئله توستولوايدي هاوا؟ بلكه‌ده بير يئر اود توتوب يانيردي؟ نفسيمي دالي قايتارديم. پنجره‌ني باغلاديم. اوسگورمه‌يه دوشسه‌يديم اگر، قورتارماق بيلمزدي.
گؤزومو قيرپمادان حيرت‌له گؤيه باخيرديم. قاراليق گئت- گئده ياخينلاشيردي. توستونون بونجا قاراليغينا، اؤزوده بو سرعت‌له ياخينلاشماسينا اينانا بيلميرديم. واي! ايندييه‌دك بو قده‌ر قارا قوشو بير يئرده گؤرمه‌ميشديم. قوش سئل‌ايدي، آمما نه بير يئري ييخيردي،نه اؤزو ايله بير شيي آپاريردي.

قارانقوش‌ايديلر يوخسا؟ گؤيده دالغالانيرديلار. جيككيلتي‌لري گؤيه يئرله‌شمه‌د‌ن يئره دولموشدو. من سئون قوش‌لار، اوره‌یيمده بير زادي قايناديرديلار. بعضي‌لري گئري قاليرديلار. اؤزونو ايتيرميش‌لر كيمي اوچوردولار؛ دالغالار گئري قاييتديقدا قاريشيب اونلارا گئديرديلر. بعضي‌لري هوندور بنالارين اوستونه قونوب، بير آز دينجلديكد‌‌ن سونرا قانادلانيرديلار. اوزاق يئرلردن گليب اوزاق يئرلره گئدنلره بنزه‌ييرديلر. قار چوخ تئز باشلاميشدي، چوخ تئز. منسه اوشويوردوم. چوخ اوشويوردوم. اوستومه نئچه يورغان چكه‌- چكه، يئنه‌ده اوشويوردوم. سوبايا دايانيرديم، گؤوده‌م يانيردي، ايچيمده كي بوزلار قاتي‌لاشيردي آمما.

اونلارلا اوچا بيلسيديم اگر! اونلارلا اوچماغا قرارلانديم. گونئي‌دن باشقا گئده‌جك‌لري يئر اولا بيلمزدي. اونلار يالنيز گونش يوردونون يولچولاريديلار.

پنجره‌نين هره‌سينه چيخيب، قوللاريمي آچديم. قالديريب، ائنديريرديم. بير آز سرعت‌لنديرديم. گؤزلريمي يومدوم. بيريسي مني توتاركن باغيردي، دلي‌نين بيري دلي دوش يئره. سؤزونه باخمادان ايشيمه دوام ائله‌ديم.
قوش‌لارلا برابر، گؤيده دالغالانيب گؤنئي‌يه ساري اوچوردوم. گؤيون اوزوندن هر شئيي گؤرمك اولوردو. ايچيمده‌كي بوزلار يئرين وئرميشدي قاينار بولاغلارا، ايستي دولوردو جانيما.
قوش‌لار مني احاطه‌لييب، جيككيلده‌يه- جيككيلده‌يه گلين آپاريرديلار گونئي‌يه دوغرو . آشاغييا باخديم. پنجره‌نين هره‌سيندن ايكيسي‌ده منه باخيرديلار.

2 پاسخ

  1. سلام
    بو دویغوسال حکایه نى کئچن گون، عزیز اوستادیم «رضا همراز» جنابلاری وئردیگى بیر اؤزل درگى ده اوخودوم. بورادا گؤردویومده دئدیم بو واسیطه ایله «روح‌انگیز خانیم پورناصح»-ه اؤز تشککورومو بیلدیریم.
    ایشیق سیته سینى دولاندیران لارا ایسه ساغ اولسونلار. گئت-گئده چوخ گوجلو ایله دگرلى اولور.
    درین سایغی-حؤرمتله

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *