اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: روح‌انگیز پورناصح
ترجمه: روح‌انگیز پورناصح
روح‌انگیز پورناصح
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

داغ‌دان اوزو آشاغی ائنرکن، کوشولتو سسی اوره‌ییمیزی اوشوندوروردو. دؤرد نفرایدیک. بیر بیریمیزه باخیب، گؤزلریمیزدن قوپان قورخو آلووون گؤروردوک. چوخ اوجا داغ‌دایدیق، آشاغی‌لاردا بیردن گؤردوک سئل هر زادی بورویه‌رک آپاریر؛ چوخ آشاغیدا. اوز دؤندردیک قولـله‌یه ساری. باشادک قارایدی، دؤرد ال آیاقلی دیرماشیردیق، تئزلیک‌له اؤزوموزو چاتدیراق داغین لاپ اوجا یئرینه.

کوشولتو سسی بیر آن کسیلمیردی، اؤزوموزو چتین‌لیک‌له باشا چاتدیردیق. باشقالاری دا وارایدی. بیز دؤرد نفرین اوچو تئز – تئز دییشیلیردی، گاه عائله‌م اولوردو، اؤز- اؤزومه دئییردیم یاخشی هله هامیمیز بیر یئرده‌ییک؛ گاه قونشولار، گاه دوستلار. آمما من دییشیلمیردیم. داغین باشیندا آسانسور ایچینه دولدوق‌دا، کوشولتو سسی چوخالدی. دئدیم آسانسوردان چیخاق ائشییه، بیر زاد دیسه، قیریلیب دوشر، داها چیخانماریق. ائشییه چیخدیقدا اوجا، قالین ستون‌لاری گؤردوم. هر بیریمیز بیریسینین دالیسیندا دایاندیق. ستونون دالیسیندان اییلیب آشاغییا باخدیم، سئل وار گوجو‌یله قویون‌لاری گؤتوروب آپاریردی، اوغلوم چوخ آشاغیدایدی. بیلمه‌دیم هاچان او قدر آشاغی ائنمیشدی. آغلایا- آغلایا قیشقیریب، دئییردی، بؤیوک مامانین الیندن برک یاپیشمیشدیم، آمما سئل اونو الیمدن آلیب آپاردی. او های ـ های‌دا یالنیز دئیه بیلدیم تئز چیخ یوخاری‌یا.

سئل گئت- گئده اوسته قالخیردی، هر نه‌یی سیلیب، سوپوروب، اؤزوایله آپاریردی. باخماییردی داش‌دی، تورپاق‌دی، آدام‌دی، قویون‌دی یا داکی… آز قالمیشدی بیزه ده چاتسین، ستوندان یاپیشیب، گؤزلریمی یومدوم. بیردن کوشولتو کسیلدی. یالنیز تؤوشومه سسی گلیردی. گؤزلریمی یاواشجادان آچدیم، نه سئل‌دن خبر وارایدی، نه آدام‌لاردان.

بیردن سن یادیما دوشدون. هاچاندان بری سنین‌له اؤزومو بونجا سئوینج‌لی و راحات گؤرمه‌میشدیم. گلمیشدیم سیزه، حوض باشیندا دورموشدوق، نئیله‌دیییمیز یادیمدا دئییل. بیر آن بیر فیرتینا قوپدی، توز- تورپاغی سوپوروب گؤیه قالدیردی. باشیمی قاوزایاندا، بئشینجی قاتدان باشینی اوزاتمیشدین ائشییه. نه تهر چیخمیشدین اورایا، بیلمه‌دیم. قلیان آلتی یئییب‌سن؟ سوروشدون.من هویوخموش حالدا، یوخ دئیه‌رکن توز- تورپاق دولوردو ائوه. اللریمی ترپدیب، قیشقیریردیم،پنجره‌نی باغلا.سایمادین منی. اوسته گلیردیم. تله‌سیک پله‌لری چیخارکن سنی گؤردوم. آشاغی قات‌دا همه‌شه کی تک شاد ماهنی سالمیشدین، آمما بو دؤنه همه‌شه‌کی کدر، گؤزلرینده یوخ‌ایدی. راحات‌جاسینا قوللاریمیزی هر طرفه آچیب اویناییردیق. سئوینج گؤزلرینده، گولوش دوداقلاریندا، سانکی اؤزومو گوزگوده گؤروردوم. بیردن بیر باغیرتی‌ایله قاپی چیرپیلماسی دیکسیندیردی منی. سئوینج گؤزلریمده، گولوش دوداقلاریمدا دوندو. سنی و اؤزومو بیر آن‌دا ایتیردیم.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

روح‌انگیز پورناصح

روح‌انگیز پورناصح

باشقا اثرلری