ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

hebib far
زنگ‌آوا قوجالاري
حبیب فرشباف

 سيفي بير نئچه قويون قاباغينا قاتيب كندين اوتاي دوزوي‌له، قارلارين اوستوندن هاراسا گئديردي. او هله چوخ اوزاقلاشيب گؤزدن ايتمه‌ميش، حاجي حسين ديك آياغا قالخيب، سرعت‌لي آدديم‌لارلا كندين سلوونو اوتايا آتدادي. بيردن دايانيب ساغ اليني قولاغينا قويوب:

– سيفي! سيفي! سيفي! – دئيه،‌اوچ دفعه اوجادان سسلندي.

سيفي ده اونون جوابينا اوچ دفعه- بيلديم! بيلديم! بيلديم! دئييب، گئديب گؤزدن ايتدي.

كندين ميندانيندا گونه‌وره‌غينا دوزولوب اوتورموش كندين قوجالاري،‌ بو سؤزلري ائشيتسه‌لرده آنجاق كيم ايسه بو دانيشيقدان بير شئي باشا دوشمه‌دي.

تكجه حاجي ماحمود آستادان – ديلان آشيق آتماميش آلچي دورا- دئينده. قربانعلي اوچ دونه باشيني ترپتدي.

جاواد اوغلو سدي يئنه بير گئجه گئديب علي‌بك كنديندن تايا داغيديب گتيرديكلريندن صؤحبت آچميشدي. مشد سيفي اؤسگوره – اؤسگوره:

– اَشي سن ده بوناغيلوي نئچه يوز يول بيزه دانيشاجاقسان؟- دئينده مشد فرمان اوزونو مشد سيفي‌يه توتوب:

– آ باشينا دؤنوم! نئجه دئييرلر «جاوانليق دا گونلر گوده اولور ايل اوزون، قوجاليقداسا ايل‌لر گوده اولور گونلر اوزون» قيش گونلري دير قوي گونوموز بير ته‌هر سوواق‌لايتا! دئدي.

بو آن كندين يوخاري باشيندا بير هاي- كوي سسي اوجالدي. مشد احمدآغا سسي ائشيتمك هامان جلد يئريندن قالخيب، ال آغاجيني اله آليب، سسه طرف گوتورولدو- آغا قلي مشد احمد آغانين دالينجا باخا- باخا:

– گؤرن بو كيشي‌نين يئنه نه اويونو وار؟- دئدي.

بو سؤزه‌نين دوداغي قاچسادا آنجاق سولدوز بير نئچه يول باشيني بولادي.

***

احمدآغا خرمن يئرينه‌ چاتاندا قادينلارين هاي- كوي سسيندن قولاق توتولوردو. غلام اووجا بارلي فتاحي يئره ييخيب،‌قولاغيني آغزينا آليب، ديشله‌ييردي. فتاح دا عئيبه‌جر بير سس‌له چيغيريردي.

احمدآغا اونلارا ساري گئدنده، حاجي ممي تئز اونون قولوندان توتوب:

– اَيه گل بري ايشين اولماسين- دئيه، اونو بير آز قيراغا چكيب قولاغينا نه ايسه پيچيلدادي. احمدآغا چكيليب كناردا داياندي. فتاحين كئچي كيمي باغيرتي‌ سسيندن گولمه‌یي توتاندا احمدآغا تئز الي‌ایله آغزيني گيزلتدي.

هاندان- هانا قادينلار فتاحي غلامين اليندن آليب، اونلاري آرالاشديرديلار. بو آن احمدآغا تئز فتاحا ياخالاشيب، اؤز ال آغاجيني اهمال فتاحين الينه قيسديردي. فتاح بو ايشدن اوركله‌نيب، بيردن اليني آروادي‌نين اليندن قورتاريب، نه كي وار گوجو ايله غلامين كوره‌يينه بير آغاج ائنديردي. غلام اوزو اوسته يئره سريلديكده يئنه چيغير- باغير اوجالدي.

احمدآغا فتاحين اليندن تئز آغاجي آليب، اونو قوجاق‌لاييب ائوينه آپاردي. بو آن حاجي ممي غلامي يئردن قالخيزاراق:

– آخ! آخ! الين قوروسون فتاح! اولسون قالخ گئديب شكايت ائديب اونون ده‌ده‌سيني يانديراريق- دئدي.

يئردن زبيده خالا غلامين باشيندان بير بامباچا چاليب:

– آلا باخ آللاهين فتاحينادا گوجون چاتمايير دئينده غلام اوستو باشيني سيلكه- سيلكه:

– كوپك اوغلو گئديب عرضه وئليب ده‌دا نانديلاجاغام- دئدي.

همان گئجه ائل ياتاركن حاجي ممي غلامين ائوينه گليب:

– هئچ نايران اولما! سيده دئميشم سحر تئزدن سني آتي‌لا ورزغانا آپارسين، بير عاغيل‌لي عرضه‌ده يازيب سنه گتيرميشم- دئييب. ديراب پالتوونون قولتوق جيبيندن بير پاكات چيخاريب غلاما وئردي.

***

فتاح هر گون سحردن آخشاما قده‌ر دؤنه- دؤنه احمدآغانين ائوينه گئديب! – قوربانين اولوم آي كدخدا! دئييرلر شكايته گئديب، امنييه گليب ائله‌سه من باشيما نه داش ساليم آخي؟! دئينده. احمدآغا:

– آي بويووو يئره سوخوم! اَيه امنييه آدما نئيلر؟ اؤتن ايل گؤرمه‌دين رئيس پاسگاهي كندين راسيندا تاپدالاديم؟ منه نئيله‌ديلر؟ بير قوزو وئريب رضايت آلديم، قورتولوب گئتدي. بدبخت بئله قورخاقسان كي هامي سنه دولاشير داينا! بونلارين گؤزونون اوتون آلماسان بورادا باش ساخلاماق اولماز- دئينده فتاح – وآللاه سن نه ته‌هر دئسن من ائله‌رم، تكجه قويما امنييه مني ورزغانا آپارسين- دئدي. مشد احمدآغا اونا توخداقليق وئريب:

– سن تكجه من دئييه‌نه باخ! سنين ايشين اولماسين من ايشي دوزلده‌رم دئييب اونو آرخايينلاتدي.

***

سوت گونو سحر ائركن احمدآغايلا حاجي ممي كندين گيره‌جه‌يينده دايانيب، امنييه‌نين يولونو گؤزله‌ييرديلر. امنييه كنده چاتان كيمي احمدآغا ايكي قات سالام وئريب، چوخ ادب اركانلا امنييه‌نين آتي‌نين چلوونو توتوب اونو احترام‌لا اوز ائوينه آپاردي. بير آز كئچمه‌ميش حاجي ممي‌ده گليب امنييه‌يه خوش گلدين- دئييب،‌ آشاغي باشدان ديزلري اوستونده اوتوردو.

احمدآغا اودون بوخاري‌سيني قالاييب امنييه‌نين قليان‌آلتي‌سيني حاضيرلاييب گليب آشاغي باشدان اوتوردو. امنييه صبحانه‌‌سيني يئييب بير آز قيزيشاندان سونرا احمدآغا اوزونو اونا توتوب:

– سركار نه عجب بئله تشريف بويورموسوز؟ سوروشدو.

امنييه- فتاح‌دان شكايتچي وار دئينده احمدآغا بير نئچه يول باشيني بولاييب حاجي‌ ممي‌نين اوزونه باخدي. بونو گوره‌ن امنييه:

– كدخدا نه اولوب باشيني بولاييرسان؟- دئسه‌ده، احمدآغا هئچ‌نه دئمه‌ييب امنييه‌نين ديققتيني داها دا مسئله‌يه آرتيردي. امنييه چوخ اصرار ائتديكده- احمدآغا- وآللاه سركار نه دئييم؟ سنين شانسيندان بو آدام يامان ناتاراز آدامدي- دئدي. امنييه بير آز فيكره گئديب:

– نئجه ياني ناتاراز آدام‌دي كدخدا؟ سوروشدو.

احمدآغا- ده‌لي‌دي داينا، ده‌لي. نه ادب اركان بيلر، نه بويوك- كيچيك قانار ده‌لي نظرم، بئله گزه‌رم- دئدي.

كدخدانين سؤزلريندن امنييه‌نين اوره‌يينه قورخو دوشسه‌ده، او اوزونو سينديرماييب.

– آنلامايير، اونو من آدام ائله‌ره‌م- دئيه، الينده‌كي قامچي‌سيني سول الي‌نين كفه‌سينه چاليب شاققيلداتدي. سونرا اوزونو حاجي‌ ممي‌يه توتوب:

– مشدي سن قالخ تئز اونو چاغير گلسين بورا بير- دئدي.

حاجي ممي ديك آياغا قالخيب، بير آز توموخوب سونرا ديلي توتار توتماز!

– حناب سركار چشم من گئده‌رم آنجاق اينانميرام بو آدام منيم سؤزومله دوروب بورا گلسين- دئييب اوتاقدان چيخدي. احمدآغا تئز اونون داليجا قاپي‌يا چيخيب:

– حاجي! فتاحا دي ‌كي امنييه آنلامايير، گليب ائلمه‌سين. چوخ اوزدن گئتسه‌ده اصلا” قورخماسين قاباغيندا دايانسين، هئچ غلط ائليه بيلمز- دئييب حاجي‌ني يولا سالدي.

چوخ كئمه‌دن حاجي ممي تووشويه- تووشويه اوتاغا گيريب:

– جناب سركار من دئديم كي بو آدام عاغيل‌لي باشلي آدام دئييل، ‌سيزه‌ده كدخدايادا ديشي‌نين ديبيندن چيخاني دئدي، مني ده آز قاليردي كي دولاشديرسين قويوب قاچديم- دئدي.

امنييه بو سؤزلري ائشيتمك هامان، او پهلوان قامتي‌له ديك اياغا قالخدي. او تفنگي چيگنينه ساليب-

– نئجه ياني گلمه‌دي؟ من اونون ده‌ده‌سي‌نين گؤرونا هولا قوشارام. كدخدا سن بير گل اونون ائويني منه نشان وئر- دئييب، اوتاقدان باييرا چيخدي. احمدآغا اونا ياخينلاشيب:

– سركار بويورون گئده‌ك! آنجاق خواهش ائديره‌م بير آز احتياط‌لي اولون! دئمگ اولماز بيردن سيزه ال زاد آچار كند ده بي‌آبر اوللوق- دئييه، امنييه‌نين جانينا داها دا ولوله سالدي.

***

زنگ آوالي‌لار لحظه- لحظه بو احوالاتي ايزله‌ييرديلر.. ايندي اونلار بوتون ائولردن ائشيگه تؤكولوب كندين مئيدانينا توپلاشميشديلار.

امنييه قاپ قارا بوغلاريني بارماغي‌له ائشه – ائشه، شاخ- شاخ قاباقدا گئدير، احمدآغايلا حاجي ممي‌ده اونون داليجا كندين كوچه‌‌لرينده يورويوردولر.

امنييه‌نين هئيتيني گؤرنده آرواد اوشاق قاچيب گيزله‌نيردي. فتاحين ائوي‌نين هنده‌ورينه ييغيشميش قوجالار، ايكي قات اييليب امنييه‌يه سالام وئرسه‌لرده، امنييه اونلارين قاباغيندان خان كيمي كئچيب، هئچ بيريسي‌نين سالاميني‌دا آلمادي.

قيز- گلين امنييه‌نين تفگيني داملاردان سئير ائتديكده، اوزلريني گويلره توتوب.

– آللاه اؤزون رحم ائله- دئييرديلر.

فتاحين ائوي بير اوزون كوچه‌نين سون قاپي‌سيني بارماغي‌لا امنييه‌يه نشان وئريب قورخا- قورخا كنارا چكيليب كئچيب امنييه‌نين دالي‌سيندا داياندي. بو آن امنييه‌نين تفنگي‌نين لوله‌سي‌نين تيتره‌مه‌سي احمدآغانين گؤزوندن يايينمادي. احمدآغا اونو بارماغي‌له حاجي‌ ممي‌يه نشان وئره- وئره بير گؤزده ويردي.

امنييه ساغ الينده‌كي قامچي‌نين دسته‌سي‌له فتاحين قاپي‌سيني ايكي دؤنه تاققيلاداديب ايكي قدم دالي چكيلدي. هله بير آن كئچمه‌ميش، امنييه‌ آرخاسينا دؤنوب:

– كدخدا دئيه‌سن ائوده دئييل‌لر، كئچين گئده‌ك- دئينده،‌ احمدآغا احوالاتي آنلاييب:

– يوخ رئيس فتاح ائوده‌دير بير آز دؤزسز گلر ايندي- دئدي. بو آن فتاح قاپيني آچيب، او مطلق امنييه‌يه توجه ائتمه‌ييب، گؤزلريني احمدآغانين اوزونه زيلله‌دي. احمدآغا امنييه‌نين آرخاسيندان باشي‌له فتاحا – يوخ! دئدي. فتاح اوزونو امنييه‌يه توتوب:

– اَيه نه دئييرسن؟! خبر آلاندا، امنييه بير آز چاشيب:

– فتاح سن‌سن؟ سوروشدو. فتاح جواب وئرمه‌ميش، يئنه احمدآغاني گؤزدن كئچيردي. احمدآغا بو دؤنه فتاحا الي‌له (وير) اشاره‌سي وئردي. فتاح اليني دووارا داياميش ال آغاجينا اوزالداراق، بيردن احمدآغا:

– سركار قوي قاچ! دئيه اؤزو دونوب گؤتورولدي. بونو گؤره‌ن امنييه اوخ كيمي توللانيب بير نئچه آدديم‌لا احمدآغايلا حاجي‌ممي‌ني آرخادا قويوب قاچماغا باشلادي.

احمدآغا گاهدان دالي دؤنوب الي‌له گل- گل دئيه،‌ فتاحي اونلاري قووالاماغا تشويق ائديردي.

فتاح ال آغاجيني توولايا- توولايا اونلاري قاباغينا قاتيب كوچه‌ آشاغي قووماغا باشلادي. امنييه:

– آي جماعات قويمايين بو كؤپك اوغلونو- چيغيرا- چيغيرا، احمدآغايلا حاجي ممي‌ده هاي كوي سالا- سالا كندين مئيدانينا چاتديلار.

سيلاحلي امنييه‌ني الي آغاجلي فتاحين قوودوغونو گؤرنده كندين ايچينه بير ولوله دوشدو. قادين‌لارين، اوشاقلارين جيغان- ويغاني گويلره اوجالميشدي.

كندين قوجالاري سيرايلا دوزولوب فتاحا ال چاليرديلار. امنييه‌نين بوركو باشيندان دوشوب كوچه‌ آشاغي ديغيرلانسادا، او، بير آن بئله دايانماييب، جماعاتا سؤيوش وئره- وئره قاچيردي. نهايت كندي بير دوره قاچاندان سونرا احمدآغا ژاندارمين قولوندان توتوب بير آچيق قاپيدان اونو ايچري ساليب، تئز قاپيني باغلادي. امنييه نفس‌دن دوشموش حيط دووارينا سؤيكه‌نيب، دانيشماغا قادير اولماديغيندان، هئي الي‌له كوچه‌ قاپي‌سينا طرف اشاره ائديردي. احمدآغا ياخشي- ياخشي- دئيه،‌قالخيب قاپي‌نين دالينا بير آغاج سؤيكه‌ييب قاپيني داهادا بركيتدي. امنييه بير آز تؤوشونو آلديقدان:

– آي كدخدا! بو گده دوغرودان‌دا ده‌لي ايميش وآللاه- دئينده- احمدآغا- هله آللاه اوزوموزه باخدي سركار ياخشي قورتارديق، ‌تفنگي آلسايدي اوچوموزوده اولدوره‌ردي دئينده- امنييه:

– پس قايداش آل آپار بو تفنگي تئز گيزلت- دئييب تفنگي چيگنيندن آشيراندا- احمدآغا – هله دورون بير كئچك ايچري- دئييب ائويي‌يه‌سيني سسله‌دي.

امنييه بير ايكي چاي ايچيب، بير سيگار آليشديريب اؤزونه گلديكده- اوزونو حاجي ممي‌يه توتوب- آي حاجي بير زحمت چك منيم بؤركومو تاپ گتير، من لاپ بي‌آبير اولدوم دئدي بو آن احمدآغا بيردن آياغا قالخيب:

– آي حاجي بو نه اويوندور بيزيم باشيميزا گلدي؟! من ايندن بئله بو كند ده باش ساخلايا بيلمه‌رم. گرگ گئدم بو گده‌ني گتيريب حسابينا يئتيشم- دئينده امنييه اونون قولوندان توتوب:

كدخدا سن آللاه تك گئتمه بو گده چوخ خطرلي‌دير، بير نئچه نفر ده اوزونله آپار- دئدي. احمدآغا بيردن شه‌شه‌له‌نيب: اَيه منه ده كدخدا دئييرلر- دئييب ائودن چيخاندا امنييه آغزي آچيلا قالميشدي.

***

كندين كوچه‌لريندن هله‌ده ازدحام داغيلماميشدي. دستگيرعلي احمدآغاني گؤرنده- آي اوزون گولسون كدخدا! اَشي سنين داي اويونون وار- دئييب بوتون جماعات گولوشدولر. فتاح احمدآغاني گؤره‌ن كيمي:

– باشينا دؤنوم آي كدخدا! اَشي مني ايشه قويدون؟ دئييرلر امنييه مندن شكايت ائده‌جك، مني دولاندير بالالاري‌نين باشينا قويما مني ورزغانا آپارسين- دئينده احمدآغا- لاپ ياخشي ايش گؤردون اَيه! ايندن بئله بو كند ده سنه بير نفر ده كژ باخا بيلمز. آنجاق امنييه يامان آجيقلانيب، دور گل گئده‌ك، اؤزوده هادير اول ها نه دئسه داي دينيب ائله‌مه، قوي بير آز آجيغي‌ سؤيوسون – دئيه فتاحي گؤتوروب امنييه‌نين يانينا گتيردي.

فتاح آستانادا، تير- تير اسير، امنييه‌نين اوتاغينا گيرمه‌يه قورخوردو. بيردن احمدآغا اونون ياخاسيندان توتوب هاي كوي سالا- سالا اونو ايچري چكيب: اَيه كؤپك اوغلي آشكارليق‌دي؟ نه‌دي؟ نئييه قودورموسان؟ دولتين‌ده مأمورونا ال آچارلار؟!- دئييب، ژاندارما بير گؤز ويردي. بئله اولاندا امنييه‌ده فرصتي فوتا وئرمه‌ييب، تئز قالخيب فتاحي ايليشديردي. بير ايكي شاپالاق چكينجه احمدآغا فورا” فتاحي امنييه‌نين اليندن آليب- سركار باغيشلا آنلاماييب- دئيه اونلاري آرالاشديردي.

بير نئچه چاي قليان‌لا غضب‌لر سويودوقدا، احمدآغا اوزونو فتاحا توتوب:

– اَيه ديلقيرين بيری ديلقير! سنين قوناغين وار آخي قالخ! دئييب فتاحي ائوينه يولا سالدي.

فتاحين قولتوغوندا هئشترخان گؤرنده زنگ آوانين بوتون قوجالاري اونون آردينجا امنييه‌نين باشينا توپلاشديلار.

سفره آچيليب ناهار دؤشننده، حاجي ممي:

– سركار دئيه‌سن داوا هئشترخان داواسي‌ميش- دئييب- هئشترخاني پارچالادي. غلام هئشترخانين قاناديني گميره- گميره:

– سل كال بس منيم لاپبالاليم نئجه اولسون؟- دئينده، امنييه هئشترخانين بودونو گميريب قورتاميشدي، او ال‌لري‌نين ياغيني ائشمه بوغلارينا چكه- چكه كدخدا امنييه اجازه وئرسن مرخص اولوم- دئييب، آياغا قالخدي…

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *