قفيل سورغو…
نريمان ناظيم
پایيزين کدرلي گونشي، گون باتارين قانلي گؤلونده بوغولديقدا، سون شوعآلاريني نيسگيل بویالي شهرین آتيشکالاريندان یـيغيشديرير. ائولرين بيرينده، گنج بيرقادين، تلفونون دستهیين، الينده سيخير. ذهنينين آلاتورانليغيندا یولونو ايتيرميش قادين، یالواريجي لحن ايله دانيشير: «… یوخ دوکتور! یوخ دوکتور! یوخ. سيزدن خاهيش ائلهیيرم ائوه تشريف گتيريز, خاهيش ائلهیيرم دوکتور…، بو ائشيگه چيخارتمالي دئیيل. هاميیا دئميشم، گئديب موسافيرته… بيلميرم نئجه دئیيم، عجيب- قريب دانيشير. اصلن باشا دوشمک اولمور نه دئیير, من کي گيجلميشم دوکتور. دئمهینن اولماز، گرهک گليب گورهسيز….».
آرواد دستهیي قویور, کاناپایا سؤیکهنيب, فيکره دالير، «صادق»ين ،کئچن اوچ گونده دانيشديغي قات- قاريشيق سؤزلر، اونون ذهنينده یان- یانا دوزولور: «یاني نه اولسون، بيردن- بيره بونون باشينا نه گلدي؟…” لحظهلر آغير – آغير سورونور. ساعاتـين سسي، آیدينجاسينا، ائوه یایـيلير. هله اوتاقدان بير سس گلمير، آمما او، هر لحظه «صادق»ين باغيرتيسين گؤزلهیير. آرتـيق ديکسينمير, عادت ائلهیيب سانکي! جاملارين داليندان قاتي قارانليق، ايچري سيزير. قارانليق آروادين ذهنينه چؤکور. گؤزلري باخارکن، اویغویا قاپسانير: قديم حیطلريدي. تای- توشلاري ايله «آیاق جيزيغي» اوینایيرلار. ساللاخ ممي، الينده بير پيچاق، یاللاه ديیه- ديیه دالانين پيللهلريندن حیطه یئنير. نئچه کلمه آناسيلا دانيشديقدان سونرا، الين آتـيب «مريم»ين خوروزونون قاناديندان توتور. آیاغينين آلتـينا قویور. «مريم»، نهسه اولاجاغي باشا دوشمهميش خوروزون باشي کسيلیر. باشسيز خوروز، مؤحکم بير حرکتله، قانادينی، ممينين آیاغينين آلتـيندان قورتارير. اؤزون باخچایا آتـير. اونون چيرپينتـيسيندان، باخچاداکي گول- گؤیهرنتـيلر، آل قانا بویانير. «مريم» قيشقيراراق، اؤزون، بویوک آناسينا یئتـيريب، اونون ديزلرين قوجاقلایير… اؤز قيشقيرتـيسيندانميدي, یوخسا «صادق»ينکيندان, آنجاق او یئريندن سيچرایيب، اؤزون اوتاغا یئتـيرير. «صادق» قان تر ايچينده ،گؤزلرين تاوانا ديرهیيب:«دی گور نه قدهر چابالایيب، «مريم»! گور نه قدهر چيرپينيب، «مريم»! جوملهسيني تـيکرار- تـيکرار دئديکده، سانکي، چيلغين روحونا سيغيناجاق آختارير. «مريم» مطبخه قاچير. بير قاب سو ايله قایيدير. سویو «صادق»ين اوزونه چيلهیيب، اونو اؤزونه گتـيرير. «صادق»، آستا- آستا توختایيب اویور. «مريم» ايسه، اویغودا گوردویو، اوشاقليق خاطيرهسينه، یئنيدن موراجيعت ائتديکده، خوروزو بير داها، ذهنينده یارادير: «سحرين آلا تورانيندا، خوروز خوجانيشينده غرور ايله, باشين ديک توتوب سوکوتو یاران باني ايله، یاتانلاري آیيلتماغا چاغيرير…. سونرا ساللاخ ممي…، اونون رحمسيز پيچاغي …. «مريم»ين، اورهیي سيخيلير, گؤزلري یاشالير…
درين دویغولارا دالميش «مريم»، زنگين چالينماسي ايله، آیيلير. دوکتور دي، «نئجهسيز مريم خانيم»- دئیه، ايچهري گلير. «مريم»له بيرليکده اوتاغا کئچيرلر. دوکتور، تختـين قيراغيندا اوتورور. الين ،«صادق»ين، آلنينا قویوب، سسلهیير: «صادق»…«صادق»، منم سياووش. دور گؤروم نهیيندي! ». «صادق»ين گؤزلري آچيلير. قيزارميش گؤزلرينين حاشيهسي شيشيب پورتموشدور. قيزمار نفسيندن، قایساقلانمیش دوداقلاري چاتلایيب، شيريم- شيريم اولموشدور. اوزون زامان دينمز- دانيشماز، دونوق باخيشلا، دوکتورو سوزور، سونرا سوروشور: «سن ده! گؤردون اونو؟ گؤردون نه گونه سالمیشدیلار؟! دئیيرم آخي شرفسيز…. بيشرف قيچيندان نيیه بس؟!… دئیير… دئیير، اوشاقلارين اللري اسيب، سؤزه باخ، سؤزه! اوشاقلارين اللري اسيب! باخ سؤزه… باخ سؤزه!»
الين اوزاديب، دوکتورون اليندن یاپيشيب، اؤزونه ساري چکير: «اليوي بير قوي باشيما, گؤر نئجه زوققولدایير, بئیينيم!… بئینيم، ترپهنيب سياووش. یوخ دای… یوخ، من دوزهلن دئیيلم. دای من دوزلمم، سياووش» دئیه، سوسور. سياووش، «مريم»ـه ساري دؤنور, «تبي چوخ یوخاريدي»- دئیه، سویو‌ایلا دسمال ايستهیير. «مريم» بير لهین سو, بير دسمال، بير شيشه آلکول گتـيرير. سياووش دسمالي ايسلادير، «صادق»ين آلنينا قویور. «صادق» دسمالي آلنيندان آتـيب باغيرير: «بوشلا بابا, بوشلا مني! من دوزهلن دئیيلم… من دوز… من دو…». سياووش اونون چيینيندن باسير: «دي دایان، قوی قيزديرماني یئنديريم. آخي!» دئیه، اونو یئنيدن یاتـيردير. «صادق»، آغير نفس آلا- آلا زاريلدایاراق، سایيقلایير.«گؤزومو یومورام، گلير یوخوما. ال چکمير او, گولور منه… او… او منيم سققهليمه گولور. آخی سنده کيشي سن؟ سن… سنده ده، شرف وار, یوخ، یوخدور. دوز… دوز دئیير او، یوخدور… یوخدور. گيريب منيم بئینيمه، سياووش. بئینيمده چابالير او، چيرپينير سياووش… چيرپينير…»!
سياووش، هلهده، اونون آیاقلارين تئشتده سرينلهدير. آمما قيزديرما، یئنن دئیيل. «صادق» ائلهجه صادالایير: «کئشگه…، کئشگه گؤرمهیئیديم اونو. آخ یانداخ کولو… یانداخ کولو… ، بير یانداخ کولون، الينده سيخيب ساخلاميش, ديک منه ساري, ائله او جور… ائله او حالدا، قولو قورویوب، قالميشدي… ائله بيل منه وئريردي، ائله بيل دئیيردي گل… گل! آقاي دوکتور بو دا دسته گول! گل… گل آپار قوی ددهوين گؤرونا… گه… گه… گل آپار!».
قيزديرما اطرافا یایيلير. «صادق»ين، بارلانميش آغزي، قوخویور. جووجولرينده قایساقلانميش آغ کؤپوک گؤزه چارپير. قه‌هر بوغازينا یيغيشديقدا زور ايله اؤزون توپلایير: «آخخ… سياووش بودو… بو… بو… بودونون بير طرفينين اتي، بوتون گئتميشدي, گئديب لاپ سومویينه چيخميشدي. دئیير: اوشاقلارين الي اسيب… بي… بيشرف…, بيشرفلر. گؤره سن آللاه، گؤر نه قدهر چابالایيب, گؤر نه قدهر چيرپينيب، سياووش, گو… گو… گؤر، نئجه… گؤر…, سؤزون چاتديرا بيلمهدن, «صادق»، هؤنکورتو ايله آغلایير. سياووش، «مريم»ـه دؤنور، دئیير. «گئت داوالاري گتير». سياووش الي اسه- اسه، بير آمپول سورنگه چکيب، «صاديق»ـا وورور. «صادق»، آستا- آستا ساکيتلشيب اویور. اوتاقدان چيخيرلار. سياووش بير ليوان سو ايستهیير، سویو ايچير، توما گئدير. سونرا سوروشور، جريان نهدي؟, هاچاندان بئله اولوب. «مريم» دئیير: «چرشنبه… او گئجه، چوخ بئواقت گلدي. گئجه یاريسئ ايدئ, گلدي، یاتدي. صاباح، سحر تئزدن، گون تازا چيخميشدئ کي، «پزشک قانوني»دن تئلفون ائلهديلر. شهلنديم. دئديم، ايندي کي پزشک قانوني اولماز. دئديلر، دستهیي وئر دوکتورون اؤزونه. آیيلتديم، دانيشدي. بيلافاصيله گئیيندي، گئتدي. بير ساعات چکمهدي قایيتدي. من، صبحانهني دؤشهديم ،گؤردوم کي، سيغار یانديردي. دئديم، آج قارنينا نه خبردي؟ دينمهدي. بير دنه چای ايچدي، یئنيدن، سيغار یانديردي .گؤردوم ناراحاتدي. سوروشدوم، نه خبر ایدي؟ دئدي، اؤلونو باسديرماق اوچون ايجازهنامه ايستهیيرديلر. گؤردوم، قههردن دوداغي اسير. دئديم، اونوندا ناراحاتچيليغي وار؟ دئدي، آخي ،جاوان قيز ايدي. سوروشدوم، کيمايدي… دئدي، بيلمهديم. دئديم نيیه اؤلموشدو؟ بيردن اؤزوندن چيخدي، اوستومه چيغيردي «مفتّيشليیي قورتاريرسان، یا یوخ». دای من بير سؤز دئمهديم. گئتدي ايدارهیه. ساعات اون بير ايدي قایيتدي. گئتدي اوتاغا. گئتديم گؤردوم، پالتارایلان تختين اوستونده اوزانيب، یاتـيب. ائله او یاتـيشدي کی یاتـيب. دایيم یوخو گؤرور. سايقیلایير یوخودا…،پيس وضعیتده یوخودان قالخير…».
سياووشون گؤزلري قالينين گوللرينه زيللهنيب، باشين قالديرمادان سوروشور:«خوب نه دئیير؟» «مريم»ين سسي، سانکي، قویودان چيخير: نه ديیهجک، الان دئديکلرينی، قاتـير قاريشديرير. بير سؤزو بلکه یوز دفه دئیير… من نئیلهمليیم؟ قورخورام دوکتور… قورخورام، دلي اولا آخيردا… «مريم»ي قه‌هر بوغور. سياووش، هئچ نه دئمهدن قویور«مريم» اورهیين بوشالدير. «مريم» گؤزلرينين یاشين سيليب، سارسيلميش حالدا، دوکتوره باخير: و نئیلهمهلييیک دوکتور؟- دئیه، گؤزلرين سياووشا تيکير. سياووش ” شاید ائوده توختادا بيلک، آنجاق، اگر بيماريستانليق اولسا، بوردا یاتا بيلمز, بوردا یاتسا، ايش چيخاردار»- دئیه، کؤکسون اوتورور.
٭٭٭
گونلر بير – بيري نين آردينجا گلير، سوووشور. سياووش، هر گون «صادق»ا باش چکير. اونون داوا – درمانينا چاليشير. «صادق» ايسه, ايندي، نه قيزديرير, نه سایقیلاییر، نه ده قيشقيرير. آنجاق، او هئچ بير سوز دانيشمير, دایيم توموب، فيکره دالير. سوسقون حالدا، گؤزو بير نوقطهیه ديره‌نير, اؤز ايچينده یاشایير، سون گؤروشده سياووش اونو محبتّله سوزوب، سونرا دئیير: «شوکور آللاها دای حالين یاخشيلاشيب. من دئیيرم، یاپيشاسان «مريم»ین، اليندن, بئش- اون گون گئده‌سن شيمالا. قوی بير آب- هاوان دیيشيلسين. «صادق» اونون جاوابيندا دئیير: فعلن کي استعفامي یوللاميشام ايدارهیه، اونون جاوابين گؤزلهیيرم. آه چکهرک, ادامه وئرير: «اوننان سونرا گؤروم نئیلهمليیم». بو لحظه، «مريم»، سؤزه قاريشير: «تصميمي وار گئده، آمما تک گئدير. مني آپارماق ايستهمير. دئیيرم تک گئتسن، من نيگران قاللام آخي…». «مريم» سؤزونون قالميشيني اوتور. نئچه لحظه سوکوت ايله اؤتور. سياووش باخيشي ايله «صادق»دان جاواب ايستهیير. «صادق» دئیير: «ايستيرم گئدم،آمما شيمالا گئتمک، ايستهميرم. من ایستیرم، بوزقوشا گئدم. «مريم»ي من اوردا نئیلهیيم. اوبادا منبم تار- تانيشيم چوخدور. آمما آرواديلان جور گلمز. بیر ده دوزون ايستهسن ايستهیيرم بير مدت تک اولام. تکليک آختاريرام. فقط ايستهیيرم تک اولام. ناراحات اولما «مريم», بو منه لازيمدي. من بير سایخاش یئر آختاريرام بير آز فيکيرلشم. بالاخره، من اؤز تکليفيمي گرهک مشخّص ائلهیم. آخي من بو دونیادا نهچيیم. سن ديء سياووش، من نهچيیم… نهچيیم؟». «صادق»، سؤزون بيتيريب سوروجو گؤزلرين، سياووشا تيکیر، سياووش قفيلدن طرح اولونموش سوآلين آرديندا، «من نهچيام؟» سؤزو اوتاغين فضاسيندا هرلهنير، قاسيرغا کيمي تاوانا, دره- دووارا دهیيب قایيدير و اونون، عکس صداسي سياووشون قولاغيندا سسلهنير: من نهچيیم؟ مریمین یاناغينا آخان یاش و نهایت بيردن- بيره آچيليب، هر نه اورهیينده وارسا، ائشيگه تؤکمهسي بير نئچه آنليق اولورسا دا، سياووشو بو بورولغاندان قورتارير: «… مني بو حالدا قویوب، گئتمه… من سننن ده پيس گوندهیم، «صادق»… بس مننن نيیه قاچيرسان…». «مريم» دانيشير، آمما سياووش اونون دئديگينين، اونون گيلایهلرينین بيرين ائشيدير، بئشين ائشيتمير. او اولدوغو فضادان چيخا بيلمهیير. «صادق» ايسه… مریمی توختاقليغا چاغيرير. اونون اورهیين آلماغا، چاليشير: «…. من ايندي اؤزومدن قاچيرام «مريم»… یاخشي اگر اؤزون ايستيرسن گل… یاخشي گل….»، آمما، سياووش، اؤز عالميندهدير. او اؤز ايچينده چيرپينير، بوغولان بير آدام تک، گاه سویون آلتـينا گئدير، گاه اوزه چيخير. هردن بير کلمه, یوخسا بير جومله ائشيدير، بیر شئیي سئچير، یئنيدن اؤزونه دالير. اونجا اوتاغين تاواني گئتديکجه آلچاقلاشير، دووارلار یاخينلاشير، اوتاق کيچيلير، فضا دارالير.
سياووش، هاچان ائودن چيخماسيني دویمادان، اؤزونون ائشيکده اولماسيني، حيسّ ائلهیير. گئجه، یاريسينا یاخينلاشير, یول سایخاش, شههر دينجدير، تکه- توک آدام گلير کئچير، آمما سياووش اونلارين هئچ بيريسين گؤرمور. «من نهچيیم؟» سؤزو اونون قولاغيندا سسلهنير. «صادق» اونون آردينجا گلير. اوز سورغوسون تيکرار- تيکرار سورور. سياووش بير آن حيسّ ائلهیير بو «صادق»ين سسي دئیيل، بو اونون اوز سسيدي. هویوخور، یان یؤورهسينه باخير، اؤزونه گلير: «من هارا گئديرم؟! یولو اشتيباه گلميشم!”- ديیه، گئريیه دؤنور.
زيل قارانليقدير. گؤزلري یاخشي سئچمير, گؤزلرين اوووشدورور. اوچ- دورد یول، گؤزلرين، مؤحکم یوموب آچير, سونرا یولا دوشور…