منصور کؤرپوسونون آلتیندا جوشغون آخان چایین سسینه آیاق ساخلاییب، چاغلایان سویا باخیرام. سون ایللرده مئیدان چایی‌نین جوشغون اولماسی چوخ نادیر گؤرونن بیر دوروم‌‌دور. بللی‌دیر گئجه یاغان شیدیرغی یاغیش، اوزون زاماندیر مورگوله‌نن مئیدان چایی‌نین مورگوسونو پوزوب. چاغلایان چایا باخدیقجا دوز چؤلونه دؤنوشموش اورمو گؤلونون نیسگیلی اوره‌ییمی سیخیر.
اؤنملی بیر ایش اوچون ائودن چیخسام دا، سو گؤرمه‌میشی کیمی، چاغلایان چایدان ال اوزه‌نمیرم. سویا باخیرکن دیلیمه بیر سؤز سوزولور: «یاشاییشیمیز سویا دویونله‌نیب! اما سویون هانسی اوجونا، هانسی بوجاغینا دویونله‌نییب؟»
چایین دؤنگه‌سیندن بورولوب، کؤرپویه ساری گلن آدام دقیتیمی چکیر. قاراچارشابی‌نین اوجلارینی بوینونا دویونله‌میش قادینی گؤرونجه سویون دویونو ذهنیمده آچیلمامیش قالیر.
قادین چای قیراغینداکی توللانتی‌لاری بیر به بیر الینه آلیب، اندر-دؤندر ائدیب، کارینا گلن‌ توللانتینی اؤزویله سوروتله‌دیغی آغیمتیل تلیس‌ین ایچینه آتیر، کارینا گلمه‌ینی ایسه یئنی‌دن جوشغون سویون ایچینه توللاییر. بو قادین‌ین یاشاییشی سودان باشقا، توللانتی‌لارا دویونله‌نیب دئیه، عاغلیمدان کئچیر. قادینی گؤرمزدن گلیب، یولوما دوام ائتمک ایسته‌سم ده، آیاقلاریم عاغلیمین منطیقینه قارشی چیخیب، خیاباندان بیراز آرالی، چای قیراغینا ائنن تپه‌جیکه ساری آددیملاییرام. تپه‌جیک باشیندا، آغاجلارین آراسیندا، ال‌آراباسی‌ ایچینده‌کی‌ توللانتی‌ دولو تلیس‌دن قالخان قوخو بورنومو آزارلاییر. آرابانین قادینا عایید اولدوغونو تخمین ویریرام. تپه‌جیک‌دن آستا-آستا آشاغی ائنیب، قادینا ساری گئدیرم. او ایسه منی گؤرجک انگینه سالمیش قارا ماسکی آغزینا چکیر. تپه‌جیک اته‌یینده، آغاجین کنارینا بوراخیلمیش بیر جوت دوغ شیشه‌سینی اونون تلیسینه آتماق مقصدی ایله الیمه گؤتوروب، قادینا یاخینلاشیرام. دینمیز-دانیشماز شیشه‌لری تلیس‌ین ایچینه سالاراق قادین دئییر:
– بلدیه‌دن گلیبسن، یوخسا بهداشت ماموروسان؟
«یول آدامییام» دئمک ایسته‌سم ده، ماسکادان دیشاری قالمیش گؤیرمیش یاناغی دقتیمی چکیر. قادین ایسه جواب وئرمه‌ییمه مجال وئرمه‌دن آرتیریر:
– پاتلئتیندن بللی‌دی خبرنیگارسان. اگر عکس سالماسان سوروشاجاقلارینا جواب وئره‌رم.
– من همیشه دئییردیم بس هر شئ‌یین حیاتی سویا دویونله‌نیب، اما یوخاریدان سنه باخیرکن باشا دوشدوم بو حیاتدا هر شئ بیربیرینه دویونله‌نیب، بیری الدن گئدیرسه ضرری او بیرینه ده توخوناجاق. مثلا سو الدن گئدیرسه، حیات الدن گئدر، تولانتی‌لار سویا آتیلیرسا، سویون ‌حیاتینی محو ائده بیلر.
قادین ترسه-ترسه منه باخیر. سؤزومو باشا دوشمه‌دیگی باخیشیندان بللی‌‌دیر. بیر آن توللانتی ییغیان بیر قادینا نیطق ائتدییم اوچون اؤزومو قیناییرام. قادین تلیسینه سالدیغیم شیشه‌لری چیخاریب، چاغلایان سویون ایچینه توللاییر. سویا چارپیلان شیشه‌لرین سسی‌نین عکسی قولاغیما چیرپیلیر، شیشه‌لر ایسه سویون آخیمینا قاریشیب، گؤزدن ایتیر. قادین شیشه‌لری چای ایچینه توللاماقلا منه سایقیسیزلیق ائتدی دئیه، دوشونورم، او ایسه یئنه دیله گلیر:
– شوشه ییغمیرام، هم پولا گئتمیر، هم یوکومو آغیر ائله‌ییر. او گون همکارلاریمدان بیری دئییردی خاریجه‌ده دوغ-نوشابه، موراببا، تورشو شوشه‌لرینی پولونان ملت‌‌دن آلیرلار. بوردا دا آلسایدیلار، بلکه من ده قاپی-قاپی گزیب، شوشه ییغاردیم.
«همکارلار» کلمه‌سینی ائشیتمکده، کهف یوخوسوندان آییلمیش‌لار کیمی اینانماز-اینانماز قادین‌ین سورمه‌لی گؤزلرینه زیلله‌نیرم. ندنسه بیر آن فروغ فرخزادین «خانه سیاه است» فیلمینده‌کی گؤزونه سورمه چکن جذام‌لی قادین‌ین تصویری ایلدیریم کیمی بئینیمه چارپیر؛ «همکارلار» سؤزو میخ اولوب، بئینیمه تاخیلدیغیندان دولایی سورمه چکن جذام‌لی قادین «همکار» سؤزونون کؤلگه‌سینده ایتیب، گؤرونمز قالیر.
«اولمایا توللانتی ییغماق رسما بیر پئشه‌یه چئوریلیب!»
قادین منیم عاغلیمدا یارانان سوالدان خبرسیز، تعجوبلو باخیشیمی سایمادان چای بویونجا ایره‌لی‌له‌ییب، تلیسی ده اؤزویله سوروتله‌ییر. منسه اونون آرخاسینجا آددیملاییرام. باشماقلاریم آلتینا یاپیشان پالچیقدان دولایی آز قالیر آیاغیمدان چیخسین. باشماقلاریمی داشا سورتوب، پالچیغینی تمیزله‌ییرکن دئییرم:
– سنجه کارینا گلمه‌ین توللانتی‌لاری سویون ایچینه توللاماق‌لا چایی داها آرتیق کیرلندیرمیرسن‌می؟
سسیم چاغلایان سویون سسینه قاریشیر. اونون منی دویمادیغینی تخمین ویردیغیمدا، قادین آیاق ساخلاییب، عجیبه سؤز ائشیتمیش کیمی منه باخیر. سونرا قارا رئزین چکمه‌لرینی سویا باسیب، پالچیغینی تمیزله‌یرک دئییر:
– ایکی‌جه شوشه بو کیر-پاس‌لا دولو لیل‌لنمیش چایا بیر شئ ائلمز.
قادینین چکمه‌لریندن قوپوب، سویا قاریشان پالچیق ایزینی ایزله‌ییرم:
– من یوخاریدان باخیردیم، سن کاریوا گلمه‌ین‌لرین هامیسینی سویا توللاییردین.
– بویون اوولیمدی بورا گلمیشم.
قادین‌نین دانیشیق سسینی ییغماق مقصدی ایله موبایلیمی چیخاردیرام. او ایسه درحال چیرکه‌سوو اللرینی اوزونه قویور:
– سنه دئدیم دا عکیس سالما!
سسینی ییغماق ایسته‌دییمی دئییرم.
– ییغما، سسیمی ده ییغما!
سونرا آرتیریر:
– کؤرپودن باخدیغینی گؤردوم. سن ده هامی کیمی یولونو توتوب گئده بیلردین، اما سایمازجاسینا یولونو توتوب گئتمه‌دیگین اوچون بولاری سنه دئییرم. یوخسا من ائله بئله‌سی هر کس‌نن دانیشان بیری دئیلم.
– سسیوی اؤزوم اوچون ییغماق ایسته‌ییردیم. بیر یئرده پایلاماق قصدیم یوخ ایدی.
– قولاغیوا نه گلیب؟ مه‌یر صاغیرسان؟ دئدیکلریمه قولاق آسسان، گؤرر دااا.
موبایلی چانتاما قایتاراریرام.
– نئچه ایل ایدی سامان مئیدانی‌‌نان سورخاب‌دا توللانتی ییغاردیم، سامان مئیدانی اولماسایدی من ایندی یئددی کفن چوروتموشدوم. مقاووا، مئیوه قوطوسو، اونون کیمی شئ‌لری ییغماقلا گون چؤره‌ییمی قازاناردیم. حتی آخشاملار تیرتدامیش بامادور، یئردیبی یئرالما-سوغانی، ازیلمیش مئیوه‌نی توکانلاردان ییغیب، ییغیشدیراردیم. بیر ایکی آی قاباق بیردارغاشاییر گلیب، اورالاری قوروقلادی، منی ده اوردان دیشاری سالدی، سایمادیم، گئنه گئتدیم، اوردا قالماغا دیرندیم، هم زحمتی آز ایدی، هم توکانچی‌لاری منی کئچیندیریردیلر، هم ده توللانتی‌لاری یاخجی پولا گئدیردی. بیر گون اورانی قوروغا آلان دارغاشاییردین آداملاری نه یئمیسن، توشولو آش؛ گؤزون پیس گون گؤرمه‌سین، نئچه نفره تؤکولدولر باشیما، آرابانی غارت ائله‌دیلر. هم بیر هفته‌لیک خرجیم باتدی هم ده جانیم شیل-کوت اولدو. ات دؤشه‌سه ایدیم قانچیل اولان یئرلر تئز توختاردی، اما ات تاپانمادیم. آز قالیر اوچ هفته اولسون، باخ، هله ده قانچیل‌ اولان یئرلر ساغالماییب.
قادین اوزونده‌کی ماسکانی آشاغی سالیب، یاناغیندان بوینونا کیمی اوزانان قانچیل اولموش یئرلری گؤستریر:
– بولاری یازما ها، یوخسا گئنه گلیب آجیق آچارلار.
– توللانتی ییغماق اوچون محله‌لرین قوروغا آلیندیغینی بیلیمردیم؟
– پاتلئتیندن بللی‌دی ناز-نعمت ایچینده‌سن. سن هاردان بیله‌جکسن کی داوا-آلیش-وئریشی کیمی، تولانتی ییغانلارین دا اؤزلرینه گؤره قوروق‌لاری وار.
– دؤیولدویونده شیکایت ائتمه‌دین‌می؟
– او دارغاشاییردلارینان باش-باشا قویماغا داششاق ایستر، منده یوخ ایدی، جانیم شیل-کوت اولاندان سورا آدام بالاسی کیمی دالی چکیلدیم. ایندی آوارالار کیمی بیر گون چای‌قیراغیندا، بیر گون منصوردا، بیر گون آبرساندا، بیر گون مارالاندا کاریما گلن توللانتیلاری ییغیب، گون چؤره‌ییمی قازانیرام.
– قازاندیغین‌لا دولانا بیلیرسن‌می؟
– هله کی حامام تونونده یاتانلارین گونونه دوشمه‌دییم اوچون قورو چؤره‌ییمی سویا باتیریب، یئیینده، آللاهیما شوکر ائلیرم.
– ندن توللانتی ییغماق یئرینه آیری ایش گؤرموسن؟ مثلا تمیزلیک شیرکت‌لرینده ایشلمک توللانتی ییغماقدان چتین‌دیر‌می؟
قادین بیراز دوروخوب، یئنه منه جواب وئرمه‌دن چایین دوزونده ایره‌لی‌له‌ییر. سویون قیراغینداکی ایسلانمیش بیر مقوانی تلیسه سالیب، منه ساری دؤنور:
– خبرنیگار اولوب-اولمادیغینی دئمه‌دین آخی!
– سن خبرنیگارلیغین نئجه بیر ایش اولدوغونو بیلیرسن‌می؟
– توللانتی ییغدیغیم اوچون دئییرسن بس داغ باشیندان گلمیشم! من ده سنین کیمی ماهواره‌یه باخارام هاا.
قادین‌ین جوابی منی اوتاندیریر، سوسورام. او ایسه آرتیریر:
– سنین کیم اولدوغونو بیلمیرم، اما منی گؤروب، کئچمه‌دیین اوچون نم نییه سنه قانیم قاینادی. سنه دوزنو دییه‌جم. بولوسن ندی؟ ائولرده ایشلمک ائله ده راحات دئییل، آدامین دالی سؤزلو اولور، بیلمیرسن سنی ایشه چاغیران آدام کیشی‌دی یوخسا آرواد، گونده بیر ائوده ایشله‌یندنه آدامین آدی پیسه چیخیر. نئچه ایلدی من بو توللانتی ییغماغین لئیلاجی اولموشام، بو ایش بیر جور قمار کیمی‌دیر، هر سفر زیبیل‌ قابلارینی قوردالایاندا قیمت‌لی بیر شئی تاپاجاغیمی دوشونورم. هردن بیر قیمت‌لی شئ‌لر تاپمیش‌لیغیم اولوب هاااا، ائله ماهواره‌نین پولونو زیبیل قابینا سالینمیش بیر کؤهنه کوتون جیبیندن تاپمیشدیم. بو توللانتی‌لارین قوخوسو ایلیک-سومویومه ایشله‌ییب، هامی بورنونو توتوب، اخ-پوف ائله‌سه ده، بو قوخو منه کار سالمیر، عئینیمه ده گلمیر. آدامین ادی‌نین پیسه چیخماسیندا یوز مرتبه یاخجی‌دی.
بو گونه کیمی بیلمیردیم توللانتی ییغماغین دا لئیلاجی اولارمیش. اونون سؤزلرینی دوشونورکن قادین‌ین گؤزلنیلمز قیشقیرتی‌سینا دیسکینیرم.
– گئده هارا؟ آرابانی هارا آپاریسان؟ او منیم آرابامدی؟
دؤنوب، تپه‌جیک‌ین باشیندا قادین‌ین توللانتی دولو ال‌آراباسینی خیابانا ساری سورن آدامی گؤرورم. قادین تلیسی چای قیراغینا بوراخیب، تپه‌جیکه ساری قاچیرکن دئییر:
– ایچیوه دورتوم شانس! گئده سن هاردان تاپیلدین! بوراخ او آرابانی، بوراخ، او منیم آرابام‌دی.
نه ائده‌جه‌ییمی بیلمیرم. قادین بیر آن دایانیب، منه باخیر. دایاندیغیم یئرده میخلانیب قالدیغیمی گؤرونجه قیشقیراراق تپه‌جکدن یوخاری قالخیر:
– گئده اووووی، آپاراما او منیم آرابام‌دی!
قادین‌ین منه باخان سورمه‌لی گؤزلری یئنه ده سورمه چکن جذاملی قادینی ذهنیمده جانلاندیریر. ندنسه بیر آن منه ائله گلیر جذام، عدالت دئییلن آنلاییشا دا یولوخوب، وجدان ایسه آستا-آستا چورویوب، ذره-ذره اینسانلیق مدنیتیندن قوپماقدادیر. . .
۱۴۰۴. ۰۹. ۰۱