گونش قیزیل ساچلارینی یئر اوزونه سرمهمیشدن
شافاق الین اوزاتمامیش، دان اولدوزون درمهمیشدن
یاریم اوچوق بئش دامخانین توسدو قالخیر اوجاغیندان
تیترهک، سولغونکؤرپهلری اویادیرلار بوجاغیندان
هر آنا اؤز بالاسینی ساریییبدیرکورهگینه
آتا باخیرکؤرپهسینه کدر چؤکور اورهگینه
زمیلرده، پامبیقلیقدا ایشلهمهگه گئدیر اونلار
الی خمیر قارنی آجدیر ایللر بویو بو اینسانلار
هر عائله بیر اربابین نؤکریدیر، کنیزیدیر
یورغون یورغون گلین- قیزین اورهگی غم دنیزیدیر.
بیر خیردا قیز آناسینین اتهگینی توتموش الده
آناسیلا یول گئدهرک دانیشیری شیرین دیلده:
– «مندن سونرا بوکتده هئچ بیرکیمسه ده اویانماییب
اولان گوندن بو گؤزلریم بیر یوخودان دویانماییب
الیمه باخ قابار- قابار، تای- توشلاریم هله یاتیب
منی گؤرجک قیزلار دئییر: – بودا اؤزون بیزه قاتیب-
دوغرو دئییر آمما قیزلار، نه دونوم وار نه باشماغیم
هئچ اونلارا دوغروداندا یاراشماییر یاراشماغیم
قیزلار گئدیر مدرسهیه من قالیرام قاپیسیندا
گئجه- گوندوز حسرت گؤزوم قالیر قاپی دالیسیندا
آل دونلودور اونلار، منیم اسکی دونوم یاماق- یاماق
من یئدیگیم یاوان چؤرهک، اونلار یئین بالدی، قایماق»
گؤزو یاشلی آنا باخیر قیزین توزلو تئللرینه
اورهک سازین دیللندیرن قابار زخمه اللرینه:
– «یازان یازیب قارا یازیم، سنه قوربان گؤزوم قیزیم
اورهگیمده نیسگیللره دؤزوم یوخدور دؤزوم قیزیم
اونلار گئین قیرمیزی دون سنین اورهک قانینداندیر
الیندهکی قابارلارین بهرین یئین گؤر اینساندیر
یوخسوللوغونکدر یوکون چکه بیلمیر داها اورهک
من ایشلهییم اؤزگه یئسین، چتین اولور بونا دؤزمک
آغیر- آغیر چتینلیکله گونکئچیردن بو اؤلکهده
من دئییلم یالقیز قیزیم، مینلری واردیر بلکه ده
یوخسوللوغون آلووندا قارسیلمیشام دؤنه- دؤنه
اودلانمیشام، کول اولموشام،کؤزرمیشم سؤن- سؤنه
اؤگئی- دوغما قورغوسونو داغیداجاق بیر گون زامان
گونش چیخیب اوفوقلردن سیلینهجک بو چن، دومان
هر یئردهکی مظلوملارین آه نالهسی اوجالیبدیر
هرکؤکلنمیش چینارکیمی ظالیملردن باج آلیبدیر.»
خیردا قیزین گؤز یاشلاری ایللر بویو آخار اولدو
یورغون گؤزو یول چکهرک ایللر بویو باخار اولدو
بو زامانلار حاقسیزلیغا اؤلکهمیزده عصیان اولدو
هر قاریشی، هر آددیمی باشدان باشا آلقان اولدو
مظلوملارین آهلاریندان اوفوقلر ده سارالمیشدیر
ظالیملرین داغلارینی دومان، چیسگین، چن آلمیشدیر
بوتون اؤلکه بیر سس ایله چاغیریردی آزادلیغی
غملریندن اوزاقلاشیب یاخین گؤروردو شادلیغی
قورخو بیلمز مرد ایگیدلر قاباردیلار ظالیم اوسته
ایتگین سالدی بو اؤلکهدن دیار- دیار سون نفسده
سعادتین بایراغینی گؤی اؤزونه اوجالتدیلار
عدالتین بیر گونویله ظالیملری قوجالتدیلار
عصیانچیلار سؤیلهدیلر بیر سسایله بو شعاری:
-«اکینچیلر بؤلسون گرهک قاریش قاریش بو دیاری
هانسی الکی قاباریلا دیریلدیبدیر بو یئرلری
بو یئر یالنیز اونونکودور»-
بو سؤز اولدو دیل ازبری.
یئددی نفرلیک هئیتلر اؤلکهمیزده های هایلادی
یئرسیز اولان اکینچییه هیکتار هیکتار یئر پایلادی
بئش عائله اربابلارا ایللر بویو اکین اکن
بیرجه قاریش اکین یئرین عؤمور بویو حسرت چکن
بئش هیکتار یئر بو عصیاندان هرهسینه چاتار اولدو
یوخسوللوغون قارا دئوی خستهلهنیب یاتار اولدو
خیردا قیزین گؤزوندهکی قان یاشلاری گولر اولدو
اورهگینده قالان عؤمرون شادلیغیلا سورر اولدو
آل دون آلدی، باشماق آلدی، چاتدی آرزو کاروانینا
آرزولارین اووسارینی وئردی اورهک ساروانینا
دویغولاری قاناد آچدی، آرزولاری چیچکلندی
انقلابین قودرتیله او کؤرپه ده اورهکلندی
اوراغینی آتدی یئره، قابار اله کیتاب آلدی
حسرتلره سون قویاراقکئچمیشلرین یادا سالدی:
– «یادیندادیر دردلی آنام یاخچی چیخدیق تمیزلیگه
منی ظالیم اربابیمیز آپاریردیکنیزلیگه»
– «یادیمدادیر گؤزهل قیزیم! گئتسین او گونلرگلمهسین
بیزی درده سالان فلک آغلار اولسون، هئچ گولمهسین
دوغولاندان ایندیهجک یوخسوللوغا من دؤزموشم
بو دونیادا یاشاماقدان ایللردیرکی لاپ بئزمیشم
آمما نئچه گوندورکی من سانکی تزه دوغولموشام
دنیز- دنیز آرزولارین دالغاسیندا بوغولموشام.»
بئش عائله شادلیق ایله گونلرینی سورر اولدو
قابار اللر امگیله آغلار گؤزلر گولر اولدو
بوندان سونرا شیرین یوخو اربابلارا قاچاق اولدو
بئش عائله اربابلارین گؤزلرینه بیچاق اولدو.
چالیشدیلار گئجه- گوندوز، ال تاپدیلار بؤیوکلره
یوخسوللارا ظولم ائتدیلر یئنه عالم گؤره گؤره
بیرکیمسهیه ال تاپدیلار اؤلکهمیزده سؤزوکئچن
بیرکیمسهکی یوخسوللارین اووج اووج قانین ایچن
– «عزیز دوستلار دئیین گؤروم مندن یئتر نه قوللوق وار
سیزی منه توشودانلا بیزیم عیال قوهومدولار؟»
– «بیزه لازیم اولان سنین بیرجه مؤهرونله سؤزوندور
بیر ده سندن ایستهگیمیز: – بیزه دایاق سن اؤزوندور!»
گوله گوله بئله دئدی:- «جان ایستهیین مؤهور نهدی-»
یوخسوللارین علیهینه بئله یازیب مؤهورلهدی:
«یوخسوللاردان اربابلارین هئیت وئرمیش یئرین آلین!
هانسی بیری یوخ دئیرسه قولو باغلی حبسه سالین!»
یاخچی پیسی آز یاشیلا او خیردا قیز تئز قانیردی
یانار اودو یوخسوللوغون اورهگینده هئی یانیردی
بیر گونوسو مدرسهده شیرین- شیرین دانیشیردی
اوشاقلارین اولدوزویلا نحس اولدوزو باریشیردی
نه گؤردوکو بئش سیلاحلی آپاریرلار آتاسینی
اربابلارین آروادلاری بیرچکلهییب آناسینی
قارا گونلر درده سالدی قیزین یورغون اورهگینی
خزان یئلی الدن آلدی آرزیسینی، دیلهگینی
یولداشلاری گوله گوله اوخ ووردولار اورهگینه
ظالیم فلک زهر قاتدی مظلوملارین چؤرهگینه
بو اولایدان یازیق قیزین بوللو پاییکدر اولدو
چیچکلنمیش آرزولاری سولغونلاشیب هدر اولدو.
یئنه گونش قیزیل ساچین یئر اوزونه سرمهمیشدن
شافاق الین اوزاتمامیش، دان اولدوزون درمهمیشدن
یاریم اوچوق بئش دامخانین توسدو قالخدی اوجاغیندان
تیترک، سولغونکؤرپهلری اویادیرلار بوجاغیندان
هر آنا اؤز بالاسینی ساریدی اؤزکورهگینه
فلک یئنه مظلوملارین زهر قاتدی چؤرهگینه
زمیلرده، پامبیقلیقدا ایشلهمهگه گئدیر اونلار
الی خمیر قارنی آجدیر ایللر بویو بو اینسانلار.
( سون )
