(اینسان‌سئور و عدالت‌پرور معلیمیم اوستاد احمد علیزاده‌نین شرفینه)
معلم آدینی داشییان کیمسه؛
بیلمیرم بو آددا نه حیکمتمی وار-
ائشیدن زاماندان معلم سؤزون
سؤنوک اوره‌ییمده بیر ایشیق یانار.
سؤیکه‌نیر هر سحر دوشونجه‌سینه
باخیش‌لار جاواب‌دیر، باخیش‌لار سووال
محبت نغمه‌سی دوداقلاریندا
گؤزونده یاتیبدیر بیر دنیز خیال.
خئیرله شر آرا بیر سینیر چکیر
کؤرپه خیاللارا اؤز دوشوندوگون.
توکنمز سئوگیله، سونسوز هوسله
صاباحین یوکونو او چکیر بوگون.
هوپور روحوموزا محبتلی سؤز،
یاشاییر بیزیمله اوره‌ییمیزده.
سانکی بیر شاعردیر اوره‌یی قالمیش
چمنده تیتره‌شن شئهلی نرگیزده.
دوشونجه، اینسانلیق هر بیر بئیینده
معلم سؤزوندن قیدالانیبدیر.
کسگردن دوشوب‌سه معلم سؤزو
جهالت قیلینجی جیلالانیبدیر.
منیمده روحومو آلیبدیر بیری،
آلیب ساخلاییرام اونون گوللرین.
نئچه ایل کئچسه ده او واقتدان بری
گزیرم اؤپمه‌یه اونون اللرین.
سؤزونده اووسونو، سئحری واریمیش،
ایلیشیب قالمیشام او زاماندایام.
ائله اووسونلاییب کؤرپه روحومو
دالینجا هئی قاچام بو گوماندایام.
«سید»م هر سحر شیرین یوخو تک
گؤزلریم اؤنونده بیر خیال سوزر.
قار تک آغارسا دا ساچیم ساققالیم
گؤزلریم هر سحر معلم گزر.
