بنؤوشه
سید جلیل حسینی
دومانلی داغلاردان
مئح آشیب گلیر؛
چمنه اله‌ییر شئح
یاواش- یاواش.
یاشیل دون گئییمیش
چؤل ده
چمن ده؛
اتگی ایسلانیر تر بنؤوشه‌نین،
سحر نسیمی‌نین ایلیق لایلاسی
اوخویور
اوره‌یین بیر قرنفیلین.
سارماشیق بوی آتیر
تر بنؤوشه‌نین قیوریم تئللریله
باغلاسین بئلین.
نه خومار باخیرسان گولوم حیاتا؟
هانسی دونیالارا
یول چکیر گؤزون؟
سن
اینجیک ده‌ییرسن منیم گؤزومه
عؤمرونون آزلیغی
اینجیدیر سنی؟
بلکه ده
حیاتین بوتون سیررینی
او خومار گؤزویله
گؤرور بنؤوشه!
سؤیله‌ییر
گؤیلرده اوچان قوشلارا،
سؤیله‌ییر
اوزونده شئح مینجیغینا،
دوشونمور دئیه‌سن کیمسه سؤزونو
او دور کی بوینونو بورور بنؤوشه.
