قوربانلیق سیمفونیسی
چئویرن: محمد احمدی‌زاده
ترجمه: محمد احمدی‌زاده
محمد احمدی‌زاده
00:00
00:00

حیطین بیر گوشه‌سینده‌ قهوه‌ رنگده‌کی قویون مؤحکم بیر ایپ‌له‌ دیوار دیبینه‌ باغلانمیشدی. طالعیندن خبرسیز بئچارا قویون، قاباغینا تؤکولموش یونجادان یئییردی. معصوم باخیشلاریلا دا هردن بیر باشینی قالخیزیب اطرافا باخیب مله‌ییردی.
او گون حیطده‌ عجایب بیر جوشغو و حرکت واریدی. هر کس اؤز ایشی‌له‌ مشقولیدی. نابات ننه‌ پنجره‌نین یانینداکی تندیرین باشیندایدی. کریم، من و بهرام سیرا اوستونده‌ چکیش بکیش ائله‌ییردیک.
بهرام، «ایندی سیرا منیمدی» دئدی و بیر دسته‌ یونجانی اوراغین آلتینا اؤتوردو.
اوجا بویلو عوض بابا اوستوموزه‌ بیر دئییندی و سونرا اوراغین دسته‌سینی آشاغی ائندیردی. رحمتلیک بؤیوک بابامیز ائله‌ دئیینگن بیر قوجایدی. مهربانیدی، آمما تئزـ تئز حیرصلنردی. حیرص دوزو دا آرتسایدی بیرـ ایکی یامان یاووز ائشیتمه‌یی اوندان گؤزله‌ملی‌دیک.
ائوین گیریش قاپیسی یانیندا کیچیک بیر باققال توکانی واریدی. چوخ شئی ساتمازدی، بیسکیویت، شیرنی، دوز، قند، فاب و ریکا، هامیسی بو قده‌ر. دئیردی: «محمد بالام! گئت قوربان عمی‌دن منه‌ بیر دنه‌ ایشملی آل. ساریسینی آل، قره‌ آلما ها آماندی!»
نئچه‌ بینا اوزاقلیقدا قوربان عمی‌نین توکانینا گئدردیم و «بابام ایشملی ایستیر» دئیردیم. او دا سوروشاردی: «کانادا یوخسا کوکا؟»
عوض بابا عؤمرونون سونونا قده‌ر هئچ کوکاکولا و کانادا آدلارینی اؤیرنمه‌دی. کئشکه‌ بیز ده‌ اؤیرنمه‌سئیدیک کؤکوندن. حیاتیمیزدا چوخلو بوش شیئلر اؤیرندیک، زهر کیمی شئیلر، هئچ ده‌ ایشه‌ یارامایان او اوجوز شئیلر، و اؤیرندیکجه‌، بیر او قده‌ر ده‌ دیرلریمیزی قوربان ائتدیک، طالعیمیزدن خبرسیز بئچارا بیزلر.
اوراغین خیرچ – خیرچ دوغراما سسی، قویونون مله‌مسی، بیز اوشاقلارین قیشقیر- باغیریشی، نابات ننه‌نین تندیر باشیندا اؤزـ اؤزونه‌ اوخویوب میزیلداماسی و بابانین سوره‌کلی دئیینمه‌لری، حیطده‌ یوکسک سسلی بیر سیمفونی یاراتمیشدی. سانیرام او سسلری موللاحسن کوچه‌سینده‌ هامی ائشیدیردی. یقین او سیمفونینین سسی، کوچه‌ده‌ داها دا ایره‌لیله‌ییب و چای ایچینده‌ دلی‌خانیمین قولاغینا بئله‌ چاتیردی.
دلی‌خانیم آریق، جیلاز بیر خانیمیدی. گوللو -گوللو چادیراسینین ایکی اوجونو بوینونون آرخاسیندا دویونله‌ییب باغلاردی و چوخ زامان چای ایچینده‌ گزردی. دلی‌خانیمین هئچ کیمسه‌یه‌ آزاری کئچمزایدی، آمما ندنسه‌ بیز اوشاقلار اوندان یامان قورخاردیق. اوزونده‌ درین بیر کدر واریدی. گؤزلریندن غم یاغاردی. بلکه‌ده‌ او بیزیم گله‌جه‌ییمیزدن نیگرانیدی. دلی‌خانیم آخشام چاغی یازیق قویونون باشی کسیله‌جه‌ییندن خبری واریدی. هر زمان عصبلی بیر خانیمیدی، او بیلیردی گئت ـ گئده‌ چوخ شئیلریمیز قوربان اولاجاق.
کانادادرای شیشه‌‌سینی وئرردیم بابایا، او دا منه‌ ان سئودیگیمدن، بیر دنه‌ کاکوولو بالیق شیرنیسی وئرردی. او بالیق شیرنی‌لری چینه‌ییب ده‌ اصلا تئز یئمزدیم. ائوه‌ یئتیشنه‌ قده‌ر آغزیمدا ساخلاردیم و کاکوونون دادینی چیخارداردیم. او بالیقلار یاواش- یاواش اریییب و گونون اورتاسیندا کوچه‌نین باشینا گئدردیلر؛ دلی‌خانیمدان گیزلی چای ایچینی رد اولاردیلار و قوروچایا دوشوب اوزمک اوچون جان آتاردیلار. دلی‌خانیم اونلاری گؤرونجه‌ دئیردی:
– قوربانیز اولوم، اورا گیرمه‌یین. او چای قورویاجاق. چایین جوشغولو سسی باتاجاق. نابات ننه‌نین تندیری سؤنه‌جک، خیطاب یئمه‌گینین نه‌ اولدوغو آرتیق اونودولاجاق.
نابات ننه‌ خیطابلاری پیشیریردی و بیرـ بیر آلمینیوم مئژمه‌یی‌نین ایچینه‌ دوزوردو. تندیردن چیخان چؤرک قوخوسو، پیشمیش تره‌ اییسی هامینی مست ائله‌ییب کئفلندیرمیشدی. و…
بیردن، کریمین قیشقیریق سسی هر کسی اویاندیردی. ساغ الیندن قان آخیردی. اورتا بارماغی‌نین یاریسی کردیده‌ دوغرانمیش یونجالارین ایچینده‌ایدی.
حسن داییمین خانیمیسی گوهرین «یاحسین!» سسی حیطده‌ کی بوتون سسلری باسدیردی. اونون ناله‌سیندن قویونون مله‌مه‌ سسی بئله‌ ائشیدیلمیردی، یئره‌ دوشن بارماق تیکه‌سینی گؤتوروب کسیلن بارماغین اوجونا سیخیشدیردی. بلکه ده‌ اومید ائدیردی تکراردان یاپیشسین او کسیلن بارماق…
دلی خانیم کاکوولو بالیقلارا دئدی:
– دایی خانیمی گوهرین ناله‌لرینی دینله‌یین. قوربان ائتدیینیز بارماقلار بیرداها یاپیشمازلار. قاییدین قالان بارماقلارا صاحاب چیخین!

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: 2 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

قوربانلیق سیمفونیسی

محمد احمدی‌زاده
www.ishiq.net

آذربایجان ادبیات و اینجه‌صنعت سایتی