آلما
چئویرن: علی صمدی
ترجمه: علی صمدی
علی صمدی
00:00
00:00

یاش آتدیم قورو گلدی
گؤزومون نورو گلدی
بو آرخی کیم آریتدی
سو بئله دورو گلدی
(بایاتی)
آرخ حیط‌ین اورتاسیندان کئچیردی. بو آرخ «سو دره‌سی»نین باشیندا «بویوک چای»، سونرا کندین ایچیندن کئچن آنا آرخدان آیریلیب و «چیله محله‌سی»نده اولان بوتون حیط‌لری بیر بیرینه جالاییردی. آرخین اوتاییندا دالان، حیط قاپیسی، سول طرفده تندیر چارداغی، داها سول دا توت آغاجی وار ایدی کی بیر بوداغی کوچه‌یه ساللانیردی و کوچه‌ده اوینایان اوشاقلارین توت پایلارینی ساخلاییردی. ساغ طرفده دؤوره‌سی چیق و چپر ایله توتولان کردی کوله وارایدی؛ هانسی کی ائوین که‌ور، گوی سوغان، نانه، مرزه و ریحانی اوردا عمله گلیردی. کردی کوله او بیری باشدا ایکی اوتاق بیر قهوه‌خانه‌دن عبارت اولان ائوین بالقونونا چاتیردی کی اوردا اوچ قیزیل اوزوم، بوداقلارینی تارمالارا آسلاییب اوتاقلارین قاباغیندا یام یاشیل کؤلگه‌لیک قورموشدولار. بالقون بیر قاپی ایله قهوه‌خانایایا جالانیردی و قوناق اوتاغی‌نین گؤی بویالی ایکی پنجره‌سی ایسه بالقونا و اوردان کردی کوله‌یه باخیردی. حیط‌ین سول طرفینده هابئله دام وارایدی کی بالاجا پنجره‌سی نیفی‌یه یاخین یئردن، یاناشی کوچه‌یه آچیلیردی. بوردا قیش گون‌لری چورک یاپماق اوچون تندیر، دیوار اوجاغی، بیش دوش آلت‌لری، قاب قاجاق، چاناخ چومبز، الک قلبیر، بوغدا تایلاری، مکه قونداقلاری وآیری قیویر زیویر وار ایدی.
حیط سس‌سیز سمیرسیز دولغون بیر یای گئجه‌سی‌نین اولدوزلو و سرین قوینوندا گئجه‌له‌ییردی.
حیط دن کئچن بالاجا آرخین سولاری قونشو حیط‌ین گیلیف‌یندن گیررکن اوچ قاریشلیق بیر شیریمدان تؤکولرک حیطی سو سسی و یاز نفس‌یندن داشدیریردی. سو اوزو ایله قارلی زیروه لر و یاشیل دره‌لرین مئهینی و شئهینی گتیریردی. اوغلانا ائله گلدی کی آرخ، بهشت باغلاریندان آخیب گلیر. سولار یاشام‌ین ازلیندن ابدینه ساری آخماقدا ایدیلر سانکی. سویون سرینلیگی ایلیگه ایشلیر و گوموشو کؤپوک‌لری اورک سووزلوغونو سوواریردی. جاماخ و بالیق قوخوسو اوغلانین وارلیغینی چولقاییردی. لحظه‌لر اوزانان کیمی ایدی. اوغلانین اورک دویونتولری بئله هوپموشدو. نفس چکمک احتیاجی دویموردو. سانکی هر نه دایانمیشدی، بیرجه حیط‌ین اورتاسینداجا آخان آرخدان ساوای، آی‌سیز، دی گلدین اولدوزلو بیر گئجه ده. بو مونیس گئجه ده قارانلیق اوکووار اوزونو گؤرسدیر و اولدوزلار اوکووار گؤزللیک ساچیردیلار. سایریشان اولدوزلارین گوی ایشیقلاری آرخدا آخان سویون سرین نفسی کیمی جانا یایلیر و سومویه ایشله‌ییردی. بیر دن گیلیفدن حیطه بیر قوجاق ایشیق دوشدو. ایشیق، آینا سولارین اوستونده شیغاییب تندیر چارداغی و توت آغاجینی آدلادی و آشاغی گیلیفدن ائشیگه، یاناشی کوچه‌یه، یول آلدی. اوغلانین سوسقون اوره‌گینه آزجا هنیر گلدی. اوره‌گی دؤیونمه‌یه باشلادی، دؤیونتولر گئت گئده چوخالدی، ائله کی دؤیگولری قولاق پرده‌لرینده بئله، دؤیولدو: «حتماُ فیروزه قاب‌لاری یوماغا گلیب.»
فیروزه قاب‌لاری آرخین قیراغینا قویدو؛ سونرا سلیقه ایله یویوب سودان چکدی، یاشیل رنگلی سله‌سینه ییغدی. فیکرینه بئله گلدی کی فناری‌نین ایشیغی گیلیفدن آشاغی حیطه دوشوب. بو حالدا یونگول بیر مئه اسدی. آرخین قیراغیندا اولان آلما آغاجیندان بیر قیرمیزی آلما سویا دوشدو. قیز آلمانی توتماغا جان آتدی، آما شیلتاق سولار قیزجیغازین اوزون بارماقلاری آلمایا چاتمادان آلمانی آخیدیب گیلیفدن کئچیردیلر. اوغلانین گؤزلری، هله سودا عکس اولان ایشیق شیرناقلاریندان دویمامیشدی کی کیچیک شلاله‌دن بیر قیرمیزی آلما دوشدو: شاراپ… بیر گلین آلماسی!
اوغلان گؤیده آلمانی توتدو و اختیارسیزجاسینا اوره‌گینین تکیندن پیچیلدادی: فیروزه…….
بئله لیک له اونلار ایلک اوشاقلاری‌نین آدینی «آلما» قویدولار. بویا باشا چاتسین.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: 2 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

آنا

آلما

علی صمدی
www.ishiq.net

آذربایجان ادبیات و اینجه‌صنعت سایتی