ایکی اوچ گون ایدی بیزیم قهوه‌خانایا گلیر، دینج بیر کؤشه‌یه چکیلیب، آکواریومدا ترپه‌شن بالیق‌لارا زیلله‌نیر و قلیانی سوموروردو. بو یئر آدامینا اوخشامیردی. چای-قلیان پولو اولمادیغیندان ساعاتینی گیروو قویموشدو یانیمدا. بیر گون گئج ساعاتلارا قده‌ر قهوه‌خانادا قالدی. گؤز آلتی منی سوزور، یالاندان الینی سالیردی نه‌ایسه. ال-آیاق چکیلندن سونرا، اوتانا-اوتانا: — «منی بو قهوه‌خانادا ایشله‌درمیسن؟!» -دئیه سوردو.
من ده: — «آی قارداش، بو قهوه خانادان‌ نه چیخیر کی، هله شاگیرد ایشله‌دم!» دئدیم.
بونو دا دئییم کی، بو کیچیک شهرده منیم ایشلتدیییم قهوه‌خانادان یوخسول قهوه‌خانا بیر ده منیمکی‌ ایدی. خیاوان قیراغینا گوجوم چاتمادیغیندان، دالدا بیر محلله‌ده کیرالامیشدیم بو قهوه‌خانانی. هئچ بیر ایمکانات بئله یوخوم ایدی. ایمکانسیزلیقدان، یئمک اوچون تکجه اوملئت و پنیر چؤرک تاپیلا بیلردی. اصیل ایشیمیز آجی چای و قلیان ایدی.
— «هئچ بیر دستمزد ایسته‌میرم، بیر قالماق یئری و یئمک-ایچمک منه بس ائده‌ر» دئدی.
۲۵ یاشیندا، اورتا بوی، گولر اوز و ساکیت بیر اوغلان ایدی. نه ایسه گولوشو بیرآز غملی و زورلوقلو گؤرونوردو. ذئهنی همیشه مشغول گؤرونورسه ده، ایش‌لرینی واختلی-واختیندا، یئرلی-یئرینده گؤرور، بالیق‌لارین سویونو عوضله‌ییب، یئمینی وئریردی. موشتریلرله ادب و نزاکتله رفتار ائدیردی. اوتانجاق سیر-صیفتیندن دوروستلوک و دوزلوک یاغیردی، آنجاق بو شهره سورگون ائدیلمیش اولدوغونو سؤیله‌ییردی. آنلاشماغیمیزا باخمایاراق، من هردن بیر، بیر جیب خرجلییی ده وئریردیم اونا.
بیر ایله یاخین بو قهوه‌خانادا باهم ایشله‌دیک. اوزوموز بیربیریمیزه اؤیره‌نمیشدی آرتیق. سؤز ائشیدن و یانیملی بیر اوغلان ایدی. سؤزه یاخشی قولاق آساردی. اوره‌یی یاناردی آداما. بیر گون، قهوه‌خانا خلوت ایدی. ایکی چای سوزوب، بیر قلیان چاغلاییب، اوردان-بوردان دردلشمه‌یه باشلادیق. اپ ایچینه قاپالی بیریسی‌یدی. من دردیمی تمامی‌یله آچیب، اونا سؤیله‌دیم. بئش یاشلی قیزیم آکواریوم قارشی‌سیندا بالیق‌لارلا دانیشیردی. حیات یولداشیمین بؤیره‌ک‌لرینین چورومه‌سینی و تئزلیکله عملیات اوچون اوتوز میلیون پول حاضیرلامازسام، حیات یولداشیمین حیاتی‌نین تهلوکه‌یه دوشه‌جه‌یینی اونا دانیشدیم. الینی بالاجا قیزیمین ساری ساچلارینا چکیب، اوزوندن اؤپوب بیر آه چکدی: — نیگران اولما، دوزه‌لر! دئدی.
ائرته‌سی گون قهوه‌خانادا ماسامین اوستونده بیر گونده‌لیک(روزنامه) گؤردوم. هئچ بیر گونده‌لییه آبونه دئییلدیم ده. گونده‌لییی، بورایا کیمین قویدوغونو بیلمه‌دن، گونده‌لییی گؤتوروب بیر کؤشه‌یه چکیلدیم. ایلک صفحه‌ده شاگیردیمین شکیلینی گؤرونجه ‌شاشیردیم.
آگهی‌ده: «بو قاتیلی هر کس اله وئرسه، اوتوز میلیون جایزه‌سی وار» دئیه، شکیلین آلتینا یازیلمیشدی. گونده‌لییی گؤتوروب حئساب-کیتاب ماساسی‌نین آرخاسینا کئچیب هئچ فیکیرلشمه‌دن نؤمره‌نی توتدوم. او، سونسوز بیر آرخایین‌لیق‌ ایچینده تمیزلیکله مشغول ایدی.
یاریم ساعات سونرا ایشیمدن پئشمان اولموشدوم. آنجاق پولیس‌لر منه بیر باغلی پاکئت وئریب، اونو یاخالاییب، ماشینا دوغرو آپاردیلار. اونو منیم لوو وئردیییمی بیلمه‌سین دئیه، یالاندان ساختا اویونلار چیخارتماغا باشلادیم. او منه باخیب اوره‌کدن و ایچدن‌لیکله گولومسه‌ییردی. بو بیر ایلده، بو آرخایین و رضایت دولو گولوشو ایلک دفعه‌ ایدی اونون اوزونده گؤروردوم. گولوشونده‌کی صداقت و صافلیق‌دا اولان آینادا، نه قده‌ر کیچیک و چیرکین اولدوغومو آچیق آیدین گؤردوم اؤز گؤزلریمله. اؤزومه اؤلوم آختاردیم. ایختیارسیز اولاراق گؤزلریمین یاشی آخیب اوزومه تؤکولدو. ایلک گؤروشوموزده، قهوه‌خانادا گیروو قویدوغو ساعاتی اونا گئری وئرمک ایسته‌دیم. آلمادی: «نئینیرم! منه ساعات لازیم دئییل» دئدی. ماشین حرکت ائله‌ییب، گئتدی. نسه بیر یئرده ایشغال اولدوغونو، یا فداکارلیق ائده‌رک بیر قتلی بویون آلدیغینی دوشوندوم. او بؤیوکلوکده اینسان قاتیل اولا بیلمزدی.
هه آتام بالاسی! نه‌یینی سؤیله‌ییم داها؟! ایندی اؤزومدن آجیغیم گلیر. الیمدن نه گلر آرتیق؟! ماسامین اوستونه قویدوغو او گونده‌لییی سونسوز بیر اوزونتو و شرمنده‌لیک ایچینده جیریب یاندیردیم. حیات یولداشیم عملیات اولوب حیاتا دؤنموشدو. قهوه‌خانانی ییغیشدیریب، خیابان قیراغیندا بیر ساعات توکانی آچدیم. الیمه یاخشی پیس هر جور ساعات گلیر گئدیر. آلیب ساتیب عائیله‌می دولاندیریرام. اونون باغیشلادیغی او ساعاتی، دونیانین هئچ بیر ساعاتی‌یلا ده‌ییشمه‌رم…