اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: روح‌انگیز پورناصح
ترجمه: روح‌انگیز پورناصح
روح‌انگیز پورناصح
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

ائنسیز، اوزون کوچه‌لرینی فولوت سسی دولدوروب. هانسی ائودن گلیر بو سس؟ باشا دوشمور. چالانی گؤرمه‌سه ده، نه تهر چالدیغینی گؤزونون اؤنونده جانلاندیرا بیلیر. فولوتو ایکی الی له ساغ طرفینده ساخلاییب، آغیز یئرین دایاییب آلت دوداغینا، باجاسیندان اوفله ییر. بارماقلارینین هر بیرینی فولوتون بیر باجاسینین باغلانمامیش قاپاغینا قویوب. بیر سیرا بارماقلارینی گؤتوروب باشقالارینی قویور. آچیق باجالاردان سس چیخیر. ائله بئله سس دئییل، آدامین ایلیگینه ایشله ین سس! هر دن دیلینی چیخاریب دوداغینی یالاییر. بارماقلارینی ائله یومشاق، ائله باجاریقلی اوینادیر کی، آدام دئییر سحردن آخشامادک اوتوروم باخیم. فولوتدان چیخان سس سئحیرلی اولسا دا اوره یینی داریخدیریر.
هر دؤنه فولوتونون قوطوسون آچیب پارچالارینی بیربیرینه تاخاندا، بونون اوره یی توتولاردی. قورخاردی. دئیردی بس یئنه ده آیریلیق هاواسینی چالاجاق. یوخسا ائله دئییلدی؟ هر دؤنه اوزاغا گئدنده فولوتونو گتیریب چالاردی. ائله آیریلیق هاواسی اولوردو دا.
سون دؤنه بس نه دن چالمامیش گئتمیشدی؟ بلکه ده بونجا اوزاق گئتمک ایسته میردی؟ چوخدان بری فولوت سسی ائشیتمه میشدی. ائوه یاخینلاشاندا فولوتون سسینی اؤز ائولریندن ائشیتدیکده، هویوخوب یئرینده دایاندی. یئنه گلمیشدی؟ دؤرد ایل بوندان اول سس سیز، سمیرسیز گئتمیشدی، همیشه کی کیمی فولوتون دا چالمامیشدی! ایندی نه اوزله گله بیلردی؟ اصلاً مگر گله بیلردی؟
اوزو ائوه ساری، سئحیرلنمیش دورموشدو. بیر آیاغی گئدیردی، بیری گئتمیردی. اوشونوردو. او اولسا بیردن؟ گئدیم، گئتمه ییم؟ گئتمه میش نئیله ییم؟ کوچه باجادا کی قالا بیلمه رم. فولوتون سسی گئت گئده اوجالیردی، بلکه ده بو یاخینلاشیردی! آخی مگر اولا بیلر بئله بیر شئی؟ بلکه ده او دانیشان جین‌لرین بیری فولوتو چالیردی! قاپیدان گیریب، بیرینی گؤرمه سه نئجه؟ اونو گؤرسئیدی نه حالا قالاردی؟ گؤره سن سئوینیب اوره-یینه باساردی، یوخسا قورخوب قاچاردی؟
ایت‌لر نه چین سس سسه وئریب‌لر؟ اولمایا دوغرودان گلیب؟ او گلنده بیر های کوی سالاردیلار کی! سن ده کی هر زادی یوزورسان! ایتلرین هر گئجه کی عادتی دی دا. بو دی دا دئینده، باشلاردی: دی دا دو دا دی، دی دا دو دا دی، دی دا دو دا دی.
قولاغی ایسینیر، گؤزلرینی آچیر. فولوتون و ایت‌لرین سسی نفسینین سسینده ایتیب. نه قده‌ر چالیشیر، نفسینین سسیندن باشقا بیر سس ائشیده بیلمیر.

منبع: «ایشیق» درگیسی، نومره ۱ ، اردیبهشت و خرداد ۱۳۹۷

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

روح‌انگیز پورناصح

روح‌انگیز پورناصح

باشقا اثرلری