کئچن ایلدن باشلاندی. اولده گؤزومون اؤنونده کیچیک میلچکلر اوچوردو سانکی. هؤرومجک تورو اولوردو گؤزلریمین اؤنونده هر زامان. آمما او گئجه ایشیغی سؤندوروب یاتاغا گیرنده، سول گؤزومون بوجاغیندا بیر ایشیلتی گؤردوم. قورخودان دایاندیم. بیر آددیم دا بئله آتا بیلمه‌دیم. بلکه ده نظریمه گلمیش دئیه، گؤزلریمی یوموب آچدیم. یئنه سول گؤزومون بوجاغیندا چاخدی. قیغیلجیمایدی یوخسا ایلدیریم؟ یاتا بیلمه‌دیم. فیکره دالدیم؛ بلکه ده سسسیزجه گؤزومو یاندیراجاق؟ گئجه یاریسی هر یئره گئتمکدن یاخشی گوگل ده گزمک‌ایدی. یازیلارین ایچیندن نئچه یازی سئچیب اوخودوم. بیر سیراسی چوخ قورخولوایدی. گؤزون نم هارالاری ییرتیلاندا بئله اولار کیمی سؤزلر یازمیشدیلار. اومودومو گؤزومدن کسیردیم، بیردن بیر تانیش یازییا راست گلدیم. پری دئین سؤزلردن یازمیشدی. اوندا نه قدر گولموشدوم اونا! بلکه ده اوندا گولدویوم ایندی باشیما گلیردی. پری دئیردی حوریلر آل- الوان ایشیلتیلارلا گؤزه گؤرسه‌نرلر. هر بویاداکی ایشیلتینین دا اؤزهل بیر ایشی وار. مثلاً آغ ایشیلتیلی حوری آدامین هر نه آرزوسو اولسا یئرینه یئتیرر. دوداق آلتی گولدوم. بیر آن ساکینلشدیم. یاتاغیما گیریب اوزاندیم: یاخشی دا! منیم آرزولاریمی دا یئرینه یئتیر گؤره‌ک.
گئجه‌لر قارانلیق یئره گئتمکدن، ایشیغی سؤندورمکدن قورخوردوم. دوزدو، یالنیز آغ ایشیقلا گلیردی، آمما یئنه‌ده قورخودوردو منی. گوندوزلر یوخایدی، بلکه ده من گؤرموردوم. بلکه ده اونا گؤره ایشیغی گئت- گئده آزالیب، سونرا دا سؤندی. ایندیسه کؤلگه‌یه چئوریلیب منیمله هر یئره گئدیر. یالنیز آرابیر ایلدیریم شاخیر. کؤلگه اولاندان بری گوندوزلرده گؤرورم. یئنه یالنیز سول گؤزومون بوجاغیندا دایانیر یا دا وورنوخور. ندنی ده بیلینمیر. نه گؤزومون بیر یئری ییرتیقدیر، نه ده آرزولاریما یئتیشیرم. آمما کی کیچیک میلچک گؤرندن بری باشیمین آغریسی آیریلمیر مندن. گؤزلریم آچیلمیر، اوتوردوغوم یئرده اویورام. هردن دئییرم اولمایا باشیمدا بیر شئی وار.
گوزگونون اؤنونده دایانیب گؤزلریمی یومورام، ایکی الیمی اؤنومه اوزالدیب گؤزلریمی آچیرام. ایکی الیم ده بیر سیرادا، اؤزوده اصلا تیتره‌میر. سئوینیرم. بیر دیلیمه ده باخیم دئیه، دیلیمی چیخاردیرام ائشییه. اودا دوزدو. آمما! دیققتله گوزگویه باخیرام. پری گوزگودن باشاردیغی قدر دیلینی چیخاردیب، گؤزلرینی برلدیب منه. منده گؤزلریمی برلدیرم. یئنه اوزدن گئتمه‌ییر. داها حوصله‌م چاتماییر. پرینی حیطده قوپاراغا گؤتورموشم. گؤزومده نه ایلدیرم وار نه ده کؤلگه!