اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: روح‌انگیز پورناصح
ترجمه: روح‌انگیز پورناصح
روح‌انگیز پورناصح
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

اوشاق اولوب آغلیییردی؛ بؤیویوب مکتبه گئدیردی؛ بیردن الینه چلیک آلیب، آستادان یئریییردی؛ چوخ کئچمه‌‌دن گلین دوروردو.‌‌ زامانین یؤنونو ایتیررک، فصیل‌‌لر کیمی اولدوغونو دوشونوردو.‌‌ یای‌‌دا قاپی پنجره‌‌نی باغلاییب، پئنجک گیییردی؛ قیش‌‌دا قاپی پنجره‌‌نی تاواز قویوب، بیر تی‌‌شرت‌‌ایله دولانیردی.‌‌ بو دورومو قوراقلیغین باشلاما‌‌سیندان بیر نیشانه سانیردی.‌‌ اؤیون بیر کتاب‌‌دا اوخوموشدو، سحرلر یای اولاجاق، ناهاردان سونرالار قیش، نه گؤی گؤیرنتی بیته‌‌جک نه ده مئیوه.‌‌ یییه‌‌جک‌‌لریمیزین یئرینه کاپسول آتاجاییق.‌‌
گاهدان هئچ قورخموردو، سؤزلرینی دیییب‌‌ـ دیییب بوشالیردی؛ گاهدان دا سؤز ائشیدیب‌‌ـ ائشیدیب سوسوردو.‌‌ آج اولوردو بیر نه ییییب‌‌ـ یئمه‌‌دن دویوردو.‌‌ داریخیب، ائشییه چیخیب‌‌ـ چیخمادان اوره‌‌یی آچیلیردی.‌‌ دیشلرینی بیرـ بیرینه سیخیب، نفس چکمه‌‌یی یادیندان چیخاردیردی.‌‌ اوره‌‌ییندن آغری قالخماقدا، کؤکس دولوسو نفس آلیردی.‌‌ اوره‌‌یی دوزلیب‌‌ـ دوزلمه‌‌دن بیر دؤشک اینه‌‌سی باشینین بیر یانیندان گیریب او بیری یانیندان چیخیردی.‌‌
آیاق‌‌لارینین آلتی سیزیلداییردی، بارماق‌‌لاری کئیییردی.‌‌ بیر یئرده اوتوروب، هئچ نه دئمه‌‌سین‌‌لر منه، دئیه قاش‌‌ـ قاباغینی تؤکوردی.‌‌ کیمسه‌‌نین جینقیری چیخمیردی.‌‌ گئت‌‌ـ گئده یئرینی آییردی.‌‌ بالاـ بالا بیر مئتر، ایکی مئتر، اوچ مئتر، چوخ آغاج‌‌لار اوزاقلاشدی.‌‌ داها قایئتماییم دئیه، کؤرپولرین هامیسینی بیربه‌‌بیر دالیسیجا داغیدیب گئدیردی.‌‌
دوداقلارینی چئینییردی، یارا اولموشدو.‌‌ یارالارین اوستو کؤزمه باغلامیشدی.‌‌ یئنه دوداقلارینی چئنییر، کؤزمه‌‌یی قوپور، قان آخیر، نئچه آی‌‌دی.‌‌ دلی شئیطان دیییر آناسی، کورسومون آغزیندان چالان ترسه سیلله‌‌نین تایین، بونون دا آغزینین ایچینده‌‌ن چالسین، بلکه بونون دا قادابالاسی جانیندان چیخسین.‌‌
کورسوم اوتوروب‌‌ـ اوتوروب بیردن آغزین آدامین اوستونه ائله آچاردی، آدام دییردی ایندیجه بوتونلوک‌‌له اوتولاجاق.‌‌ کورسومون قادا بالاسی گئدندن سونرا بیلمیشدی یازیق قیزین گؤجه‌‌لری یارا اولموشوموش، یاپیشیرمیش بیرـ بیرینه.‌‌ آغزینی اوجور آچماغینین دا ندنی اوایمیش.‌‌
تلویزیون کاناللارینی تاققاتاق دییشیر.‌‌ نه تورکجه‌‌یه، نه فارسجایا، نه انگلیزجه‌‌یه باخماقی گلمیر.‌‌ بیر دیقه ده بیرینده قالاندا، کؤکلوقدان اوتانیرسیز، ورزش نه‌‌دی، داوا یییین، داوا نه‌‌دی، هارانی آریقلاتماق ایسته-ییرسیز اورایا کرم یاخین، سونرا دا هلبت کرم یاخماقدان یورولموسوز بیر دویمه‌‌نی باسین بؤتوو ایشلری گؤرسون سیزه.‌‌ کانالی تاق دییشدی، آریخلیق‌‌دان بئزیشمیسیز.‌‌.‌‌.‌‌ تلویزیونو باغلادی.‌‌
بیر بادام گؤتوروب دیشلدی، یاریمچیق باداما باخدی.‌‌ دولوایدی بالاجا باجالارلا؛ هر باجا دا دولوایدی نارین بؤجک‌‌لرله.‌‌ تولازلادی؛ بادام فیرلاناـ فیرلانا بیر قویویا دوشدو.‌‌ ایسته‌‌ییردی قویویا باخسین، بو قویو هر نه‌یی اؤزونه چکر دئیه، بیریسی الیندن یاپیشیب، گئری چکدی.‌‌
تریبون آرخاسیندا دایانیب؛ هئچ نه یادینا دوشمور.‌‌ هامی باخیر بونا.‌‌ بالاـ بالا هر بوجاقدان سس اوجالیر.‌‌ سس‌‌لری بیرـ بیریندن آییرد ائده بیلمیر.‌‌ قارالار گئت‌‌ـ گئده چوخالیر.‌‌ سرعت‌‌له قویونون دیبینه یاخینلاشیر.‌‌

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

روح‌انگیز پورناصح

روح‌انگیز پورناصح

باشقا اثرلری