ganbar
ساری اینک(شفاهی خلق ادبیاتی نمونه‌سی)/ یازی‌یا آلان: قنبر سیفی
سؤیله ین: مشهدی زینال کیشی(86 یاشیندا) خدافرین بؤلگه سی/ حئیدرکانلی کندی

بیری وار ایدی، بیری یوخ ایدی. تاریدان سووای هئچ کیم یوخ ایدی. بیر ناخیرچی وار ایدی. او ناخیرچی نین بیر آروادی وار ایدی، بیر ده بیر قیزی. قیزی نین آدی فاطمه ایدی. ناخیرچی نین آروادی نئچه ایلدن سونرا اؤلدو. اونون بیر اؤلن آروادی نین «دده وئردی»سی اولان بیر اینَگی وار ایدی. او، اؤلندن سونرا اینک فاطمه یه ایرث قالدی. او اینک بیر سئحیر ائدیجی ایدی.

ناخیرچی یئنی‌دن ائولندی. تزه آروادی چوخ اؤزوندن راضی، عصب سیز و قاش– قاباقلی ایدی. او، فاطمه یه اذیت ائدیردی. فاطمه نین بیر اؤگئی باجیسی وار ایدی. اؤگئی باجی نین آدی سریه ایدی. سریه ده آناسی کیمی چیرکین و گؤزو گؤتورمز و گیجیکچیل ایدی. آمّا فاطمه ایسه، گؤزل و مئهریبان ایدی. ناخیرچی نین آروادی بیر گون ارینه دئدی: مال لاری صاباح فاطمه اوتاراجاغا آپاراجاق!

صاباح اولدو و فاطمه مال لاری اوتاراجاغا آپاراندا ننه لیگی اونا بیر بؤیوک باغلاما دا چییدلی پامبیق وئردی و امر ائتدی کی بو باغلامادا اولان پامبیغی دا چییدلر، اییرر و دؤیچه لرینی ده توولار و کلف ائدیب گتیررسن. فاطمه مال لاری اوتلاغا یایدی و پامبیق باغلاماسینی قاباغا آچاندا مال لار اونا ماجال وئرمه دیینه گؤره، آغلاماغا باشلادی. ساری اینک اونون کؤمَگینه گلیب دئدی:

نییه آغلاییرسان؟ فاطمه دئدی: نییه آغلاماییم، ننه لیگیم منه بیر بئله پامبیق وئریب، گرک آخشام بونلارین کلفینی ائوه آپارام. مال لار دا یاواش اوتلامیر بیلمیرم اونلاری هایخیرام، یوخسا پامبیغا یئتیشم. اینک دئدی بو کی بیر ایش دئییل! بو پامبیق لاری وئر من یئییم و ناهار واختی اونلارین کلفینی سنه وئریم. آمما من پامبیق لاری یئینده  منیم پیله می یئل اؤزو ایله بیر قاری نین ائوینه آپاراجاق. سن ده پیله نین آردیله گئدیب او قاری نین ائوینه چاتارسان. او قاری سندن سورغولار ائده جک. سن آنجاق هن دییرسن.

فاطمه پیله نین آردیله گئدیب، قاری نین ائوینه چاتدی. قاری اوندان سوروشدو: قیزیم دئه گؤروم منیم باش توک لریم تمیزدی یا سنین آنانین ساچ لاری؟ فاطمه گوله –گوله دئدی: سنین کی!

– منیم ائویم  و قاب قاجاغیم تمیزدی یا سنین آنانین ائوی؟ فاطمه دئدی سنین.

قاری دئدی سن قاییداندا قارشیوا آغ- آپ آغ آخارسو چیخاجاق. سن او سو ایله ال- اوزووو یویارسان. آی کیمی پارلاق اولارسان. سونرا قیرمیزی سو آخاجاق اونونلا دا دوداغینی و یاناق لارینی یویارسان. سونرا دا قارا سو ایله قاش لارینی و کیپریک لرینی یویارسان و داهادا گؤزل لشرسن.

فاطمه قاری نین دئدیک لرینی یئرینه یئتیردی و چوخ گؤزل اولدو. او ناخیرا چاتاندا،  گؤردو کی، کلف لر حاضیردی. او کلف لری ده گؤتوروب مال دسته سینی ده ییغیب کنده آپاردی. فاطمه نین اوگئی ننه سی اونو گؤردوکده داها دا گیجیک ائله دی. صاباحیسی مال لارین اوتاراجاغا آپارماسینی قیزی سریه یه تکلیف ائتدی. سریه یه ده بیر باغلاما پامبیق وئردی و اونلارین کلفینی آخشام اوندان آلاجاغینی بیلدیردی.

سریه مال لاری اوتاراجاغا چاتدیراندان سونرا ایشه باشلادی، او ایشین آغیر اولدوغونو گؤروب آغلادی. ساری اینک گلیب اونا دئدی نییه آغلاییرسان. او دئدی آخی بیر بئله ایشی گؤره بیلمه یه جم. آنام دا منیمله ساواشاجاق. ساری اینک دئدی سن منیم سؤزومه باخسان، آخشام کلف لری ائوه آپاراجاقسان. او ائرته‌سی گون فاطمه یه هر نه دئمیشدی سریه یه ده دئدی. فاطمه نین باشینا گلن ایش لر اونون دا باشینا گلدی. سریه پیله نین آردیله گئدیب قاری نین ائوینه چاتدی.

قاری اوندان سوروشدو؛ منیم باش توک لریم تمیزدی یوخسا سنین آنانینکی؟ سریه دئدی : آنامین ساچ لاری. قاری دئدی منیم ائویم تمیزدی یا سنین آنانین ائوی؟ سریه دئدی آنامین ائوی. قاری سریه یه  دئدی کی، قاییداندا قارشینا آغ سو چیخاجاق اونونلا ساچ لارینی قاش و کیپریکلرینی یویارسان. سونرا قارا سو ایله ده ال –اوزونو و بدنینی یویارسان. او ائله ائتدی و چوخ چیرکین اولدو. گلیب اوتاراجاغا چاتاندا نه کلف لردن خبر وار ایدی نه ده مال لاردان. آغلایا– آغلایا ائولرینه گئدیب اولان لاری آناسینا دئدی. ناخیرچی نین آروادی بیلدی کی، بو ایش لر  فاطمه نین اینَگی نین ایشیدی. صاباحیسی گون اؤزونو ناخوشلوغا ووروب دئدی: دوختورلار دئییر سنین دردی نین درمانی ساری اینک اتی دیر. ناخیرچی آروادین آلیندان باش آچمادان اینه یین باشینی کسمک ایسته ییردی کی، فاطمه ده بو سؤزو ائشیدن کیمی ناراحات اولدو.

فاطمه گئدیب سؤزو ساری اینگه چاتدیردی. ساری اینک دئدی منیم اتیم اونلارین آغزیندا زهر اولاجاق. سنین آغزیندا ایسه، دادلی اولاجاغام. سن منیم اتیمی یئییب، سوموکلریمی بیر توربادا  آوخورومدا تورپاق آلتدا باسدیرارسان. سونرا منیم سوموک لریم بیر دست لباس و بیر جوت باشماق اولاجاق. اونلارین هر ایکیسی قیزیل اولاجاق. اونلارین یانیندا بیر دسته ده قیزیل گول اولاجاق.

بیر گون کندده توی ایدی، سریه و آناسی تویا گئتدی فاطمه نی ده بیر چالادا دوستاق ائتدیلر. فاطمه چالادان چیخیب قیزیل باشماق و لباسینی گئییب تویا گئتدی. او بیر الینده قیزیل گول لری و بیر الینده ده بیر آز دوز گؤتوردو. تویا چاتاندا توز-تورپاقلی دوزو سریه نین و اؤگئی آناسی نین گؤزونه سپدی و قیزیل گول لری تویا گلن آدام لارا وئریب ائولرینه قاییتدی.

او قاییتدیقدا بیر حوض گؤردو گئدیب اوندان سو ایچنده باشماغی نین تایی دوشدو سویا. او ائولرینه گلدی لباس لارینی سویوندو و آپاریب یئرینده قویدو و ائوده اوتوردو. شاهین اسماعیل آدلی بیر اوغلو وار ایدی. اسماعیل آتینی سووارماغا آپاراندا حوضداکی باشماق تایینی تاپیب اونون یییه سینه وورولدو. او، او قدر وورغون اولدو کی، سئوگی نین شدّتیندن آزارلادی. دوختورلار دئدی کی بونون درمانی قیزیل باشماق تایی نین صاحبی نین تاپیلماسیندان آسیلی دیر. تدبیر ائدن لر بئله قرارا گلدیلر کی، بوتون جاماعاتی میدانا توپلاسینلار و او قیزیل باشماق تایی هر کیمین آیاغینا گلسه، او قیز شاهزاده نین آداخلیسی اولسون و ائولنسین لر. سریه و آناسی بو خبری ائشیدن کیمی فاطمه نی قویودا حبس ائدیب، اؤزلری میدانا گئتدیلر. باشماق هئچ کیمین آیاغینا گلمه دی، بو آندا فاطمه نین خوروزو بیردن بیره بانلاماغا باشلادی و قیشقیردی کی، فاطمه نی ائوده حبس ائدیبدیرلر.

خوروزون سؤزونو ائشیدن شاه امر ائتدی کی، ناخیرچی نین ائوینه گئدیب اونو دا گتیرسینلر. مأمورلار گئدیب فاطمه نی گتیردیلر و باشماغی امتحان ائتدیلر. فاطمه نین آیاغینا اولدو. فاطمه نی شاهزاده اسماعیلین آداخلیسی ائتدیلر.

بیر گون سریه آناسیله فاطمه نین گؤروشونه گئتدیلر و اونو دولانماق بهانه سیله دریا کنارینا آپاردیلار. اونلار فاطمه نی دریایا آتدیلار. سریه فاطمه نین لباسینی گئییب شاهین ائوینه قاییتدی. شاهین اوغلو اونلارین حوققاسینی آنلادی و صاباحیسی گون فاطمه نین خوزوزو بانلاییب دئدی کی، فاطمه دریادا بیر بالیغین قارنیندا ساغ دیر. شاه بو خبری ائشیدن کیمی اوزگونچولری دریایا یوللادی. اوزگونچولر فاطمه نی تاپیپ گتیردیلر. فاطمه اریله بیرگه یاشادی آمما سریه ایله آناسی نی دار آغاجیندان آسدیلار.

یک پاسخ

  1. قاناتان قوربان یئل بابا ارسیمیمی سال بابا.
    سانیرام خلق ایچینده بئله بیر شعری اولاجاق دیر. پامبیق یئرینه یون یا خود اونون بؤلومو ارسیم آدلانسایدی داها یاخشی اولاردی.
    قنبر بی سیزین ماراقلی خلق ادبیاتی یاییم اوچون زحمتینیزه گوره تشکرلریمی بیلدیریرم. اوغورلار

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4