آیریلیق‌لار
ع. یالچین
آییردیلار گولو اتک‌دن
آرینی پتک‌دن آییران کیمی؛
چاتلادی آرزولار
اوچوقلادی خیال‌لار.
دوشوندوک:
بلکه بیر گولوش
یاکی، بیر گؤروش ملهم اولا،
ساغالدا بو چاتلاق‌لاری
بو اوچوق‌لاری.
اسدی حسرت اسیمی،
الندی جانیمیزا، قانیمیزا
غریبلیک موسمی؛
اسیم‌لر طوفانا دؤندو
سیزیم لار طغیانا دؤندو
یارغان‌لاندی آرزولاری
چاتلاق‌لاری،
قارغالاندی
خیال‌لارین اوچوق‌لاری.
آییردیلار بیزی بیزدن
اودو کؤزدن،
ایشیغی گؤزدن
آییران کیمی.
