هر سحر گونش دوغمادان
شرقه دوغرو یول دؤیور‌م؛
قارشیمدا سؤکولرکن دان یئری
آلیشیب، قیزیل قانا بورونور آغ اؤرپکلی زیروه‌لر.
دؤنه- دؤنه بو یول‌لاری گئدیرم
نه یورور، نه یوغوزدورور.
سن ده یاخشی باخ!:
یول وار عشقه دوغرو یورویور،
قایغی داشیییر، یاشادیر انسانی؛
بورولوب گدیک‌لرد‌ن آشیر،
چکیب آپاریر گول- چیچکلی اویلاقلارا؛
ائله تمیز، سانکی آخار سودور
یاداکی لکه‌سیز شوشه.
یول دا وار کؤچدن آییریب آزغینلیغا یووزدورور،
یولچونو آییریر یولوندان؛
بعضا آسفالتدان قوما دوشور،
تورپاغا سوروب داش- چینقیلا گئدیر،
بعضا ایسه
یاریقانلاردان بودره‌دیب،
دره‌لرین تکینده داشلارا سریر….
نه یاخشی کی، سیز وارسینیز یول‌لار
سیز وارسینیز یورویور انسان‌لار!
بو یول‌لار قورتارارسا
سونو باغلانیب قاپانارسا،
یقین بورویه‌جک حیاتی قارانلیق.
یول‌لار… یول‌لار… یول‌لار …
منی یاشادان یول‌لار؛
هئی باخدیقجا اوزانان،
قیوریلیب دولایلاردان سوووشان یول‌لار …
مهر ۱۴۰۵
