آپار منی (شعر توپلوسو)
پونه ندائی (1353ه.ش)
ترجمه : مرتضی مجدفر
یایین ائوی : نشر امرود – تهران
بیرینجی چاپ : ۱۳۸۵
«پونه ندائی»‌نین سسی شعر اولوب، اوره‌گیندن جوشسا دا، سانکی یوز ایللرجه یاساقدا و سورگونده ازیلمیش بیر قادینین عصیان دولو دوشونجه‌سینین ساده‌جه تصویری‌دیر. اونون قلبی بیر عمان‌دیر کی، دویغولارلا دالغالانیر و گؤز یاشلاری ایله بوغازینداکی هیچقیرتی‌لاری قاتیری. «آرامیزدا اولان سرحد / داها جغرافیا اولماسین / تاریخ اولسون» دئیه‌رک، دیلک آرزوسونو بئله دیله گتیریر: «قارانلیقدان قورخورام / و اؤز اته‌گیمده / ساییرام آلما چیچک‌لرینی.»
شاعرین شعرلری فرم‌دان آسیلی اولمایاراق، معنا و تصویر باخیمیندان او قده‌ر ساده، دولغون و یئنیجه‌دیر کی، بو اؤزللیک‌لری ایله دوغرودان‌دوغرویا آدامی سئحر ائدیرلر. بیر غواص تک معنا اینجی‌لرینی آراییب تاپسان دا، تاپدیقدا دا دؤنه-دؤنه اونلارا باخیب دالماق هئچ ده کیفایت ائتمیری. رمزلی بیر دیل ایله اوز-اوزه قالیرسان کی حتتا شاعر اؤزو ده حئیرته دالیر: «دیرناقلاریملا جیزدیم / یارالانمادی.»
«پونه ندائی» دویغوسال بیر کؤنول‌له گزیب دولاشسا دا، لحظه‌لری اوولاماقدان هئچ چکینمه‌ییر. گیزلینده و آچیقدا حیاتی سئیر ائدیری و گؤرونمز تورلارلا، آجی-شیرین نیسگیل‌لر ایله دویغولارین صیادی اولور. آنجاق او کین و نیفر‌تی کؤنول دفتریندن پوزوب سیله‌رک «کسدیم قیشقیرتیمی بوغازیمدان» دئیه‌رک «باختینا یاپیشان قاپی»‌نی آچماغا چالیشیری.
شاعرین خیال دونیاسی بلور بیر شلاله تک، آزادجاسینا آخیب فیکیر گونشینی اؤز صافلیغیندا چیمدیرسه ده، اؤزونه گؤره اؤزه‌ل وارلیق داشییان بیر شعر دیلی واردی: «اوتورورام دووارا ساری / یاشاییشین آجی نفسی / گؤزلریمین چوخورونو دولدورسون دئیه.»
چاغداش آذربایجان دیل و ادبیاتینین آدلیم سیماسی «مرتضی مجدفر» پونه ندائی‌نین سئچیلمیش شعرلرینی چوخ آخیجی و باجاریقلی بیر سایاق‌دا ترجمه ائتمه‌گه جان آتاراق، بئله دئییری: «… فارس شاعرلرینی تورک اوخوجولارا تانیتدیرماق رسمینی، بو دؤنه معاصر و گنج بیر شاعرین اثرلرینین ترجومه‌سی ایله، دوام ائتدیردیم… خانم ندائی، تورک اولدوغونا باخمایاراق، ایندی‌یه قده‌ر تورکجه شعر یازمامیشدیر. هئچ ده عیبی یوخدور… دیل وسیله‌دیر… دیللر بیر-بیرلری ایله آل- ‌وئر ائتمه‌لی‌دیلر و دوشونجه‌لر، دیل واسطه‌سی ایله، بوتون اینسانلار آراسیندا یاییلمالی‌دیلار…»
شاعر «بوی آتا بیله‌جه‌گیم / تکجه قاچماقدادیر» سؤیله‌یرک «اوره‌گیم رنگ‌سیز گؤروشور» دئییر و دونیادا «دوستلوق آغاجلارینین اکیلمه‌سینی» دیله‌ییر. او مُدرن بیر ذهنیت‌له اؤز تجربه‌لرینه جان وئرمک‌له، بیزی اؤز دونیاسینا باغلاییر و «قهوه فینجانیندان باش قووزاییر» کی قادینجا دویغولار، اینسانلیق هارایی اولسون: «درزی‌دیر منیم آنام / تیکیر او هر بیر زادی / ال‌لرینی ده روزگارا تیکیب / و کوره‌ک‌لرین‌ ده اونون یوکونه.»