قضایا اوغرامیش کؤهنه بیر آرابایام
صاحابیم گؤیلو گؤزو توخ، هامینی اینانان بیریسی!
تاپشیریلدیم دوزلتسینلر قابیرقالار سیر- سینیغیمی؛
بؤیرک‌لریمی ساتدیلار
چیخاریب اوغرو بیر تاجیره،
اوره‌ییمی باشقاسینا،
ایچ‌آلاتیمی ساتدیلار بیرر- بیرر چیخاریب،
ایندی قورو چای اورتالیغیندا زیر- زیبیله قاب اولموش بیریسی‌یم
گاهدان دا چؤل ایتلری بیر قیچین قالدیریر اوستو باشیما
واللاه سنه یازیغیم گلیر آی آرئس «Ares»!
نه منده قدرت وار، نه سنده حیکمت؛
گل یانیما، ووراق باشیمیزا بیرگه
آغلایاق آغری- آجیلاریمیزی!
بلکه ده اوغرو- اَیری‌لرین یازیغی گلدی بیزه
منه قدرت وئردیلر، سنه حیکمت.
سنینله‌یم آی قولاق‌لاری پامبیغا اکیلمیشیم!
واللاه، گئجه- گوندوزوم هر سؤزباشی
نه ائدیم؟ نه‌ائله‌ییم؟‌دیر ایشیم.
هاردا گیزلتمیسن قوزا- قوزا قورخولاریمی؟
اوهوی پیرامئته!
گؤی یئرلری اودلانیب یانیر
سوپ- سوسوز آجلیغیمی؛
سؤندور اودونو
سوندور، سوورولوم اوز- گؤزونه!
دئسینلر قولاق‌لاری کور، گؤزلری کار
عاغیلی بوشالمیش ال‌لره؛
بوش بئکار بیریسی‌‌یم
آمما، سن اؤزونسن
بیر ده سؤزون!