خیال پرده‌سینی چکدیم بیر یانا
آجی حقیقت‌له باخدیم جهانا
حقیقت آختاردیم من یانا یانا
حئییف… حقیقت دن بوش ایدی دونیا!
دونیا یاخشیلیغی تالانا وئریب
واری آل ائله‌ییب آلانا وئریب
اؤز اختیارینی یالانا وئریب
بیر خام خیال ایله خوش ایدی دونیا!
بعضا قاناد آچیب گویلرده اوچدوم
کولک له توتوشدوم قارلا ووروشدوم
حقیقت آدینا مین نغمه قوشدوم
حئییف بیر قاراجا داش ایدی دونیا!
کؤنول، آرزولارین شیرین سؤزوندن
بیر قیها قوپاریپ گئتدی اؤزوندن
اوزون اومیدلرین یورغون گؤزوندن
یاناغیما دوشن یاش ایدی دونیا!
دوستلار! کوکره‌مه‌یین بیر دنیز کیمی
دئیین کی مقصر بیلدینیز کیمی؟
اؤیرندیم حالینی گؤردوم بیز کیمی
مین غصه‌یه، غمه توش ایدی دونیا!
گاهدان شان شؤهرتلی خاقان الینده
گاهدان خان الینده، خاوان الینده
مین قارا فیکیرلی اینسان الینده
آیاغی ساریقلی قوش ایدی دونیا!
ظالیم آیاغی‌نین داشی اولمادیق
مظلومون گؤزونون یاشی اولمادیق
بیز یاخشی یاشاییب یاخشی اولمادیق
یوخسا عزیزلریم، یاخشی‌یدی دونیا!
