ائیله‌سن گر منی آواره، الیمدن نه گلر؟!
چکسن اؤز زولفون ایله داره، الیمدن نه گلر؟!
بولبولم عؤمرومو بیر گولده فنا ائله‌میشم
گول اگر مئیل ائله‌سه خاره، الیمدن نه گلر؟!
اعتنا ائیله‌مه‌ییب، ائیله‌سه او ماه لقا-
رشته‌ی اولفتی گر پاره، الیمدن نه گلر؟!
گزر اولموش یئنه او ماه نظر باغینده
حسرتم بیر قورو دیداره، الیمدن نه گلر؟!
جان یئتیشدی لبه او لب شکر اصلا بیلمز
قالمیشام یالوارا یالواره، الیمدن نه گلر؟!
قلبیمه لطمه‌ی عشقینده ده‌ین یاره‌لره
گر اوزون ائیله‌مه‌سن چاره، الیمدن نه گلر؟!
سنی بازاره قویوب سیمه ساتیرلار هئیهات!
وسعتیم یوخدو او مقداره، الیمدن نه گلر؟!
گونومو قاره ائدیب گؤز یاشیمی قان ائله‌ین-
بو فلک‌دیر آ گؤزو قاره! الیمدن نه گلر؟!
«صمدی» بیر بئله بیداد فلک شکوه‌سینی-
ائتمه‌سم حضرت داداره، الیمدن نه گلر؟!