ساحیله هاردان دوشدویو بللی اولمایان بالیق قولاغی کیمی‌دیر آنامین قولاغی
قاپالی قوتودور
آلارلار می، آلمازلار می، – آلینماز
ایچدن سسی صداسی بیتمز
دیل اوزادیر دانیشیر
مونجّیم‌دیر
کیمه دئییرم اینانمیر
آنامین قولاغی‌نین گؤزو واردیر اؤنون گؤرور
آلداتماق اولمور اونو
قولاغی آیاغا دورور؛ گلیر گئدیر
اورا بورا آپارماق ایسته‌می یوخدور
جانی واردیر آدام کیمی،_ چیخیر، چیخمامیش یئرینه تیخانیر
او قده‌ر آراسی سازدی قولاغی‌یلا
هامی اونو قیسقانیر
هر کسین ایچینده
رحمت‌لیک کیشی‌تک اشی دئییب
ایشینی گؤروب، بارماغینی یومشاق یئرینه دایاییر
قولاغی اوتانیب اؤلوب قیزاریر
آنام سونا یاخین داها دا قیزیب
دای گل دئییب سؤیوش سؤیور، سئویشمه‌نین دادینا
قاتارا تای‌‌دی قولاغی آنامین
کوپه کوپه قارانلیق تونئلیندن آغاج قوردو تک دیشاری سورونور
اوزون اوزادی فیتینی چالان گون
اؤنجه زنگ وورولور
سونرا پولیس ماشینی
سونرا ساوجی
سونرا
سونرا
ائویمیزه گئجه واقون واقون قوناق آخینیر
ایچ‌آلاتیندا کامئرا گزدیریرلر
کوپدن چیخمیش آغ قولدو
بورنوندان سیرغاسی ساللانیر قارالارسی قولاغی‌نین
هله بو هاراسی‌دیر
قولاغی‌نین الی قالخیب ویسکی کیمی باشینا وورور
هر طرفی آغری‌ییر
آسیلمیشلارین بوغازیندان آچیلمیش ایپله باغلانیر
سینیرلری پوزولور
گؤزونه قلم چکیر
ساچینا خینا قویور
بیر ده، یوخا اوره‌یی وار
لینچ‌لنمیش*
ساجین اوسته قیزاردیلمیش یوخایا بدل
*لینچ: لینج محکمه‌سی – آ.ب.ش.-دا عادتن زنجی‌لره و اینقیلابچی فهله‌لره وحشی‌جه‌سینه دیوان توتما، محکمه‌سیز جزا وئرمه( ۱۸-نجی عصرده یاشامیش ایرق‌چی ج. لینچ-ین آدیندان)
