گلیب چاتماسام دا چیلله آخشامی
وطن! نار پاییمی ساخلامیش ایدین.
بیر لاله یاناقدا یاندیریب شامی
گیله‌نار پاییمی ساخلامیش ایدین.
اوتوردوم آرزومون پنجره‌سینده
ایتدیم کهلیک‌لرین خومار سسینده
آنا طبیعتین مجمعه‌سینده
شیرین، قار پاییمی ساخلامیش ایدین.
چن‌ین چنلی بئلی گتیریر یادا
کوراوغلو بوراندان قوپاریر صدا
او اوجا زیروده، او شوش قایادا
انتظار پاییمی ساخلامیش ایدین.
اوزون آیریلیغا دوزوب دایانان
اوستونه آیلارین تورپاغی قونان
بیر شعر حسرتینده آلیشیب یانان
کیچیک چارپاییمی ساخلامیش ایدین.
ماکو/۱۳۶۸
یک پاسخ
نه گؤزل شعردیر.