نئجه کئچدی گولوم، سنسیز آنلاریم؟!
هر آندا اریدی بوز اوره‌ییمده.
عؤمور- گون کئچسه‌ده هر ایکیمیزدن
یاشاییر سئودیییم قیز اوره‌ییمده.
وفاسیز سئوگی‌دن دئدیلر اومما،
بیر بئله جفایا گؤزونو یومما؛
یوزلر داغ چکیلدی سینه‌مه آمما-
قالدی سئوگیمیزدن ایز اوره‌ییمده.
هیهات کی بودونیا اوزومه گوله!
بوتون آرزولاریم دؤنوبدور کوله،
تک سنین عشقیندیر سؤنمه‌میش هله،
کؤزه‌ریر هله ده کؤز اوره‌ییمده.
دونیا بیر آغاج‌دیر بیز ایسه یارپاق،
دیشینی قیجیردیر بیزلره تورپاق،
آلتمیش بئش ایل دئییب، دانیشدیم آنجاق-
یئنه‌ده چوخ قالدی سؤز اوره‌ییمده.
«هریزلی» سؤیله‌ییر: اؤزونه آلقیش!
باخ کیمین سئوگیسی منیم تک قالمیش؟!
سیلیندی کؤنلومدن هر ایز، هر ناخیش،
اؤز عشقیم یاشاییر اؤز اوره‌ییمده.
هریس – یاز- ۱۴۰۲
