منیم
قول‌لاریمداکی دمیر قاندال‌دان
سنین
اوزوون بوینونا
قیزیل بویونباق یاپسایدی‌لار نه اولوردو؟
هر بویونباق
سئوگی باغلیلیغیندان بیر نیشانه‌دیر.
سنین، دوداقلارینداکی آجی گولوش‌دن
منیم خلوتیمه شیرین ماهنی قوشسایدی‌لار نه اولوردو؟
هر ماهنی
گولوش سوراغیندا دؤیولن قاپی‌دیر.
اولمادی قاراشین!
قول‌لاریمداکی بوخوو‌دان
مؤهور یاپا‌جاق‌لار
ناماز قیلدیرا‌جاق‌لار سنه
قارانلیق‌لار قیبله‌سینده،
آجی گولوشلریندن
قیزیل گولله توتوب،
اوره‌ییمه سیخا‌جاق‌لار
اعدام دیره‌یینده.
اوزون بویون‌لارا
قیزیل بویونباق،
اینجه دوداق‌لارا
گولوشدن ایلمک سالماق یاساق.
یاپیلا‌جاق نه قالمیش قاراشین؟
بوراسی، گونشین اؤلوم یاتاغی
ماوی گؤزلو اولدوزلارین گؤزو اؤنونده…
و کیشی‌لرین، اعدام میدانی
قاراشین سئوگی‌لرین گؤزو اؤنونده…
قولاج- قولاج ساچ‌لاریندان
اؤپمک،
و اسروک بالیق کیمی
گؤزلری‌نین دنیزینده ایتمک
باشا چاتمیش قاراشین!