آی قوهوم‌لار، آی قونشولار
تئز گتیرین، تئز دؤشه‌یین!
یانار، دونیانی یاندیرار،
اوره‌ییمه بوز دؤشه‌یین!
ظولوم داشدی، حددن آشدی،
گؤیرچین قانا بولاشدی؛
اوره‌ک‌لر ائله بیل داشدی،
اوره‌ک‌لره قیز دؤشه‌یین!
قاریشدیریب‌لار آرانی،
هی… قارا باسیر قارانی؛
اونوتمایین بو یارانی،
یارامیزا دوز دؤشه‌یین!
عؤمروموزو وئردیز بادا
گون گؤرمه‌دیک بو دونیادا؛
یا منه اؤزگورلوک، یادا-
سینه‌مه اولدوز دؤشه‌یین!
دیری قالدیق دونا- دونا،
قیشین عؤمرو چاتیر سونا؛
یاز بورونور یاشیل دونا،
دونونا نرگیز دؤشه‌یین!
