ساچلارین گؤز یاشلاریمدا
بایراق- بایراق اَسیر آی قیز!
آدین منی یارالاییر
پیچاق–پیچاق کَسیر آی قیز!
گول‌له سنی قان آپاریر
بولاق- بولاق ایچیر گئدیر،
دردین آخیر اوره‌ییمدن
چایلاق–چایلاق کئچیر گئدیر.
ایشیغینا ظولمت کؤچور
چیراق- چیراق سؤنومسونور،
اَجل سنی شهید بیچیر
اوراق- اوراق اؤلومسونور.
خیاوانلار پولیس یاغیر
آلچاق- آلچاق گورشادلانیر،
لئچه‌یینده غیرت اودو
اوجاق- اوجاق اَلوولانیر.
اؤزگورلویون گؤوده‌یینه
جایناق- جایناق آند ایچیرم،
آی قیز واللاه سندن اؤترو
تورپاق- تورپاق درد ایچیرم.
دوننکی ظولمون بوگونو
یارپاق- یارپاق تؤکولور آه…
توفانلارا سنی سالان
بارداق- بارداق سینار صاباح.
۱۴۰۱/۷/۱۲ تبریز
