بوگون اوره‌ییمده تورپاق آغلاییر،
سینه‌مده یارالی ائل سیزیلداییر.
بئینیمده کیریییب یاساق دوشونجه،
آغزیمدا قیفیللی دیل سیزیلداییر.
یانیب باغ- باغاتیم، یانیب زمیم ده،
قورویوب داغلاریم، دره‌لریم ده؛
قالیب دوز چؤلونده آرزو گمیم ده،
ایچیمده بیر قورو گؤل سیزیلداییر.
دهشت چولقالاییب شه‌هری، کندی
آوچولار باغلاییب بره‌نی، بندی؛
قوزولار سوروددن آیری نه‌دن‌دی؟!
قوزولار مله‌شیر، چؤل سیزیلداییر.
اؤلوم بو آرادا تک آت اوینادار،
بیلینمیر باهاردیر، قیش‌دیر یا باهار؛
قینیندان چیخاندا سولور قونچالار،
قونچا ماتمینده گول سیزیلداییر.
شاختا آسیر- کسیر، یاشاییش دونور،
یئنه ده اؤزگورلوک مارشی اوخونور؛
کؤهنه یارامیزا زخمه توخونور،
قوپوز سیزیلداییر، تئل سیزیلداییر.
16/۰۷/۱۴۰۱
