عؤمور کاروانی‌نین بیر منزلینده
بیر گون ساچلاریما بیرجه دن دوشدو.
او هاچان دوشدوسه بیلمه‌دیم، آنجاق
اونو من گؤرمه‌میش آنام گؤرموشدو.
ایندی او گونلردن نه قده‌ر اؤتوب،
نه قده‌ر یاخشی- پیس آرخادا قالیب.
عؤموردن قوپان او فصیل‌لر، ایل‌لر
هره‌سی باشقا بیر خاطیره اولوب.
بودور آغاریبدی بوتون ساچلاریم،
آنام نه یاخشی کی، هئچ گؤرمه‌میشدی.
ساچیم تک آغاریب بوغوم- ساققالیم،
او یازیق بیر دنی درد ائیله‌میشدی.
هانی ایتیردیییم او عزیز گونلر؟
ایندی بیردن اؤلسم آغلایانیم یوخ!
توتاق هئچ اؤلمه‌سم، یارالی قالسام
بوردا بیر یارا دا باغلایانیم یوخ!
زامان اؤز ایشینده، گردیشینده‌دی،
اونون نه وئجینه اؤلن، قالان کیم.
بو اسکی دونیادی، وردیشینده‌دی،
اونا نه حاکیم کیم، محکوم اولان کیم.
بیر گون بو دنیادان کؤچه‌سی اولسام
بو جیزما- قارالار یقین قالاجاق.
من دئین اولماسا من یاشایاندا
مطلق مندن سونرا چوخ شئی اولاجاق.
