گؤزلرینی کیپریک چالمادان ائوی‌نین هر طرفینده گزدیریب دفعه‌لرله قیریق-قیریق اولموش لاکلارینا باخدی. تیترک گیله‌لری اوپئنده‌کی قایچی‌نین اوزه‌رینده بیر نئچه آن سانجیلیب قالدی. قاشلاری یوخاری‌یا دوغرو چکیلیب قالمیشدی، اوزونون ساغ طرفینده ایزی قالمیش چاپیغین رنگی آتمیشدی. قادین سکوت ایچینده، هئچ نه آنلامادان، هئچ نه دۆشونمه‌دن کئیییب قالمیشدی.
هر بیرینی قاتی بیر هوسله آلیب بیر قوتویا ییغیب یاتاغین آلتیندا گیزلتدییی لاکلاری ائوینی باشدان-باشا بویامیشدی. آنلاشیلماز، بیلینمز حاللار کئچیریردی …
دینیب دانیشماغا، ترپنمه‌یه بئله هئیی قالمامیشدی.
قادین اؤزونو حقارته اوغرامیش سایاراق اولدوغو دورومدان قاچیب قورتارماق ایسته‌ییردی.
قارانلیق یاواش-یاواش پنجره‌نین شوشه‌لرینی قاپاییر. ائشیک ایستی و قارانلیق‌ایدی. سرین یئل هله‌لیک مورگوله‌ییردی.
چیراغی سؤندورور. اوخو لامپاسینی یاندیریر. ایش اوتاغی‌نین دیر(dır) قالمیش قاپیسیندان اوزونون ساغ طرفینه گوجسوز ایشیق چیله‌نیر. اؤنونده ماسانین اوستونه قویولموش استکانا باخیر؛ چایدان قالخان بوغ اؤنونده رقص ائدیردی. بوغون رقصینی گؤرسه‌ایدی یقین گؤزلرینی قاپاردی.
جانینا قیزیشما دوشور، الی‌نین دالی ایله آلنینداکی تری سیلیر. گؤزلرینی اوندان آلیب آیاغا قالخیر؛ کولری یاندیریب یئنه قاییدیب یئرینده اوتورور. گؤزو اوز به اوزونده‌کی پنجره‌یه ساتاشیر. اللرینی اوتوراجاغا دیره‌ییب بیرآز آیاغا قالخیر. ائله اوزاقدان اوزاغا یاری اییلمیش دورومدا گوزگویه چئوریلمیش شوشه‌ده اؤزونه باخیر. ایچینی آستاجا چکیب لئچه‌یی‌نین اوجو ایله گؤزلری‌نین کونجونو سیلیر.
سسی قولاغیندا جینگیلده‌ییر:
-ایتین قاباغینا آتسایدی‌لار گؤتورمزدی سنی، من‌ایدیم سنی آلدیم.
بو سؤزو ایلک ائشیتدیی آندا اونون اینانیلماز ایچتنلییی قارشیسیندا اؤفکه‌سی بیردن-بیره کئچمیشدی؛ ائله بیل کی آنسیزین یئلی آلینمیشدی.
اونون جیددیلیینی قاورامیشدی؛ لاپ ائله اۆزو دؤنموشدو.
دوداغی آلتدا اؤز-اؤزونه « دوز دئییبلر ائله حیرص گلنده ایمان قاچار» دئمیشدی.
بیرآز مات قالدیقدان سونرا هئچ نه دئمه‌دن آجی-آجی گولومسه‌میشدی.
او گوندن سونرا داها اۆزو آچیلمیشدی؛ هر دارتیشدیقلاریندا همن سؤزو قاباغا چکردی؛ سونوندا ایسه «سن نئچه‌دن بیریسن؟ » سؤزو ایله دالاشماغی بیتیرردی. آشاغیلاماق آماجی ایله دئدیی سؤز ان اینجه آیرینتی‌لارینا قدر یادداشینا جیزیلیردی. او آنلاردا سس تونونو و اوزونون میمیکلرینی بئله خاطیرلاییردی. چیرکینلییینه رغمن اونونلا ائولندیینی قاخینج ائله‌ییب اوزونه چیرپارکن باشدان آیاغا نیفرتله سوزوردو قادینین! گون کئچدیکجه آغزی داها دا یاوا آچیلیردی.
اونا سایاق سؤزلری ایله قادینین قلبینی او ائوده گؤمموشدو. او تماما اومیدینی ایتیرمیشدی، داها گؤزو سو ایچمیردی.
هر سؤیوشدوکدن سونرا ایچیندن گلن بیر سسی دینلر کیمی بیر آن سوساردی، سونرا یئرده اوتوروب خالچانین اوزه‌رینده گؤزلرینی گزدیرردی، دوشونجه‌لی-دوشونجه‌لی گؤزونه ده‌ین هر بیر زیبیلی بارماقلاری ایله گؤتوروب اووجونا ییغاردی.
کؤنلونو آلماغا بئله هئچ واخت چالیشمازدی؛ بئله بیر شئیی بئینی‌نین اوجوندان بئله کئچیرتمیردی.
تیترک و آلچاق سسله «آغزیم یاریمادی بی» دئدی.
گؤزلری اؤنجه پیچیلداشیب سونرا گؤینه‌ییب آجیشاردی. یاواش-یاواش دولوب بوشالدیغینی حیس ائدردی. خالچانین اوزه‌رینده‌کی ناخیشلاری تار گؤرردی. سوندا گؤزلری ده جان وئرردی.
قادین یالنیز قالینجا اوتاقلارینا کئچدی. گؤزاوجو یاتاقلارینا باخیب اختیارسیز آه چکدی؛ قاپی، پنجره، یاتاق، خالچا دا اونونلا برابر آه چکدی‌لر.
خاطیره‌لر اوزه‌رینه جوموردو. آجیسی بیرآز آزالسین دئیه گؤزلرینی یوموب بیر-بیرینه سیخدی. حرکتلری اؤزوندن آسیلی دئییلدی.
ایشقافدان یورغان دؤشک گؤتوردو. یئرده یئرینی سالدی. دریندن کؤکس اؤتوروب پنجره‌یه یاخینلاشدی؛ اوره‌یی داریخیردی. بیرآز کوچه‌نین دالغینلیغینی ایزله‌دی. گئجه اولدوقجا ساکیت و دورغون ایدی. ائله بو آندا کوچه‌ده بیری‌نین فیتی و تنبل-تنبل آتیلان آددیملاری‌نین سسی ائشیدیلدی. اونون آیاقلاری‌نین تاپپیلتیسی بوش و ساکیت کوچه‌ده قیریق و قیسا سس یاراداراق عکس-صدا وئریردی. قیسا ساچلاری ترلی آلنینا یاپیشمیشدی. اوست-باشیندان حیاتدان اوسانمیش بیر آدامین یورغونلوغو تؤکولوردو. اونون یازیق گؤرکمی اوره‌یینی اودلادی. او، یوخویا دالمیش کوچه‌نی یاواش آددیملاری ایله دیکسیندیررکن گاه گؤزل و حزینلی سسی‌له « آند ایچمیشدیک سنینله آیریلمایاق هئچ زامان» ماهنیسینی اوخویوردو؛ گاه دا بوغازینا ال آتیب حیرصلی و بوغونتولو سسله بوتون قادینلاردان نیفرت ائتدییینی قیریق-تؤکوک باغیریردی.
ساکیتجه قاپینی آچیب تراسا کئچدی؛ گوللری‌نین ضعیف عطری بورنونا دولوب اوره‌یینی اوخشادی. گوللری باخیمسیزلیقدان یاواش-یاواش سارالیب سولوردو.
کوچه‌نی آلاقارانلیق گؤسترن چیراغین ایشیغی اوزونه شؤگه سالیب کؤلگه‌سینی اولدوقجا بؤیوتموشدو.
اسینتی دامه‌نی‌نین ایچینه دولوشوردو؛ اته‌یینی آستاجا قالدیریب یونگولجه هاوادا اوینادیردی.
قاپی‌نین اؤنونده آیاق سس‌لری گلدی. قادین تیتره‌دی، قورخموش حالدا ائوین ایچی گؤرونمه‌سین دئیه قالین پارچادان تیکیلمیش پرده‌نی سالیب یاتاغین اوستونده اوتوردو.
بیرآزدان یئرینده اوزانیب، نازیک ملفه‌نی باشینا چکدی. یان طرفه اوزانیب نیسگیللی خیاللاریندا، رؤیالاریندا غرق اولدو.
اللری ایله بدنینی قوجاقلاییب اؤزونه ناغیل دئدی:
« بیر زامانلار چوخ موتلو بیر قیز وارایدی؛ اوره‌یی محبتله، سئوگی‌له قاباران؛ حیات دولو، رنگ‌به‌رنگ رؤیالار قوران بیر قیز وارایدی.
او قیزی ایتیردیم من …
ایندی بو قادین هر گون قاپ-قارا بیر بوشلوقدا ساللانیر …»
گؤز یاشلاری آغیر-آغیر یاناقلاریندان آشاغی سوزولوب بالینجا هوپوردو.
او، سون زامانلاردا خانیمی ایله قارشیلاشماقدان قاچینماق اوچون ائوده تاپیلمیردی، بونا گؤره ده یان اوتاقدا یاتمیش قیزینی بئله اونوتموشدو. اونون گؤزلری سورکلی آتاسینی گزیردی. ایندی ایسه قیزی هردن بیر اونو گؤررکن دورغون گؤزلری ایله آتاسینا باخیردی. ائوده اولاندا بئله گؤزلری داواملی اونون قاپیسی باغلانمیش ایش اوتاغینا زیلله‌نیردی. گؤزلرینه باخدیقجا اونون نئجه چیرپیندیغینی و آتاسی‌نین یانینی کسدیریب قوجاغیندا اوتورماق ایسته‌دیینی سئزیردی.
لیوانی بوزلو سو ایله دولدوروب قرارسیز آددیملارلا قیزی‌نین اوتاغینا کئچیب هر شئی‌دن خبرسیز میشیل-میشیل اویویان قیزی‌نین باش‌اوجوندا بیرآز دایاندی. آباژورون چؤهرایی ایشیغی اوزونون ساغ طرفینی ایشیقلاندیرمیشدی.
یئنه پنجره‌یه ساری یئریییب چؤهرایی پرده‌نی ییغدی. ماراقلی گؤزلرینی کوچه‌ده گزدیردی. یالنیزکیشی، ایشیق‌آغاجینا برک-برک ساریلمیشدی؛ حزین-حزین نه‌لرسه دئییب ایشیق‌آغاجی ایله آمانسیزجا اؤپوشوردو. بیردن دایاندی، باشینی بیرآز گئری چکیب ایشیق‌آغاجینا باخدی؛ قهقهه چکیب گولدو.
قادینین لیوانی توتان الی تیتره‌دی؛ ایچینده‌کی خیردا بوز قیرینتی‌لاری لیوانین قیراقلارینا چارپاراق ضعیف بیر جینگیلتی سسی چیخدی. اوشاق بیرآز ترپه‌نیب بؤیرو اوسته یاتدی. پنجره‌دن اوزاقلاشیب قیزی‌نین اؤنونده دیز چؤکوب اوتوردو.
کوچه‌ده کی کیشی‌نین سسی اوجالمیشدی. قادینلار حاقدا باغیراراق دئدییی اییرنج سؤیوش‌لر تراسداکی گوللری‌نین بئله اوزونو قیزاردیردی. گؤزلرینی یوموب آستا-آستا باشینی بوللادی. بئلینی قیزی‌نین یاتاغینا سؤیکه‌ییب اللری ایله قولاقلارینی قاپادی. قادین قولاقلارینا کیمی پؤرتموشدو…
عئینی حالدا اونون عاجیز و چاره‌سیز حالینا آجییردی دا.
گؤزلرینی آچدی. گئجه قوشو بانلاییردی …
گؤزوندن هئچ بیر شئی قاچمایان آنا، قیزی‌نین گونو-گوندن سوزولدویونو و دوداغیندان قاچاق دوشن گولوشلری‌نین فرقینده ایدی.
قادین سس‌سیز بیر اؤفکه ایله دولو ایدی، اونو بوراخمایان فیکیرلر ایچینی گمیریردی.
آلنینیدا آغری حیس ائله‌دی. آغری‌نین ندنینی بیلمک اوچون الینی قالدیریب آلنیندا گزدیردی؛ یئکه و آغریلی بیر سیزاناق (جوش) قاشقاسیندا جوجرمیشدی. ایکی الینی بیر-بیرینه قوووشدوروب بیرآز بارماقلاری ایله اوینادی.
اؤز-اؤزونه میزیلداندی: گؤزل‌آغا چوخ گؤزل‌ایدی ووردو یانیننان دا بیر چیچک چیخارتدی.
نئچه دیقه‌لیک یوخویا دالدیغی قورو یئرده باشینی قالدیریب آچیق پنجره‌دن گؤی اوزونو، پارلاق اولدوزلاری سئیر ائتدی. اورالاردا نه‌لرسه آختاریردی، اوره‌یی چیرپیناراق داریخیردی …
یاغیشین ایلک دامجیلاری اؤزونو شیشه‌یه چیرپدی. قادینین گؤز یاشلاری گیله-گیله کوچهیه یاغیردی. تورپاقدان قووزانان سولموش آرزولارین، گؤمولموش نیسگیل‌لرین قوخوسو بورنونا دولوردو.
کیبریت قوتوسونا بنزر ائوی‌نین حالیندا، بویاسی هر یئره سیچرامیش لاکلارینا باخیر. رنگارنگ لاکلاری‌نین بعضیسی چارتلاییب بعضیسی ایسه قیریق-قیریق اولوب بویالاری مئبیله، دؤشه‌مه‌یه، فرشه، گوزگویه بئله سیچرامیشدی.
چؤنوب گوزگویه باخیر: بو سئری آغلامییاجام.
گؤزو اوزونده‌کی چاپیغا ساتاشدی؛ یقین کی اوزونده‌کی ایز قالماسایدی ایندی هر شئیی چوخدان اونوتموشدو. بیر آن قیزارمیش گؤزلرینی یومدو؛ دوداقلارینی سیخدی.
گؤزیاشلاری‌نین بیریکدییینی حیس ائتدی. دردی دئشیلمیشدی؛ اللری ایله ساچینی دارتیب یولدو، قیشقیردی: آغلامییاجام.
اوزونده یئرله‌شن جوشلارا باخدی. الینی قالدیریب ساچلارینا توخوندوردو؛ قوپدوغو توکلری ییغیب کنسولون اوزه‌رینه تؤکدو. قاشی‌نین آلتیندا چیخمیش بیز-بیز توکلره باخدی. الینی اوزادیب ماققاشی گؤتورمک ایسته‌سه ده بؤیرونده یئرله‌شن قایچییا ال آتدی.
ساچلادیغی ساچلارینی توپا-توپا الینه ییغیب ایسته‌دییی یئردن کسیب ائوه سپه‌له‌دی.
کنسولون اوزه‌رینده‌کی عطری گؤتوروب گوزگونو سیندیرارکن قیشقیردی: سن ده مننن دوز دئمیرسن، چاش گؤرسه‌دیرسن منی.
اییلیب یئره تؤکولموش گوزگو قیرینتی‌لارینا باخدی.
چارتلامیش و مین تیکه‌یه بؤلونموش گوزگوده یئنه ده اؤزونه باخیردی؛ چاپیغی بؤیویوب داها دا چوخورلاشمیشدی.
بیری بئینینده پچیلداییردی:
-گؤرورسن؟! سن ائله چاشسان، منلیک بیر شئی یوخدو.
یئنه اللرینی قالدیریب ساچلارینی توپا-توپا توتوب دارتیر، یولور …
قلمی اوپئنین اوستوندن گؤتوروب سویودوجویا ساری یئریدی. بایاقدان ایشقافلاری دیقتله سوزن گؤزلری شکرقابینی بوم-بوش گؤردو؛ بئینینده‌کی لیسته‌یه شکری ده آرتیردی. ائوده نه‌لرین قورتاردیغینی سویودوجونون اوستونه یاپیشدیردیغی بیر تیکه کاغیذین اوزه‌رینه تئز-تئز یازدی: شکر، یاغ، دوز، سبزی، …
یومشاق و توکلو بیر ال الی‌نین اوستونو توتدو. اونو سویودوجویا سیخیشدیریب بوتون آغیرلیغینی اوزه‌رینه سالدی؛ بوغوق و اؤفکه‌لی بیر سس ایله قورخونج پیچیلتیسینی قولاغی‌نین دیبینده ائشیتدی: دئمه‌میشم لاک وورما؟!
دوداقلاری‌نین آراسیندان قیزغینجاسینا چیخان کلمه‌لر ایله برابر نفسی‌نین پیس قوخوسو دا بورنونا دولوردو. آغ دیشلرینی بیر-بیرینه سیخیب دانیشارکن ساققالی‌نین بیز-بیز توکلری اوزونه باتیب آغزیندان سیچرایان توپورجه‌یین قولاغینا یاخیلدیغینی حیس ائدیردی. بدنی دم ائله‌دی؛ اتی اورپشدی.
دانیشا-دانیشا بارماقلارینی الی‌نین آراسینا آلیب سون گوجو ایله سیخیردی. بارماقلاری‌نین آراسینداکی قلم آز قالیردی سینسین. بئلینی بیرآز اییب قادینی‌نین دوداقلارینا زیلله‌ندی.
-روژ دا ووروبسان؟!!! حتمن گرک شهر جیندالارینا اوخشاداسان اؤزووو؟!!!
قادین الی‌نین آغریسیندان اوزونو تورشودوب اوفولداییردی. سول الینی اوزادیب اونون چیینیندن توتوب سون گوجو‌ایله ایته‌له‌دی.
حیرصدن قیپ-قیرمیزی اولموش گؤزلرینی قادینین آغریدان یاشارمیش گؤزلرینه دیکدی، قارا ساققالی غریبه بیر حالدا تیتره‌ییردی:
-منیم اۆزومو بئبیله قاشیما. خواهیشا دینج اوتور.
سالونون او باشیندان گله-گله قیشقیرتیسینی ائشیدیر: دایان گؤروم بی، سنننم صادقی! سن گئنه ریمل ووروبسان؟
دایانیر، اوره‌یی سورعتله چیرپینیر. اللری آیاقلاری بوم-بوز اوْلوب اسمه‌یه باشلاییر. کوره‌یی‌نین اورتاسیندان سویوق تر آخیر. الینی اوره‌یی‌نین باشینا قویوب آللاها یالوارماغا باشلاییر؛ دوداغی آلتدا تئز-تئز میزیلدانیر: بو سئرینی خئیره یوز بیر ده بزنمه‌رم.
معاون‌لری‌نین زهملی سسینی آرخاسیندا ائشیدیر:
-چؤن من طرفه گؤروم هله،- آشاغیلاییجی باخیشلاری ایله باشدان آیاغا قیزی سوزور، باشینی تاسف‌له بوللاییر.- دوش دالیما گه دفتره.
آیاقلاریندا حیس قالمامیشدی. تیتره‌یه-تیتره‌یه دالینجا سورونور آنجاق قاپیدان ایچه‌ری کئچمیر. سالوندا کیریییب باشی آشاغی دایانیر. اینجه اللری‌نین بارماقلارینی شیققیلدادیر.
-انضباط نومره‌وی ۱۲دن وئره‌نده آغلین باشووا گله‌جک. هارای بو باشدان، بیر ده پوخ پوسور یاخیب گلسن ایخراجسان. تشریف آپاریب ائله اره گئدرسن. اوزون سؤزون قیساسی بورا مدرسه‌دی قحبه‌خانا دؤور.
آغزینی دولدوروب دانیشماق ایسته‌دیکده اوزوندن چکیلمه‌ین نفرتله برابر هر ایکی الینی ده گؤیه قالدیریر: بوردا دوروب اؤزوو یوووب یارپیز اوسته قویما، باش بئینیمی ده تؤکمه.
یاشیل گؤزلرینی آغاردیب داوام ائدیر: دینج اوتور صادقی.
قورخو حیسی اوشاقلیغیندان روحونو، بدنینی بوروموشدو، حتی بوتون دویغولارینا و داورانیشلارینا دا حاکیم اولموشدو.
قادینین الینی محکم بوراخدی؛ دیکسینیب یئره ییخیلدی. او، داغیلمیش ائوین اورتاسیندا، قیریق-قیریق لاک‌لارین، بویانمیش وساییلین آراسیندا آیاقلارینی حیرصله یئره باسا-باسا بیر آشاغی بیر یوخاری یئریییردی. آیاقلاری آلتیندا دؤشه‌مه شاققیلداییردی.
قادین آیاغا قالخیب بیر آن آشپازخانانین اورتاسیندا دوردو، دوشونجه‌لی‌ایدی. سویو آچیب اللرینی اوزون-اوزون یودو. سانکی نه ائله‌دییی‌نین فرقینده دئییلدی.
او، یاتاق اوتاغینا هجوم چکدی. بیر آزدان الینده‌کی یاشیل قوتو ایله حالین اورتاسیندا دوردو؛ آغیرباشلی بیر تاویرلا قادینا باخدی؛ آنجاق بیر آندا قوتونو ضربله دؤشه‌مه‌نین اوزه‌رینه چیرپدی. لاکلاری شاققیلدایاراق هر یئره سپه‌له‌ندی. سینیق-سینیق اولوب بویالاری هر یئره سیچرادی. سانکی گؤزونون اوتونو آلماق ایسته‌ییردی.
قادین آشپازخانانین اورتاسیندا دوروب شاشقین-شاشقین قاشلارینی قالدیراراق سس‌سیزجه ارینه باخیردی.
اونو اؤزگه گؤردو، سانکی سسی ده ده‌ییشمیشدی. ایلک گونلرده او دانیشارکن نه دئدیینه قولاق وئرمیردی؛ سس تونونا وورغون اولدوغو اوچون تکجه سسینی دینله‌ییردی. اونون سئوگیسینی اوره‌یینه سیریق گئتمیشدی.
داها سسینی دینله‌میردی …
سسی آلچاق آما سرت‌ایدی. گؤزلری نفرتله پارلاییردی.
ماسانین اوزه‌رینده‌کی کاغیذ دسمال قوتوسونو گؤتوروب اوزونه چیرپدی. ایشاره بارماغینی گؤیه قالدیرارکن گؤزلرینی ده بره‌لتدی: او پوخو دا سیل دوداغوننان. بئله ائله‌مه دوست-دوشمان ایچینده بی چنگه پوخ ائلییم سنی. بیر سئری قولاغوندا سیرغا ائله.
او قاتی غضبله‌نیب اوز-گؤزو پؤرتوب زهر تولوغونا دؤنموشدو. آرا قاریشیب مذهب ایتمیشدی.
اری‌نین داورانیشلارینی ایزلرکن قانی قارالا-قارالا « بونا باخ! نئجه ده اؤزوندن چیخیبدی» دئیه دوشونوردو اؤفکه‌ایله.
قارا پالتاری‌نین یاخاسینداکی عدالت نیشانینا گؤزو ساتاشدی. او بیر یاندان کاغیذ کوغوذونو ساهمانا سالارکن بیر یاندان دا میریلدانیردی؛ گؤردویو ایشلردن قیپجینمیردی بئله. دئیینمه‌یی‌نین آردی آرخاسی کسیلمیردی. الینده‌کی کاغیذ-کوغوذون باش طرفینده تره‌زی نامادینا خئیلک باخیب بیردن پیققیلداییب گولدو.
عصبی حالدا گوله-گوله « بیری‌نین جیسمینی اؤلدورنده داغ داش یئریندن اوینئییر ولی بیری‌نین روحونو اؤلدورنده عدالتین توکو بئله ترپنمیر.» دئدی.
چؤل قاپی محکم چیرپیلدی. اللری ایله قولاقلارینی توتدو.
دیوارداکی ساعاتا باخیر.
فیکیرلی-فیکیرلی کابنئتین بؤیرونده‌کی سوغان‌یئریندن بیر دنه سوغان گؤتوروب سویماغا باشلاییر. اللری تیتره‌ییر؛ سوغان یئره دوشور. ساغ الی‌نین بارماقلاری حدسیز آغریییردی. اییلیب سوغانی گؤتورور؛ دوغرایا-دوغرایا گؤز یاشلارینی سیلیر. دویون قارینا آغلاماق اوچون لاپ ائله الینه چم دوشموشدو. گؤزلری یول چکیردی فیکری ایسه دارماداغین ایدی.
-گئنه نمنییه زیریلدئییرسان؟ یادوننان چیخماسین ها، گرک هئچ کس بیلمییه.
داییسی سانکی گؤزلری ایله اونو آرایا آلمیشدی.
نارین گوللو دونونو گئیینرکن باشینی سیلکه‌له‌ییر، سسی بوغازیندان زورلا چیخیر: یاخجی دایی، دئمه‌رم.
توپورجه‌یی‌نین پیس قوخوسو دوداقلاریندان، بوینوندان چکیلمیردی. اوشاق اولماغینا باخمایاراق پیس ایش گؤردوکلرینی بیلیردی، داییسی هر دفعه هئچ کسه دئمه‌مه‌یینی وورغولاسا دا اؤزو ده بو ایشلرین گیزلین قالماسینی بوتون ووجودو ایله حیس ائدیردی.
کوچه‌نین باشیندا تاکسینی ساخلاتدیردی. قاپینی آچیب ائندی. یام-یاشیل آغاجلار ایله بزنمیش، اولدوقجا اوزون و حضور دولو کوچهیه نظر سالیب دریندن نفس آلدی. یاواش آددیملارلا چوخ کیچیک بیر یاماجی قالخیب اوزو آشاغی ائندی. سئودیی یاشیل قاپینی اوزاقدان گؤروردو. اوزوم آغاجی سارماشیق کیمی دیوارینا ساریلمیشدی؛ یاشیل یارپاقلاری رؤیالاریندا جانلاندیردیغی گؤزه‌للیک تابلوسونو آندیریردی. بالاجا بیر یئل اسن کیمی آغاجلارداکی یارپاقلار بیر-بیرینه ده‌ییب خیشیلدایاراق دورغون یای هاواسینی سرینلشدیریردی. عئینی آندا جینقیل داشلار آیاغی‌نین آلتیندا خیرچیلداییردی. حیاتدان بئزدییی چاغلار اؤزونو بو کوچهیه یئتیریب باشدان-باشا خئیلک آددیملاردی؛ آرخایین-آرخایین کوچه‌ایله دردله‌شردی. او زامانا قدر هئچ دادمادیغی بیر راحاتلیق دویاردی.
گؤزلرینی یومدو؛ درین-درین ایچینی چکدی. آرتیق اوسانمیشدی بو حیاتدان. آیاقلاری دالینجا گلمیردی.
همن حضور دولو یاشیل قاپی‌نین اؤنونده گولومسه‌یرک آیاقدا دوران بیر کیشی‌یه گؤزو ساتاشدی. اونو گؤرر-گؤرمز کئفی قاچدی.
او، بوغونو بوراراق پاریلدایان گؤزلری ایله قادینی باشدان-آیاغا سوزوردو.
قادینین اوزاقلاردا بیر شئی آرایان دالغین گؤزلری هر کسین دیقتینی جلب ائدیردی. اونون اسمر اوزونده یئرله‌شن همیشه دولوب بوشالان گؤزلری گؤز آلیجی‌ایدی.
تانیمادیغی کیشی‌نین معنالی باخیشلارینی هله ده اوزه‌رینده گؤرونجه سیخیلدی.
او قاپی‌نین اؤنونده اوتوردو؛ دیرسکلرینی دیزلرینه دایاییب، یاناقلارینی اووجلاری‌نین آراسینا آلیب اؤنه دوغرو اییلدی. قادینا دوشونجه‌لی-دوشونجه‌لی باخاراق گولومسه‌ییردی.
موبایلی‌نین سسینه دیک آتیلدی. مئساژی وارایدی. اسکی و رنگی روفو گئتمیش موبایلینی کیفیندن چیخاریب بیرآز باخدی؛ یئنی لمسی موبایل‌لاردان بئله محروم‌ایدی. قاشلارینی چاتاراق آچیب اوخودو: ائوین وضعی ندی بئله؟! هارداسان سن؟! گؤزومو ایراق گؤروب هارا قاچیبسان؟! دئدیکلریمی قولاق آردینا ووردون گئنه؟
اونون هر یئرده یییه‌سی وارایدی؛ هئچ کسدن ده داد-هارای یوخ ایدی.
اجاق‌گازین اوزه‌رینده‌کی چایدان پیققاپیقلا قایناییردی.
دوغرانمیش یئرآلمالاری قیزدیریلمیش یاغین ایچینه آتیر. ایستی یاغ چیرتاچیرتلا یئرآلمالاری قیزاردیر.
اللرینی اوپئنه سؤیکه‌ییب ائوینی نظردن کئچیریر. دیوارا ووردوقلاری شکیللره باخیر. تابلولارا باخیر. چؤنوب یئرآلمالارا باخماق ایسته‌دیکده گؤزو اجاق‌گازین گوزگویه چئوریلمیش شوشه‌سینه دوشور. پؤرتموش بیر قادینی گؤرور. اوزونده جیغیر سالیب قوروموش یاش ایزلرینه باخیر؛ اؤلگون اوزونه، سولموش گؤزلرینه. ایچینده‌کی دورغون قاسیرغانین گؤزلریندن فیسقیرماق ایسته‌دییینی بئله گؤروردو. قاپ-قارا ساچلاریندا توتام-توتام آغ ساچلار ایلک باخیشدا کسکین بیر قاریشیقلیق، پارادوکس یارادیردی. یئنه باشینی چئویریب قیزی‌نین شکیلینه باخیر. او گونو بو شکیللری چکدیررکن قیزی دا چوخ آغلامیشدی. اونون دا گؤز یاشلاری بالاجا اوزونده جیغیر سالیب اوره‌یینی اودلامیشدی. اؤزو دئمیشکن او « پیسدیحلی لئچه‌یی» اؤرتمک ایسته‌میردی. قوجاغیندا تیتره‌یرک آغلامیشدی. خیسین-خیسین خئیلک قولاغینا پیچیلدامیشدی. بئله‌لیک‌له هم ده آتاسی‌نین گؤز آغارتمالاریندان اماندا قالماق ایسته‌میشدی؛ او، یئته‌نه یئتیردی یئتمه‌یه‌نه ده بیر داش آتیردی.
قارا لئچه‌یی‌نین اوزه‌رینده‌کی رنگارنگ کپه‌نک‌لر در حال سولوب رنگلرینی ایتیرمیشدی‌لر؛ بیر-بیر قاناد چالیب اوزاقلاشمیشدی‌لار …
حال بویو سپه‌لنمیش بعضیسی ایسه اوووق-اوووق اولموش رنگ به رنگ لاکلارینا باخیر.
اونون دوغرولاری آراسیندا بئله بیر یانلیشلارا یئر یوخ‌ایدی.
اییلیب لاکلاری توپلاماق ایسته‌دیکده گؤزلری دیرناقلارینا ساتاشیر. دیرناق توتانی گؤتوروب اوتوردوغو یئرده دیرناقلارینی توتور؛ سونرا لاک‌پوزانلا دیرناقلاری‌نین جانینا دوشور.
بورنونا آجی قوخو دولور. باشینی قالدیریر. ائو دومان ایچینده‌ایدی، آشپازخانادا قارا توستو بورولوب هاوایا قالخیردی. یئرآلمالار یانیب کۆل اولموشدو.
تاوانی سینکه توللاییر. زویوب دؤشه‌مه اوزه‌رینده اوتورور. بئلینی کابینئته سؤیکه‌ییر.
گؤزلری آخمامیش یاشلاردان دولایی پاریلداییردی. چنه‌سی، دوداقلاری اسیردی. اللرینی قالدیریب چنه‌سینی برک-برک توتدو.
شورتونون ایسلاندیغینی حیس ائتدی. اییلیب دامه‌نینی الینه آلدی. قیرمیزی لکه‌نی گؤردو.
-هییییسسس آغلاما
آناسی، گؤزلری برلمیش، باشیندان آیاغی‌نین اوجوناجان دهشته دوشموش قیزینی حربه-زوربا ایله ساکیتلشدیرمک ایسته‌ییردی. گؤزلرینی آغاردیردی:
-ائله خانیملاردا بئله شئی‌لر اولار. فقط بابون قارداشلارون بیلمه‌سین. چوخ عاییبدی. سوفره زات سرنده، اییلیب دوزلنده ده موغایات اول بیلینمه‌سین. چوخ اییلمه.
ماسانین اوزه‌ریندن تئلویزیون کنترولونو گؤتوروب فیلشده‌کی فیلمی آچدی.
ایلک اؤنجه ماهنی‌نین اوجا سسی ائوه یاییلدی. سونرا ایسه فیلیمده‌کی اوشاقلارین جیغان-بیغاننیقلاری.
عمیسی خانیمی اویناییردی، فیرلانیردی. چوخ چکمه‌دی آناسی دا قوللارینی آچاراق اویناماغا باشلادی. کامئرا، فرح‌له اوینایان آناسینی داها دا قاباغا چکدی. آناسی‌نین اوزونده‌کی فخری، ایشیلتینی بو قدر زامان کئچدیکدن سونرا بئله گؤزلری یومولو خاطیرلایا بیلیردی.
گؤزلرینی آچیب قارداشینی او مشهور دامنی ایله گؤردو. آجی و محبت دولو بیر گولوش پارتلامیش دوداقلارینی بزه‌دی.
قارداشی اینینده‌کی گۆده دامنی‌ایله چوخ گولونج گؤرسن‌سه ده گؤزلرینده‌کی قورخو دانیلمازایدی.
کامئرا ایندی ده آتاسینی قاباغا چکیردی. دولوخسوندو؛ قارانلیق، اوزگون، قایغیلی گؤزلری آنیندا دولوب پاریلدادی. او کیشینی حدسیز سئویردی. آتاسی‌نین ساچلاری هله آغارمامیشدی.
اوشاقکن آدینی گؤیه گؤندرمک فیکرینده اولدوغو پیله‌مه‌جین اوستونه یازماغی قویماسا بئله، گؤزلرینی آغارداراق حیرصله‌نیب « عاییبدی، گؤرن اولار» دئسه بئله او کیشینی حدسیز سئویردی. هله ده دوشونوردو: او گون پیله‌مه‌جین اوستونه آدینی یازیب گؤیه گؤندرسه‌یدی نه اولاجاقدی گؤره‌سن؟! گؤیده ده کیشی‌لر یاشاییردی‌لار می؟!
آنجاق بئله‌ایدی سه نییه ساعاتلارلا داییسی ایله تک قالماغا ایذین وئریردی‌لر؟! او دا کیشی دئییلدی می؟!
اوشاقکن بئله آنلامیشدی آتاسی‌نین قیزی‌دیر دئیه قارداشیندان فرقلی‌دیر ده. او گونو قارداشی اؤز آدینی پیله‌مه‌جین اوستونه یازیب سئوینجدن آتیلیب-دوشه‌رک گؤیه گؤندرمیشدی.
ماهنی سسی کسیلدی. کامئرا قارداشینی دؤشکجه اوسته قاباغا چکیردی. دوختورسا بؤیرونده اوتوروب کئییدیجی ایینه‌نی حاضیرلاییردی.
گؤزونو قارداشیندان چکیب اؤزونه زیلله‌دی. قارداشی‌نین اللرینی توتوب اونون آجی چکمه‌سیندن آجی چکیردی. اللرینی محبتله سیخیردی.
او آجی چکنده قارداشی هاردا ایدی گؤره‌سن!!!
گؤزونو تئلویزیوندان چکمیردی؛ باخا-باخا دیرناقلارینی یئییر مایاسینی بئله قوپاریردی.
یئنه قایچییا گؤزو ساتاشیر. ال آتیب گؤتورور، هر بیر تئلینی کسه-کسه گؤز یاشلاری کنسولون اوزه‌رینده‌کی کسیلمیش ساچلارینا تؤکولور. کسیلمیش ساچلاری‌نین، دیرناقلاری‌نین پیچیلتیسینی ائشیدیردی.
گؤزو یول چکیردی؛ اؤزونه گلدی. فیکرینی ایزله‌دییی ویدئویا وئردی.
ایش بیتمیشدی. هامی ال چالیردی؛ قارداشی بؤیویوب یئکه کیشی اولموشدو دئیه کادو ایله یانینا گلیب سئوینجله اوزوندن اؤپوب تبریک دئییردی‌لر. قارداشی ایسه بیر الینده جوربه‌جور اویونجاقلاری بیر یاندان دا کئفله الینده‌کی ساندیسینی ایچیردی. آرتیق راحاتلامیشدی.
یئنه چؤنوب ائوینه باخیر، ائوین رنگی آتمیشدی. آنجاق لاکلاری‌نین الوان بویالاری ائوی گؤی قورشاغینا بنزه‌دیردی.
عمیسی خانیمی تئلویزیونون قارانلیق صحیفه‌سیندن بویلانیب باش بارماغینی اونا ساری توتور: هییییییس آغلاما، سن آناسان، دور آیاغا ایندی قیزین مدرسه‌دن گلر. آلاهیدان یئرآلما قیزارت.
اۆزو گؤرونمه‌ین بیری پیچیلدادی: یئردن گؤیه یاغیر ها، همیشه گونو قارا باشی قاپازلی قادین.
عمیسی خانیمی اتلی اندامینی ترپتدی، قاشلارینی چاتیب دیللندی: دونیانین ایستی سویوغون چکمئییبسوز هله، یاواش-یاواش برکه-بوشا دوشه‌جکسوز.
تئلویزیونون چیراغی یانیر، بیری کناردان دانیشیر: بیزلر ده هر کس کیمی بیر اینسان اولاراق سئویلمک ایسته‌ییریک آما بیر آدامین سئوگییی ماهنا ائدیب بیزی اؤلدورمه‌سینی ایسته‌میریک.
داییسی خانیمی یانمیش الینه زیللنمیشدی. داییسی الینه پالتار اتوسونو باسمیشدی. بوغوق سسله دولوخسونا-دولوخسونا « بیزلر ائله چیله چکمه‌یه دوغولموشوق.» دئدی.
قیرمیزی دونلو قادین الینی اوره‌یی‌نین باشینا قویدو، پیچیلدادی: اورک یانماسا گؤزدن یاش چیخماز.
تئلویزیونون دا رنگلری سولور. هامی آغ-قارا اولور. همن قادینلار تئلویزیوندان بویلانیب ائوه باخیرلار؛ سونرا قادینا زیلله‌نیرلر:
-ساچلارین نه ده گؤزل اولوب!
قاققیلداشیرلار …
بارماغی ایله اؤنجه قیرمیزی گولو گؤرسه‌دیر. سونرا اؤزونو الینده‌کی کیتی لیوانی ایله. بارماغینی کاغاذین قیراغینا آپاریر، ائوی گؤرسه‌دیر، سونرا بیر باغلی قارا قاپییا ایشاره ائدیر: بو آتامین ایش اوتاغیدی.
همن بارماغی ایله اوزونه تؤکولموش ساچلارینی قولاغی‌نین دالینا ییغیر:
-بو گوله هر گون سو وئره‌جم، لااااپ قیرمیزی اولاجاق، گؤیچک اولاجاق، سنین کیمی آنا جونم.
بو سؤزلری قیزی دئییر. اللرینی تئز-تئزی گؤیده اویناداراق قاتی هیجانلا دئییر.
سونرا آشپازخانایا گئدیب کیتی لیوانیندا سو گتیریب کاغیذین اوزه‌رینه تؤکور. قیرمیزی گولون بویاسی بوتون کاغیذی آل قانا چئویریر. بیرآز دا آغ جورابینا یاخیلیر.
قاچیب اوپئنه چیخیر؛ تئلئفونو گؤتوروب آتاسی‌نین نؤمره‌سینی توتور.
آغلامسینا-آغلامسینا اولانلاری دئییر. سونرا ساغ آیاغینی گؤیه قالدیریب سول الی ایله گؤرسه‌دیر: باخ جورابیم دا قیرمیزی اولدو.
قیزی آتاسی‌نین اوره‌یینی، محبتینی قازانماق ایسته‌ییردی.
گؤزلرینی یومدو. کیرپیکلری‌نین آرخاسیندا صحنه‌لر بیر-بیرینه قاریشمیشدی. او الوان رنگلی دونیاسینی ایتیرمیشدی.
اؤزونه گلیر: گۆنۆ نییه گۆنه ساتیرام؟!
دراوئرین اوزه‌رینده‌کی هر شئیی داغیدیر، ووروب سیندیریر.
قاپییا ساری یئریییر. الینی آتیب قاپینی آچماق ایسته‌دیکده باغلی اولدوغونو گؤرور. آیاقلاری گئت-گئده دؤشه‌مه‌یه باتیر، دؤشه‌مه قیر کیمی قادینی ایچینه چکیر. قورخودان بدنی قیج اولور. ترپشه بیلمیر. اوزو داها دا سولور، دیش‌لری کیلیدله‌نیر، بورون پره‌لری تیتره‌ییر.
آرخاسینی قاپییا ساری چئویردییینده آیاقلاری آزاد اولور. ماسانین اوزه‌رینده‌کی قایچینی گؤتوروب اؤنجه دؤشلرینی کسیر سونرا آله‌تینی …
دؤشه‌مه‌یه قانلی ایز سالا-سالا یئنه قاپییا ساری یئریییر؛ اؤنونده دوردوغوندا قاپی آچیلیر …
