بیر سؤیود ایییلدی بؤیوک چای اوسته،
گؤزوندن بیر داملا دوشدو سولارا؛
طبیعت آچمیشدی باهارا آغوش.
داش بولاق اسنه‌دی، بوزونو قیردی،
بنزه‌دی قاینایان شن آرزولارا؛
تؤکولدو مرمرلی کاساسینا نوش.
بیر نسیم دولاندی دار کوچه‌لری،
بیر آویج دن سپدی قوش یوخولارا
«آرزو بوداغی‌نین اوستونه قونموش.»
بیر قیز بایداسینی چایا گتیردی،
بنزه‌دی قامتی گؤزه‌ل قولارا؛
آغ داورانیشینا حئیران اولدو هوش.
ساللاندی باهارین سالامات قیزی،
اورکک ماراللارا، مست آهولارا؛
بنزه‌دی شیرنجه او گئدیش، دوروش.
بیر شاعر دایاندی کؤرپونون اوسته،
بیر ماهنی اوخودو بوتون بونلارا؛
سسینی سسینه قاتدی قارانقوش…
