چیخار
ح.هریزلی

اوره‌یه دوشرسه عشقین آتشى
آلاوو،توستوسو گؤزلردن چیخار.
ووصالا یئتیرمک، مرد ایاق ایشى،
هیجرانسا تیتره‌ین دیزلردن چیخار.

سؤزدن سئوینج دوغار، سؤزدن غم دوغار،
سؤزدن کدر یاغار، سؤزدن دم دوغار،
هربیرسؤزه اویغون بیر عالم دوغار،
ساواش دا،باریش دا سؤزلردن چیخار.

نه دوشمان؟ نه اؤزگه؟ نه دئمکدیر یاد!
آغاجى ایچیندن قورد یئیر ائولاد!
یورد ایچره، ائل ایچره هر فیتنه-فساد
چیخارسا، لاپ دوزو بیزلردن چیخار.

وطنین قولونا قولومو سالدیم،
ائلیمین یولویلا گئدیب اوجالدیم،
یاد جیغیرا دوشن ایزیمى آلدیم،
اووچو اوو اوستونه ایزلردن چیخار.

سوى آدیم «هریزلى»،«حاجى»دیر آدیم،
عشقیمدن، یولومدان بیر آن قوپمادیم؛
عالمى یاندیران نالم، فریادیم
ایچیمده کؤزه‌رن کؤزلردن چیخار.
۱۳۹۷/۱۱/۲