آچ داها، آچ بو آتوشکانی کی من
سارسیلیب سینسیمیشم دای بو داریسقال گئجه‌دن!
چوخدو، چوخداندی خوروز بانلاماسی قونشو ائویندن یاییلیب،
بو آجی، بو قارا دینمز گئجه آه
سیخاراق قلبیمی لنگیتمه‌ده‌دیر.
چوخدو، چوخداندی کی من بو قارا ضولمت گئجه‌ده
سوساراق، پنجره آردیندا آییق،
یول‌لاری گؤزله‌یرک
اولموشام گؤزله قولاق:
آستا- آستا یاییلان ماهنیلاریلا سرخوش،
اودلانیب نور ساچان اولدوزلارا اولموش وورغون،
دان یئریندن آسیلان، رنگی سولان پرده‌یه حئیران.
آچ گؤروم، آچ بو آتوشکانی کی صوبح
بو قارا پرده‌نین آردیندا ایشیق ساچمادادیر.
سحرین قانلی دؤشوندن دویولور خوروزون بانلاماسی،
گوزگومون مات اوزه‌ریندن سیلینیر غم غوباری
اؤپمه‌سی‌له گونشین قور سپیلیر گؤزلریمه،
گولمه‌سی‌له گونوزون رنگ قاتیلیر گؤز یاشیما…
