من بیر میللتین …
ع.ن. چاپار

من،
بیر میللتین چییینلرینده یوکلنمیش
آرزولارین باتیسی ؟!..

من،
بوتون اؤلکه کؤرپه‌لریمیزین
چاتلاق دوداقلاریندا چوروموش-
ایلک تبسسومون آغیر قاتیسی؟!..

من،
شه‌هر جوجوقلارینین
گنج رؤیالی ساعاتلاریندا
تیک – تیک قوللارینین
بیر – بیره
قوشا چاتیسی ؟!..

من،
گنج‌لر دوهالی
ایش – گوج بیلیکلی
زحمت اوردولو
ان اسکی بیر خالقین
گیزلی پارتیسی ؟!..

یوخسا …
تکی …
نیسگیللی میللتین
دردلی  اؤلکه‌نین
چییینلرینده یوکلنمیش
آرزولارین باتیسی‌می‌یام ؟!..

بیلمم ؛
یالنیز دوشوندویوم بئله‌سی …
منده دوغاجاق اونلار
دوغاجاق یقین !!!…..