کیتابلاریم
ع.ن. چاپار

کیتابلاریم قوجالمیرلار
من قوجالیرام!..
صفحه‌لری آغارمیر هئچ
ساچلاریم آغاریر آنجاق
صفحه – صفحه اوخودوقجا من اونلاری
هر زامان،
هر چاغ !….
کیتابلاریم
زمانه‌نین وارلیغیلا
یول سالدیریر اوره‌ییمدن.
کیتابلاریم قوجالمیرلار
من قوجالیرام
هر گئچدیکجه بو یوللاردان
زامان – زامان.
کیتابلاریم گاه گولدورور،
گاه آغلادیر.
کیتابلاریم آغیر – آغیر
یوک قالاییر کوره‌ییمده.
کیتابلاریم آینادیرلار
کیتابلاریم بولاقدیرلار
من اونلاردا عکس اولونموش
هر بیر نه‌یه باخیرام هئی.
بولاق کیمی اؤز ایچیمده قاینایاراق،
اؤز ایچیمدن آخیرام هئی!…
آخا- آخا
قوجا بابا آدیندا بیر
یئنی کیتاب اولاجاغام.
صفحه – صفحه اوخوندوقجا
گنج‌لشه‌جم.
نوه‌لریم واراقلاییب
قوجالاجاق منی هر گون!!…
یاشاماغین نغمه‌سیدیر
کیتابلاردا عکس اولونان
هر یاس –
دویون …
نوه لریم
دینله‌یه‌جک بو نغمه‌نی،
اوخویاجاق بو نغمه‌نی.
نغمه بویدا
نغمه‌لره چئوریله‌جک نوه‌لریم.
یئنی کیتاب عنوانلاریم
و –
گله‌جک نوه‌لریم!…