کاراکتئرلر:
۱-قزئته‌چی
2-مئیوه ساتان
3-پروفئسسور
4-اوشاق
5-داستایوسکی
⌡صحنه: گون‌اورتانین ایستی- یورقون چاغی. بیر قزئته- ژورنال بورتکه‌سی. قزئته‌چی. ایکی یئشیک اوستونده موز مئیوه‌سی. مئیوه ساتان. قزئته‌چی بورتکه‌نین قاباغیندا بیر صنده‌لی اوستونده اوتوروب، الینده بیر قزئته آچیب واراقلاییر. مئیوه ساتان بیر مئیوه یئشییی اوستونده اوتوروب، یانمامیش بیر سیقارئتی الینده اوینا‌دیر. – سس‌سیزلیک!⌠
مئیوه ساتان: گئنه جماعت چکیلدی.
قزئتچی: هه.
مئیوه ساتان: میللت ائله بیل فقط آخشام اوستی‌لر روزنامه اوخیل‌لار.
قزئتچی: یوخ، سحر چاغی دا باش ویران اولیر.
مئیوه ساتان: ساعات ۹ دؤؤره‌سی؟
قزئتچی: ۱۰- ۱۱ دؤؤره‌سی.
مئیوه ساتان: منیم سحر چاغی (بیر آز دایانیر) ائله آل- وئریم اولمیر.
قزئتچی: دوغیردان؟
مئیوه ساتان: گؤرمیسن؟
قزئتچی: هه.
مئیوه ساتان: ایشیم اولیب چای ایچیب سیقار چهمی.
قزئتچی: یوخ، منیم آل- وئریم ائله سحر چاغ‌لاریلا آخشام چاغ‌لاریدی.
مئیوه ساتان: هه. بیلیرم. (بیر آز دایانیر) بعضن دؤرد ساعات اولیر بی کیلو دا میوه ساتا بیلمیرم. (بیر آز دایانیر) باخ، ایندی آخیرینجی‌سین بی ساعات اولار ساتمیشام.
قزئتچی: نه‌یی؟
مئیوه ساتان: (معنا‌لی باخیر) موزیمی.
قزئتچی: روزنامه ده ساتیلمیر. یالاننان بوتکه‌نین باشینا ییغیشیل‌لار. (بیر آز دایانیر) کوپی دسقاهی اولماسا، چؤری‌دن دوشه‌رو.
مئیوه ساتان: اوخییان یوخدی دااای. (بیر آز دایانیر) هئچ میللتده پیل دا یوخدی دییه‌سن.
قزئتچی: “جام- ی جم” نن “ایططیلاعات” یاخچی گئدیر. (بیر آز دایانیر) ایططیلاعاتچی‌لارین لاپ چؤریی یاغ ایچینده‌دی.
مئیوه ساتان: هه، بللیدی. آمما اولارین دا چوخی اوخییان دییل ائله بیل. (بیر آز دایانیر) آلیل‌لار شوشه زاد سیلمه‌یه. (بیر آز دایانیر) یا دا تره زاد بوهمه‌یه.
قزئتچی: (گولور) شعر دئییسن؟
مئیوه ساتان: (معنا‌لی باخیر) یووووخ، شعر منی دئیر.
قزئتچی: (گولور) بیری دونن اوچین آلدی. دئدیم بئبئله‌نی نئینیسن؟
مئیوه ساتان: هه، نه دئدی؟
قزئتچی: (گولور) دئدی تیلتییا دوغرییاجییام.
مئیوه ساتان: (معنا‌لی گولور) ایططیلاعاتی؟
قزئتچی: (گولور) یووووخ، چؤریی.
مئیوه ساتان: قالانی دا اولیر؟
قزئتچی: ایططیلاعات؟
مئیوه ساتان: هه. (یانمامیش سیقارئتی داماغینا قویور) …
قزئتچی: (بیر آز دایانیر) گولله کیمی.
مئیوه ساتان: (سیقارئتی دوداغین‌دان گؤتورور) نمنه؟
قزئتچی: ایططیلاعات. (بیر آز دایانیر) قالمیر. بی تکی ده قالمیر. گولله کیمی گئدیر.
مئیوه ساتان: (معنا‌لی باخیر) اوندا ائله سنون ده چؤریون یاغدادی کی.
قزئتچی: هه، یامان یاغدادی. (بیر آز دایانیر) بیرینده ۱۰ تومن قالیر یا دا ۲۰ تومن.
مئیوه ساتان: (معنا‌لی گولور) مین تومن؟
قزئتچی: (گولور) ته تومن.
مئیوه ساتان: (معنا‌لی گولور) هه، هئله؟
قزئتچی: هه، هئله.
مئیوه ساتان: اوندا گری من ده هر گون بیرین آلیم.
قزئتچی: نمنه؟
مئیوه ساتان: روزنامه.
قزئتچی: من بیردان گئده‌جییم. (بیر آز دایانیر) مننن سوورا آلارسان.
مئیوه ساتان: گئده‌جیسن؟
قزئتچی: هه.
مئیوه ساتان: هاچان؟
قزئتچی: (گولور) گئدنده دییه‌رم. (بیر آز دایانیر) هله سن نییه آلمیسان؟
مئیوه ساتان: نه؟
قزئتچی: روزنامه.
مئیوه ساتان: (یانمامیش سیقارئتی داماغینا قویوب، بیر آز دایانیر. سیقارئتی گؤتورور) هه.
قزئتچی: یانی نه، هه؟ نییه آلمیسان؟
مئیوه ساتان: واختیندا چوخ آلدیم. چوخ اوخیدیم. (بیر آز دایانیر) چیبیغین دا یئدیم. (بیر آز دایانیر. یاواشجا‌دان) هله ده آلتین چکیرم.
قزئتچی: نه چکیسن؟
مئیوه ساتان: (باشینی توولاییر. سیقارئت‌لی الینی قووزاییب گولومسه‌ییر) وینیستون.
قزئتچی: هه.
مئیوه ساتان: (اوتوردوغو یئشییین آلتین‌دان فلاکسی گؤتورور) چای ایچیسن؟
قزئتچی: یوخ.
مئیوه ساتان: نییه.
قزئتچی: هئله.
(قزئتچی الینده‌کی قزئتی لوله‌له‌ییب دورور قزئت- ژورنال‌لارین توزونو چیرپیر. مئیوه ساتان چایی تؤکوب قاباغینا قویور. آلتمیش نئچه یاش‌لی آریق بیر کیشی صحنه‌یه گیریر. کؤینه‌یی‌نین یاری‌سی شالوارین ایچینده، یاری‌سی دا اوستون‌دن آسلانیب. آیاغی‌نین بیری آخساییر. بیر یوموشاق شاللاغا بنزه‌ین ایپی یاری‌سینا کیمی ساغ الینه دولاییب. باشماغینی سوروتله‌یه‌رک صحنه‌نی دؤرد چئوره یئریییر. قزئتچیله مئیوه ساتان اونا باخیرلار)
قزئتچی: (گولور) پوروفسور، روزنامه آلمیسان؟
پروفئسسور: آلاجییام. (الینده‌کی ایپی آخسایان قیچینا چیرپیر) بالاما هر نه آلاجییام.
قزئتچی: (گولور) نه آلاجاغسان؟
پروفئسسور: بالاما نه دئسه آلاجییام. پوفی، توفی، ایسمارتیز.
قزئتچی: (گولور. بیر آز دایانیر. یاواشجا مئیوه ساتانا باخا‌راق، اؤز- اؤزونه) آخیر کی بیلمه‌دو بینین فلسفه‌سی نه‌دی.
پروفئسسور: (گلیب مئیوه ساتانین قاباغیندا دایانیر) واردی یا یوخدی؟
مئیوه ساتان: قالیب سنه، پوروفسور.
پروفئسسور: من دئیرم وار.
مئیوه ساتان: بیلیرم.
قزئتچی: نمنه وار؟
مئیوه ساتان: سن قاریشما.
پروفئسسور: (صحنه‌دن چیخا- چیخا قاهقاهایلا گولور) هله منه دئیر “یوخدی” یوخدی.
قزئتچی: (صنده‌لی‌سینده اوتورا‌راق) “یوخدی” یوخدی یان نمنه؟
مئیوه ساتان: (دوشونجه‌یه دالا‌راق) بئهئشتده “یوخدی” یوخدی. (بیر آز دایانیر) بئهئشتده هر نه دئسؤن وار.
قزئتچی: یانی نه؟
مئیوه ساتان: بینی بی موللا دئیرمیش پوروفسورا. (بیر آز دایانیر) دئیرمیش بئهئشتده “یوخدی” یوخدی. اوردا هر نه دئسؤن وار.
قزئتچی: هه.
مئیوه ساتان: اونا گؤره ده موطلقدی.
قزئتچی: نمنه موطلقدی؟
مئیوه ساتان: هئش نه.
قزئتچی: هئش نه یان نه؟
مئیوه ساتان: یانی موللا دئیرمیش پوروفسورا. (بیر آز دایانیر) دئیرمیش بئهئشت موطلقدی.
قزئتچی: پوروفسور نه دئییب اونا؟
مئیوه ساتان: (سیقارئتی آغزینا قویوب گؤتورور) دئییب دئمه‌لی “یوخدی” یوخدیسا، اوندا او دا موطلق دییل. (بیر آز دایانیر) دئییب
یاخچی، اوردا هر نه دئسؤن وارسا، اوندا نییه “یوخدی” یوخدی.
قزئتچی: یانی نه؟
مئیوه ساتان: هئش نه.
قزئتچی: هئش نه یان نه؟
مئیوه ساتان: هئش نه، فیکرو قاریشدیرما. (بیر آز دایانیر) چوخ‌دان ایدی پوروفسوردان خبر یوخ ایدی.
قزئتچی: هه.
مئیوه ساتان: (بیر آز دایانیر) دییه‌سن اونا نه‌سه اولیب.
قزئتچی: اولار.
مئیوه ساتان: بی هفته اولاردی.
قزئتچی: اولار. (بیر آز دایانیر. گولور) اوننان نه دئسؤن باش وئرر.
مئیوه ساتان: (معنا‌لی گولور) اوش گون بیننان قاباغ گئتمیشدیم یانینا. (بیر آز دایانیر) قورخیردیم اؤزیمی قوولاسین.
قزئتچی: هه، او دا گلیر.
مئیوه ساتان: نه؟
قزئتچی: هه. آلمیر کی. (بیر آز دایانیر) باخیر.
مئیوه ساتان: اوندا دای سنه چؤری چیخماز.
قزئتچی: هه. (بیر آز دایانیر) بیر تهر دولانیریق دااای.
مئیوه ساتان: (بیر آز دایانیر) ائوده دییلدی.
قزئتچی: کیم؟
مئیوه ساتان: پوروفسور.
قزئتچی: هاردئیدی؟
مئیوه ساتان: دئدی‌لر بیردان گئدیب. (بیر آز دایانیر) دئدی‌لر آپاریب‌لار.
قزئتچی: هارا؟
مئیوه ساتان: آیری شهره.
قزئتچی: (گولور) اولاردان نه دئسؤن باش وئرر.
مئیوه ساتان: نه بیلیم. (بیر آز دایانیر) یازیغ.
قزئتچی: هردن بیرین گؤتیریب بئشیین پیلین وئریر.
مئیوه ساتان: نه‌یین؟
قزئتچی: روزنامه‌نین.
مئیوه ساتان: هه.
قزئتچی: (بیر آز دایانیر) اوندا گؤره بیلمه‌دون؟
مئیوه ساتان: یوخ.
قزئتچی: (گولور) “یوخدی” یوخدی. بئهئشتده هر نه دئسؤن وار.
مئیوه ساتان: (معنا‌لی گولور) اوندا “یوخ” ین اؤزی یوخدیسا، دئمه‌لی هر نه ده یوخدی.
قزئتچی: دئمه‌دی‌لر هانکی شهره آپاریب‌لار؟
مئیوه ساتان: یوخ، بیلمه‌دیم.
قزئتچی: دئیرم آخی چوخ‌دان ایدی گؤرسنمیردی.
مئیوه ساتان: هه.
قزئتچی: یازیغ نخوشدی دئیرلر.
مئیوه ساتان: هه.
قزئتچی: دئیرلر کی سیللی وار ائله بیل.
مئیوه ساتان: هه.
قزئتچی: (گولور) بالاما هر نه آلاجییام.
مئیوه ساتان: (معنا‌لی گولور) پوفی، توفی، ایسمارتیز.
قزئتچی: (بیر آز دایانیر. تامسینیر) ایسمارتیز گؤیلیم ایسته‌دی.
مئیوه ساتان: چای ایچیسن؟
قزئتچی: یوخ.
(قزئتی لوله‌له‌ییب، بوینوندان کؤینه‌یی‌نین ایچینه سالیب کوره‌یینی قاشیییر. صحنه‌دن چره‌که تسبئهی‌نین شاققا- شوق سسی گلیر. ساچی- ساققا‌لی اوزون، آریق، گؤزل گؤرونوش‌لو، بیر گنج اوغلان صحنه‌یه گیریر. دار شالوارلی، اینینده صدف دویمه‌لی کوت. الینده یئکه چره‌که تسبئهینی فیریلدادا‌راق شاققیلدا‌دیر)
قزئتچی: (آیاغا دورور) به- به، بو دا داستایوسکی. یار گلیر ناز گلیر.
داستایوسکی: (گلیب بورتکه‌نین قاباغیندا دایانیر. گولور) اؤزیمیزدن بی شئی وار؟
قزئتچی: “نوید” نن “شمس” دای گلمیر.
داستایوسکی: “وارلیق” نئجه؟
قزئتچی: اونین دا تزه‌سی گلمئییب.
داستایوسکی: “همشهری” نین ویژنامه‌سی نئجه؟ او دا یوخدی؟
قزئتچی: یوخ. (ساغ الیله داستایوسکینی آشاغی‌دان یوخارییا سوزور) همشهریمیزین اؤزی گلیب، گؤرر دااای.
دستایوسکی: (صحنه‌ده یولا دوشه‌رک گولور) گؤرمه‌سه ده گؤردیره‌رو.
قزئتچی: (داستایوسکی‌نین آرخاسییجا، اللرینی دالینا وئریب، بیر آز دا کوره‌یینی اییب یئریییر) گئجه‌دن نه خبر؟
داستایوسکی: نه؟
قزئتچی: تویدان؟
داستایوسکی: (قول‌لاری‌نین هامی‌سینی آچیب یئرینده بیر دؤنه فیریلداییر) دای قومار اوینامییاجییام.
قزئتچی: نییه؟
داستایوسکی: (قول‌لارینی آچیر) گؤرمیسن؟
قزئتچی: نه‌یی؟
داستایوسکی: بوین ال- اوزیمی یومیشام. (بیر آز دایانیر. گولور) ائودن چیخاندا آینییا دا باخمیشام.
قزئتچی: دای نه؟
داستایوسکی: کوت- شالواریمی دا گئیمیشم. (بیر آز دایانیر. اییلیب آشاغی باخیر) باشماغی دا کی گؤریسن دااای.
قزئتچی: (گولور) ائودن چیخاندا دا قاپینی باغلئییبسان یا یوخ؟
داستایوسکی: (مئیوه ساتانین قاباغینا یئتیشیب) هله ائوین دووارینداکی ساعاتا دا باخمیشام.
مئیوه ساتان: (معنا‌لی گولور) ساعات نئچئیدی؟
داستایوسکی: (گولور) دوننکی واخت. (گولور)
مئیوه ساتان: (معنا‌لی گولور) آمما هله واختینا قالیر.
قزئتچی: نه‌یین؟
داستایوسکی: قفه‌نین. (بیر آز دایانیر. قزئتچییه ساری دؤنور) تاختا داراغ یادوندا؟
قزئتچی: یادیمدا.
داستایوسکی: بوین اوننان باشیمی دارامیشام، باااخ. (بیر آز دایانیر. مئیوه ساتانا ساری دؤنور) سن بیلرسن، ده‌ده‌مه اوخشامامیشام؟
مئیوه ساتان: (معنا‌لی گولور) هه، اؤزیسن. (بیر آز دایانیر) رحمتدیی.
داستایوسکی: دای قومار اوینامییاجییام.
مئیوه ساتان: یالان دئیسن.
داستایوسکی: گؤره‌جیسن، اوینامییاجییام.
مئیوه ساتان: سیقار نئجه؟
داستایوسکی: (گولور) یووووخ، اونی چکه‌جییم.
مئیوه ساتان: وئریم؟
داستایوسکی: هه، ایکی پاکات.
مئیوه ساتان: (مئیوه یئشییی آلتین‌دان ایکی پاکات مارلبرو چیخاریب وئریر. معنا‌لی گولور) روس اولاسان آمریکا سیقاری چکه‌سن.
داستایوسکی: (گولور. سیقارئت‌لری آلا‌راق اؤزونو شیشیردیب آیاق- باش گؤستریر. گولور) هله اینگیلیس تیپینی دئمیسن.
مئیوه ساتان: (معنا‌لی گولور) …
داستایوسکی: (بیر آز دایانیر. قزئتچییه ساری دؤنور) کامپیوتئر یادوندا؟
قزئتچی: یادیمدا.
داستایوسکی: گئجه اونی دا اوتیزدیم.
قزئتچی: یوووخ.
داستایوسکی: هه. (بورتکه‌یه ساری گئدیر. قزئته- ژورنال‌لارین سو تیترلرینه بیر آز باخیر. الینده‌کی چره‌که‌نی فیریلدادیب شاققیلدادا‌راق صحنه‌دن چیخا- چیخا) دای گئتدیم.
مئیوه ساتان: قفییه؟
داستایوسکی: قفییه.
قزئتچی: به قومار نه؟
داستایوسکی: دای قومار اوینامییاجییام.
(داستایوسکی چیخان کیمی پروفئسسور گیریر صحنه‌یه. ۱۰- ۱۲ یاش‌لی بیر اوشاغین الین‌دن یاپیشیب. مئیوه ساتانین قاباغیندا گلیب دورورلار)
پروفئسسور: بینا بی موز وئر.
مئیوه ساتان: باش اوسته. (موزو وئریر. بیر آز دایانیر) بی کیمدی پوروفسور؟
پروفئسسور: (اوشاغا باخیر) سن کیمسن؟
اوشاق: (باخیر) …
پروفئسسور: دئ دااای کیمسن.
اوشاق: اوشاقلیغ (بیر آز دایانیر. باخیر) سنون اوشاغلیغون.
پروفئسسور: یاخچی، یانی نمنه؟
اوشاق: (گئدیب صحنه‌نین اورتاسیندا بؤیرو اوسته اوزانیر. قیچ‌لارینی قوجاغینا ییغیب یاتیر) …
قزئتچی: نئینیر بو؟
مئیوه ساتان: سن قاریشما.
پروفئسسور: (اوشاغا ساری گئدیب اوشاغین اوستونه اییلیر. نازلایا‌راق) دو بالا. دو گئدی ایشه. دای یئکه‌لیبسن. (بیر آز دایانیر) دو بالامسان. قادوو آلیم.
اوشاق: (یئرینده بیر آز اویان- بویان اولور) …
پروفئسسور: یئکه‌لیبسن آخی بالا. (بیر آز دایانیر) گئجه دئمیشدیم آخی. بالاما هر نه آلاجییام. دو گئدی.
اوشاق: (یئرینده قیوریلا‌راق یوخولو- یوخولو) هیییع. هییییع.
پروفئسسور: (آغلامسینما حالیندا) دو گئدی، باشوآ دؤنیم. دو، نه دئسؤن آلاجییام. ایشیمیز تؤکیلیب قالیب.
اوشاق: (یوخولو- یوخولو) گئتمیرم من. یاتیرام من. گلمیرم. گئتمیرم.
پروفئسسور: (آغلاماقلا) گئجه دانیشمیشدوغ آخی. دو، قادون دیسین جانیما. بالاما هر نه آلاجییام. پوفی…
مئیوه ساتان: توفی…
قزئتچی: ایسمارتیز.
اوشاق: ایسته‌میرم. یاتیرام. گلمیرم. گئتمیرم.
پروفئسسور: (ساغ الینده‌کی ایپله اوشاغین قیچ‌لارینا وورا‌راق آجیقلا) جهنمه یاتیسان، گورا یاتیسان. یات نه قدر یاتاجاغسان. کوچییین بیری کوچیی. (بیر آز دایانیر) دئیسن بیرین ده گتیریم لای- لایو دا چالسین.
مئیوه ساتان: (اؤز- اؤزونه یاواشجا) لای- لای بالا لای- لای. یات قال دالا لای- لای.
اوشاق: (دوروب قاچا- قاچا صحنه‌دن چیخا‌راق) هئش یاتمیرام. گئدیرم. یوخ، گئتمیرم. گئدیرم.
پروفئسسور: (صحنه‌دن چیخا- چیخا قاهقاهایلا گولور) بالاما هر زاد آلاجییام. پوفی…
مئیوه ساتان: (اوتوردوغو یئرده یوموروغونو دویونله‌ییر) توفی…
قزئتچی: (تامسینیر) ایسمارتیز.
مئیوه ساتان: (بیر آز دایانیر) دای بی آخیر دفعه اولار اونی گؤرورو.
قزئتچی: اولار.
مئیوه ساتان: او دای اؤلر.
قزئتچی: اوننان نه دئسؤن باش وئرر. (بیر آز دایانیر) اؤلر ده.
مئیوه ساتان: (معنا‌لی باخیر) هه.
قزئتچی: او اؤلسه پوروفسوروموز اولماز.
مئیوه ساتان: ائله بیل هئچ اوولیننن یوخ ایمیش.
قزئتچی: “یوخدی” یوخدی.
مئیوه ساتان: (دوشونجه‌یه دالا‌راق) “یوخ” یوخ اولسا دا “یوخ”دی، وار اولسا دا “یوخ”دی.
قزئتچی: یازیغ.
مئیوه ساتان: هه. (بیر آز دایانیر) آمما قاباغ بئله دییلدی.
قزئتچی: هه، دئیرلر.
مئیوه ساتان: من گؤرمیشدیم.
قزئتچی: دای گؤرمزسن.
مئیوه ساتان: دئمی اولماز.
قزئتچی: هه، اولماز.
مئیوه ساتان: هئله‌لرین نه اوولیدی، نه آخیری.
قزئتچی: هه.
مئیوه ساتان: اما هله بی مدت گئتدی. (بیر آز دایانیر) گله‌نه اوخشامیر.
قزئتچی: دئمی اولماز.
مئیوه ساتان: هه، دئمی اولماز.
(ایکی‌سی ده ال- اله وئریب صحنه‌نین اوجونا گلیرلر)
بیرلیکده: زامان چوخ شئیی حل ائلر. دئمی اولماز.
سون
27- ۲۶/ ۳/ ۱۳۸۹ (۲۰۱۰)