سون گونلرده تانینمیش آذربایجان شاعر و یازیچیسی «کیان خیاو»دان سونا نشریاتی واسطه‌سیله ایکی کیتاب نشر ائدیلیبدیر. «یوخولاریمدا یئریین آغاجلار» عنوانلی کیتاب، سئویلن قلم صاحبی‌نین ۲۰ حئکایه‌سینی احتوا ائده‌ن اوچونجو حئکایه توپلوسو و «بولودوندا دونموش یاغیش» آدلی کیتاب ایسه شاعرین دوققوزونجو شعر مجموعه‌سی‌دیر. هر ایکی کیتابین جیلد دیزاینلر و گرافیستی باجاریقلی صنعتکار «کیومرث نظامیان»دیر.
«یوخولاریمدا یئریین آغاجلار» عنوانلی کیتابا داخیل ائدیلن حئکایه‌لرده داها آرتیق جمعیتده باش وئرن سوسیال اقتصادی حادثه‌لر، فاناتیزمین جمعیتین انکشافیندا قویدوغو نگاتیو تاثیرلری، اینسان کاراکترینده پسیخولوژیک قصورلو داورانیشلار، سئوگی و ملی عادت عنعنه‌لر کیمی موضوعلارا مراجعت اولوبدور.
«بولودوندا دونموش یاغیش» عنوانلی شعر مجموعه‌سینه‌ده شاعرین سون ایللرده یازدیغی شعرلریندن ۲۴ شعری، او جومله‌دن: «دنیزه دوغرو»، «بیر تاکسی دوراغیندا»، «یاوان بیر آددا نه وار»، «بیر فینجان قهوه اؤنونده»، «دونیا هله آیاقدادیر»، «بیر تیکه چؤرک اوچون»، «قار آداسی»، «آچیق بیر پنجره» آدلی اثرلری داخیلدیر.
بوندان اؤنجه کیان خیاودان «اییده بولواری» (۱۳۹۸) و «عزیزیم داغ ارییر» (۱۳۹۹) آدلی ایکی حئکایه توپلوسو؛ و «آه گؤزلرینده دوغولماق» (۱۳۸۷)، «اؤلوم اؤپوشوندن یانمیش له‌لکلر»(۱۳۸۷)، «ساری ساعاتلار دنیزینده» (۲۰۱۰- باکی)، «بیر اوجاقدا ایکی کول توپاسی (۱۳۹۰ رقیه خانیم کبیری‌له برابر)، «عاشقانه‌هایی با زبان بی‌خط و بی‌الفبا – ترجمه: کیومرث نظامیان» (۱۳۹۸)، «من دردیمین آدامییام- حاضیرلایان: بهرام سورگون» (۱۳۹۹)، « ماوی سوررئال بویام» (۱۳۹۹) و «گلن یئلده گئدن یارپاق» (۱۳۹۹) آدلاریندا شعر مجموعه‌لری یاییلیبدیر.
کیان خیاوین سون گونلرده نشر اولان ایکی یئنی کیتابینی اعتبارلی کیتاب ماغازالاریندان الده ائتمک مومکوندور.