گؤزلرینه
کیان خیاو
بیر باخدیم گؤزلرینه
ایکی باخدیم، اوچ باخدیم.
بوتون عؤمرومو یاخدیم اؤز اللریمله؛
یالنیز هانکی بیر بیلیم‌له، بیلمه‌دیم.
گؤزلرین د‌رین، او قَدَر د‌رین‌ایدی
گؤیلرین یاخینلیغینا اوجالتدی منی.
و بوتون شعیرلریمین
قابارتما سؤزجوکلرینه دؤندو.
سونرا گئجه‌لریمه
ایکیسی بیر بویدا آچیلان پنجره‌لر‌ایدیلر
سونرا قلبیمین باشینا
ایکیسی بیر بویدا ساپلانان پیچاقلار.
اوجو قیزمیش، ایتی،چیلپاق پیچاقلار!
ایکیسی بیربویدا خانیم،پادیشاهیم
نه‌لر بویورسالار، فرمان اونلارین!
من سنین گؤزلرینی گؤردوکدن سونرا
یاشاما داییر یازاجاقلاریمی اونوتدوم
و دوردوم قارشی- قارشییا شاعیرلیییمله.
گؤزلرینین قوخوسونو
هئچ بیر کسه آنلاتمالی دئییل، دئییلمی؟
سانکی ایکیسی بیر بویدا دولانان دونیا
و منده گیریب-چیخا بیلمک دیله‌یی
قاراسیندان آغینا
آغیندان قاراسینا.
آخ، بیله بیلسه‌یدیم بیر
گؤزلریمین آغلاماغی
سنین گولش گؤزلرینین
دیله‌دییی بیرنه‌سه می، یوخسا یوخ؟!
آه، بیر گون، من کیمم‌می، سورسا گؤزلرین،
سؤیله سنین دیدرگینین
سؤیله سنین سورگونون!
فروردین آیی ۱۳۸۵
