سنی دئییرلر…. / سحر خیاوی
(سایین یازار «محمد ملک نژاد»ین دونیادان کؤچمگی بهانه‌سینه)

بو دفعه ده قارا پوشک(قرعه) سنین آدینا دوشدو؛ تانیمادیغیم عزیز یازار محمد ملک نژاد! سنین سسین «بوغاناق»دا بوغولدو، منیم سه «زنده یاد»دان اؤنجه «زنده باد» دئیین، ایللر چیغیردیغیم‌هارای، حولقومومدا خفه‌لندی، کیمسه ائشیتمه‌دن.
ایندی اوتانمازجا سنی «قیزیل قلم» آدلایاجاغیق. قاپی- قاپی رومانینی گزه‌جه‌ییک، آمما سن گؤرمییه‌جکسن. بیر آن قاپ- قارانلیق ماغاریندان باشینی قووزا محمد! دونَن آیاغی‌نین آلتینا قویو قازانلاری داها اؤزونه یانان گوره‌جکسن. گولمه!! بونو ایللر بو بوغاناق و مسموم‌هاوادا نفس چکدیگیم منه اؤیره‌دیب.
منی یاندیران بو کی نه دن آلتونلاریمیزی یئر آلتینا گومندن سونرا تزه آنلاییریق کیمی، نه یی الدن وئرمیشیک؟! نه دن بو قدر دیرینی اؤلدورن و اؤلونو دیریلدن میللت اولموشوق؟!
امما اوزولمه، راحاتجا قبرینده دینجَل! سو سودان بئله ترپنمه‌یه‌جک. بیز ایشیمیزده هله ده واریق. بیزدن باشقا یوخسا اوستون فضادا نفس چکنلرین نفسینی کسه‌جه‌ییک!! ادبیات صفحه‌سیندن سانکی یوخموش کیمی‌آدینی سیله‌جه‌ییک!!‌ قارتاللارین اوجاراق اوچماق سوچونا قانادلارینی یولاجاغیق!! خیرتده‌یه‌جن دوست‌بازلیق ائله‌ییب مافیالار قوراجاغیق!! الیمیزله اؤلدوردیکلریمیزه حجله قوروب عزا ساخلایاجاغیق!!
اوزولمه، هله ده آدلیملاریمیزا ساغکن تؤرن توتموروق؛ بویونلارینا چلنگ هؤرموروک؛ کیتابلارینی اؤپوب گؤز اوسته قویموروق؛ قلملرینی آلقیشلامیریق؛ آخی هله آلقیشلاماق واختلارینا قالیر. آخی بیز دیریلری سئون جماعت دئییلیک!! گؤزده-قولاقداییق؛ گودوروک صاباح زنگ‌لر کیمین آدینا چالیناجاق؛ قارا پوشک کیمین آدینا دوشه‌جک!! هه….بیز بئله آداملاریق.
راحات یات محمد! راحات یات! یامان اوزلو دونیاسیز هئچ نمنه الدن وئرمه‌ییبسن. یالنیز قلمین بارماقلارینا داریخاجاق. بوغازیندا «بوغاناق»لار بوغولاجاق. دفترینین سینه‌سی بارماقلارینسیز گؤینه‌یه‌جک. اوزون زامانلار او اوجقار دیب اوتاقدا قلمله باش-باشا سسسیزجه سنی آغلایاجاق.
کئشگه بو آنسیزین کؤچمه‌لر بیزی خبرسیزلیک یوخوسوندان آییلدایدی بیرآز…کئشگه…