hebib
آژيردن آژيره
حبیب فرشباف

غزه فاجیعه‌سینی دوشونرکن، ایران- عراق موحاریبه‌سی ایللری یازیلان بیر شعر تقدیم اولور.

اويغوسو سكسكه‌لي،
كؤنلو هيجران لكه‌لي؛
دونني گونش خياللي، افتخارلي،
بو گونو –
شاختالي، قارلي تبريزيم.

تبريزيم كدرلي، تبريزيم ياسلي،
قوللاري زنجيرلي، زنجيري پاسلي.
باخ! نئجه ده‌ييشيبدير وطنيمين گؤركمي!
آخ، اود آلتيندا كول كيمي؛
آخ، كول آلتيندا اود كيمي.

آيسيز گئجه‌لرينده اوزون گولمه‌دي بير آن؛
گوزلرين نيگران،
كؤنلون نيگران.
آج جاناوارلار كيمي اوولادي آژير يئنه،
بو سسدن بوتون شه‌هر ديسكيندي بيردن- بيره.
قيرميزي وضعيّتدن
سارالدي، سولدو رنگي،
ساپ- ساري اولدو رنگي-
بوسبوتون آنالارين،
بوسبوتون بالالارين.

آغير ماتم سوكوتو-
بورودو باشدان باشا قهرمان شه‌هريمي.
آنالارين قوينونا
بير اوووج يوماق كيمي قيسيلميشدي بالالار؛
نئجه ده اوزون سورور
بو سوكوت بو انتظار.
چيخيب قاچماق ايسته‌دي كؤنول قوشو قفسدن؛
بير داها چيرپينمادي اوره‌ك، دوشدو نفسدن.
شه‌هر سس‌سيز، سميرسيز
طيلیسمدن داشا دؤنموش بؤيوك قهرمان كيمي،
گؤزلريني قارانليق بورويوب دومان كيمي.
بير چوپ‌ده قيميلدانمير،
بيرجه چيراقدا يانمير.
اؤلوم قوشو شه‌هرين باشي اوسته دولانير؛
دمير قاناد بو قوشو
هر كس يالنيز اؤزونون باشي اوستونده سانير.

گؤزلر برلميش حالدا زيلله‌نيب قارانليغا،
قولاقلار داري دلير،
تكجه قارا اؤلومون آياق سسلري گلير.
بيردن ديسكينير تورپاق بومبالارين سسيندن؛
شوشه‌لر پَرم- پَرم داغيلير وحشتیندن.
آغارينجا وضعيت
آرتيق قارالميش اولور يوزلر اینسان طالعي
قاريشير تورپاقلارا
يوزلر انسان آرزوسو،
يوزلر انسان ديله‌يي.

بيردن گؤزلريم دولور منيم بو فاجيعه‌يه؛
منه بير جواب وئرين:
– آخي نه اوچون،نييه-
بو قده‌ر قانلار هله…؟
آخ، قان ايچن جلاّدلار گوزلرين دويورماييب،
او يئنه قان- قان دئيير؛
او هئچ نه قانماسادا،
زامان اونا- قان! دئيير.
زامانين ايسته‌يينه بويون اَيمه‌سه آنجاق،
آخيتديغي قانلاردا نهايت بوغولاجاق.
1365

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4