یئنه…
بهروزصدیق

یئنه «پراپانول»، یئنه «کدئیین»،
یئنه تقویم‌لری چئینه‌ییر سیچان.
سینه‌مده سه‌ییرییر سؤزون سرگیسی
یالین اللریمده گؤینه‌ییر گومان.

اونا بنزر الی قوینوندا، دالغین-
اؤتور کوچه‌میزین پاییزلیغیندان.
یاخیلمیش یاراسی باخیش دا یایغین،
من اونو تانیرام آرازلیغیندان.

یئنه «پراپانول»، یئنه «کدئیین»،
دالغالار قوینوندا قیرمیزی ساعات.
چیلپاق آیاغیمدا تیکان کوچوک‌لر
و حیات کیشنه‌ین ده‌لی‌سو بیر آت.
۹۸/۷/۱۳