Home / شعر / کاروان / حبیب فرشباف

کاروان / حبیب فرشباف

hebib
کاروان
حبیب فرشباف
(شوشتر تصنیفی)

گونلریمین کاروانی کئچدی قارالی، آغلی
بیری قورقوشون یوکو،او بیریسی ماراقلی؛
ائله گئجه‌م اولدوکی بیراولدوز دا آخمادی،
ائله گوندوزوم اولدو گونشلی، هم چیراغلی.

گونلریمین کاروانی کئچدی قارالی – آغلی
بیری هیجران نفسلی، بیری ووصال سوراقلی؛
ائله قیشیم اولدوکی غم‌لری قان دوندوران،
ائله یازیم اولدو کی سئوینجی باغچا باغلی.
حیات نه گول نه تیکان؛ حیات نه غم، نه سئوینج
آناتورپاق آدلانیر یوردوم دره‌لی، داغلی.

گونلریمین کاروانی کئچدی قارالی آغلی
بیری قورقوشون یوکو، او بیریسی ماراقلی.

گئجه شوون قوپدو کی آتام کؤچدو دونیادان،
صاباح موژده چاتدی کی باجیمین اولدو اوغلو.
ائله قیشیم اولدو کی غم‌لری قان دوندوران
ائله یازیم اولدو کی سئوینجی باغچا باغلی.
حیاتیمین هرآنی دوشسه ده حالدان حالا
اومیدیمین هئچ زامان قالمادی قولو باغلی.

About ایشیق

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *